Нийслэл дэх өргөх машин механизмтай холбоотой осол аваарын хамгийн өндөр хувийг барилгын салбар эзэлсээр байна. 

      Барилгын салбар дахь өргөх машин механизмтай холбоотой осол аваарын тоо харьцангуй буурч байгаа үзүүлэлттэй байгаа ч ХАБЭА хангахгүй байгаа газрууд нэлээд байгаа юм. Өнөөдөр үүнтэй холбоотойгоор НМХГ-аас 2018 оны эхний хагас жилд гарсан барилгын болоод үйлдвэрлэлийн осол, өргөх техникүүдэд гарсан ослын шалтгаан нөхцөл, авсан арга хэмжээний талаар мэдээлэл хийсэн.

      Статистикаас харахад, Хөдөлмөрийн аюулгүй байдал, эрүүл ахуйн хууль, дүрэм, журам, стандартыг хангаагүйн улмаас гарсан нийт 140 ослын 64 буюу 45,7 хувь нь барилгад, 9 буюу 6,5 хувь нь эрчим хүчинд, 24 буюу 17,5 хувь нь уул уурхайн, 24 буюу 17,5 хувь нь хөнгөн хүнсний салбаруудад гарсан байна. Харин зөвхөн энэ онд барилгын 8 осол бүртгэгдсэн бөгөөд 5 нь амь насаа алдсан байна. Осол гарахад нөлөөлсөн хүчин зүйлийн 15 хувь удирдлагын тогтолцооноос, 30 хувь нь ажлын байрны орчин нөхцөлөөс, 20 хувь нь техник, технологийн эвдрэл гэмтлээс, 35 хувь нь хүний хүчин зүйлээс хамаарчээ.

Унах, бүдрэх, халтирах /барилга, тайз, шат, тээврийн хэрэгслээс унах, нүх, худаг, шуудуу, ухсан нүхрүү унах г.м/ тохиолдол 35 хувь, унаж байгаа эд зүйлд цохигдох /хөрс, хад чулуу, цасны нуралт, гулгалт болон барилга, байшин, өргүүр, хураасан бараа, бүтээгдэхүүн нурж, унаснаас дарагдах г.м/ буюу 30 хувь, цахилгаан гүйдэлд цохиулах 7,5 хувь, өргөх зөөх механизмын ажиллагаанаас хамаарсан 12,5 хувь, түлэгдэлт 5 хувийг тус тус эзэлжээ.



Лифтний тухайд, Улаанбаатарт 1980 оноос хойш ашиглалтад орсон  буюу ашиглалтын хугацаа дууссан 159 лифт байна. Энэхүү шалгалтын явцад сайшаалтай зүйл нь Сууц өмчлөгчдийн холбооны гүйцэтгэх захирал нь олон жил солигдоогүй, тогтмол ажилласан байгууллагын хувьд тогтоосон хугацаанд лифтний засвар үйлчилгээг хийлгэж, мэргэжлийн лифтчин ажиллуулж, техникийн аюулгүй байдлыг бүрэн хангаж, хариуцлагатай ажиллаж байгаа нь ажиглагджээ.

2018 онд лифтний аюулгүй ажиллагааг хангаагүйгээс 10 хүн гэмтсэн нийт 4 осол гарсан байна.

“Нарны хороолол”-ын урд байрлах 5 давхар барилгын ажилд ашиглагдаж байсан ачааны өргүүрийн ган татлага тасарсан байдал

“Алтай констракшн” ХХК-ийн захиалгатай “Саруул” хорооллын 4 дүгээр ээлжийн 12 давхар, B7 блокын барилга угсралтын ажлыг гүйцэтгэж байсан QTZ-40 маркийн краны секцний холбоос бэхэлгээнд хуучин ан цавтай зэврэлт үүссэн байгаа нь

“Юп” ХХК-ий “Дэлгэрэх” хотхон 5 блок, улсын бүртгэлийн 2143 дугаартай, ТС-5013 маркийн цамхагт краны угсралтын ажлын дарааллыг алдаж монтажны цамцыг эргэх хүрдтэй холбох бэхэлгээний шантаг /пайлц/ түгжээг дутуу хийсэн байдал

    НМХГ ашиглалтын шаардлага хангахгүй краныг буулгах, лифтийг битүүмжлэх, холбогдох сургалт, зөвлөгөө өгөх гэх зэргээр осол аваараас урьдчилан сэргийлэх арга хэмжээнүүдийг авч ажиллаж байна.