-Юун түрүүнд манай уншигчдад өөрийгөө болон “Хүннү конкрет” үйлдвэрийнхээ тухайд танилцуулна уу.
-Анх 2011 онд “ХҮННҮ конкрет” ХХК-д борлуулалтын менежерээр ажилд орсноор барилгын салбарт хөл тавьж байлаа. Үүнээс хойш найман жилийн хугацаанд бетон зуурмагтай холбоотой бүхий л ажлыг хийж, хичээн зүтгэсний хүчинд компанидаа үнэлэгдэж шат ахисаар одоогийн албан тушаалд томилогдсон.
“ХҮННҮ конкрет” ХХК-ийн тухайд 2011 онд үндэсний томоохон бүтээн байгуулагчийн нэг “ТЭСО” корпорацын охин компани болон байгуулагдсан. Өдийг хүртэл улсын болон хувийн томоохон төслүүд дээр ажиллаж, бага багаар үйл ажиллагаа маань тэлсээр өнөөдрийн байдлаар 80 гаруй ажилтан, ажилчинтай үйл ажиллагаагаа явуулж байна.
Бид анх цагт 120 шоо метр бетон зуурмаг үйлдвэрлэх хүчин чадалтайгаар үйлдвэрлэлээ эхлүүлж байсан бол өдгөө 180 шоо метр бүтээгдэхүүн үйлдвэрлэх хүчин чадалтай үйлдвэрийг нээж үйл ажиллагаагаа тэллээ. Энэ онд гурав дахь үйлдвэрээ барихаар төлөвлөөд байна. Түүнчлэн үйлдвэрийн лабораторийг цаг бүр шинэчилж, дэлхийд тэргүүлэгч эко бетон зуурмаг үйлдвэрлэхэд чухал түлхэц өгдөг “Proceq” брендийн багаж төхөөрөмжийг амжилттай лабораторидоо нэвтрүүлсэн.
Мөн бохир усаа дахин ашиглах төсөл маань судалгааны хүрээнд амжилттай явагдаж байгаа.
Харилцагчдад бүтээгдэхүүнээ тасралтгүй нийлүүлэхийн тулд үйлдвэрээ төмөр замтай холбож, дүүргэгч материал болон цементийг үйлдвэрлэгчээс нь шууд татан авдаг боллоо.  Үйлдвэрийн бүтээмжийг нэмэгдүүлэх зорилгоор 2015 онд БНСУ-д үйлдвэрлэсэн цагт 40 тонн цементийн уут задлах төхөөрөмжийг суурилуулан зуны ид ачааллын үед үүсдэг холбогч материалын тасалдлыг зогсоосон.
2015-2016 онд салбартаа тэргүүлэх хэмжээний авто баазыг бий болгож харилцагчийн хэвийн нийлүүлэлтийг цогцоор нь шийдэж өгсөн.
Гадаад харилцааны тухайд, Канад, Америк, ОХУ гэх мэт хэд хэдэн улсын мэргэжлийн холбоодтой хамтран ажиллаж, тэдгээрээс шинэ, шинэлэг техник технологийн мэдээллийг цаг алдалгүй авч эдгээр улсын стандартуудыг Монголдоо нутагшуулах зорилготой ажиллаж байна.
 
-“Bloomberg” телевизээр гарсан танай компанийн тухай нэвтрүүлгийг үзэж байхад “Цахим хяналтын систем” их сонирхолтой санагдсан…
-Дэлхий нийтээрээ цааснаас татгалзаж онлайн системд шилжиж байна. Бид ч гэсэн 2015 оноос энэ системийг нэвтрүүлсэн. Хэрэглэгч та манайхаас бетон зуурмаг худалдан авахдаа өөрийнхөө гар утсан дээрээс бүтээгдэхүүн үйлдвэрлэж эхлэхээс аваад барилга дээр цутгалт хийх хүртэлх бүх ажиллагааг видео камер, Жи Пи Эс, аппликейшнийн тусламжтайгаар харах бүрэн боломжтой. Бас цутгалтын ажлын гүйцэтгэлийн хувь, санхүүгийн төлбөр тооцоо, чанар стандартын үзүүлэлтүүд зэргийг гар утаснаасаа шууд үзэх боломж нээгдсэн гэсэн үг.
 

-Өвлийн улиралд хэрэглэх бетон зуурмагт хүйтэн тэсвэрлэлтийг нэмэгдүүлэх ямар нэмэлт оруулж хэрэглэж байна? Тэр нь Монголын цаг уурт тохирч байгаа эсэхийг та бүхэн юугаар батлах вэ?
-Евро стандартын шаардлага хангасан хүйтний нэмэлтийг үйлдвэрлэлдээ нэвтрүүлсэн. Гэхдээ зарим үзүүлэлтийг Монголынхтой харьцуулахад цаг агаар болон түүхий эд материалын шинж чанарын хувьд ялгаатай. Иймд гадаадын мэргэжилтнүүдийг урьж бүтээгдэхүүнийхээ найрлагад ордог түүхий эдэд шинжилгээ хийлгэж хамтарсан туршилт явуулсан. Тэр бүхэндээ үндэслэн Монгол орны цаг агаар, түүхий эдэд тохирсон, стандартын шаардлага хангахуйц евро стандартын хүйтэнд тэсвэртэй нэмэлтийг ашиглаж байгаа. Эдгээр нэмэлтүүдийг хасах 15^о-25^оС температурт ашиглаж болно.
 Мэдээж бид харилцагч нарынхаа төсөлд тохирсон зөвлөгөө, зөвлөмж өгч хамтарсан сургалтыг ажлын хүрээнд тогтмол зохион байгуулдаг.
 
-Төмөр бетон бүтээц, тэр дундаа өндөр бат бэхтэй хийцэд хэрэглэх бетон зуурмагт угаасан элс, хайрга хэрэглэх ёстой. Энэ тухайд?
- Бохирдлын хувьд 3 хувиас бага бохирдолтой элсээр өндөр маркийн бетон зуурмаг гарган авахад тохиромжтой байдаг. Том дүүргэгч болох дайрга нь 5-10мм, 10-20мм -ийн ширхэглэлтэй байх бөгөөд бохирдол, тоос шаврын хэмжээ нь нэг хувиас хэтрэхгүй байх шаардлагатай. Гол нь уулын, хатуулаг өндөртэй 100 хувь буталсан барзгар гадаргуутай чулуулаг байх ёстой. Онцгой өндөр маркийн бетон гаргаж авахад сайн чанарын идэвхт эрдэст нэмэлтийг стандартын дагуу хэрэглэх нь зүйтэй. Гангийн шаарга, цахиурын агууламж өндөр элс, цахилгаан станцын үнс зэргийг нэмэлтээр ашиглаж болно. Монголд ашиглагдаж байгаа цементийн хамгийн өндөр үзүүлэлт нь OPC 52.5 мПа байдаг ба энэ нь М500 марк хүртэлх бетон зуурмагийг гаргаж авах боломжтой гэсэн үг. 500 маркаас дээш үзүүлэлттэй бетон зуурмагийг үйлдвэрлэхийн тулд сайн чанарын химийн нэмэлт ашиглах шаардлагатай болдог. Манай компани өөрийн орны нөхцөлд тулгуурлан экологид ээлтэй бүтээгдэхүүн үйлдвэрлэхээр дөрөвдүгээр цахилгаан станцын хаягдал үнсийг үйлдвэрлэлдээ нэвтрүүлж байна. Үнсийг нэг шоо метр бетон зуурмагт орох цементийн жингийн 10-15 хувьд ашиглах боломжтой байдаг. Иймээс үйлдвэрлэгч бусад компани мөн адил идэвхт эрдэст нэмэлтийг үйлдвэрлэлдээ нэвтрүүлж байгальд ээлтэй бүтээгдэхүүнийг үйлдвэрлэхийг уриалж байна.
 
-Энэ төрлийн үйлдвэрт дүүргэгч буюу элс хайрга хамгийн чухал. Гэтэл сүүлийн үед Улаанбаатар хотод дүүргэгч материалын хангамж болоод чанар маш хангалтгүй байгаа. Танайх бүтээгдэхүүнийхээ найрлагад ордог гол түүхий эд болох элс, хайрга, цементээ хаанаас авч байна? Ер нь манай улсын элс, хайрга нийлүүлж буй газрууд стандартын шаардлага хангадаг уу. Дийлэнхдээ хангадаггүй гэж ярьдаг. Энэ тухайд?
-Нарийн болон том дүүргэгч болох элс хайрга нь бетон зуурмагт ширхэгийн дутагдлыг нөхдөг гол материал. Манай үйлдвэрийн тухайд дотоодын болон хөндлөнгийн лабораторид дээжээ шинжлүүлдэг. Ингэхдээ уг хайрга элсийг ямар хугацаанд, яаж хадгалсныг бас тодорхойлох хэрэгтэй. Өвлийн цагт хадгалсан дүүргэгч материал нь цас бороонд дарагдсанаар хөлдөж нэг бүхэл болдгоос гэсгээж хэрэглэхгүй бол чийгийн хэмжээ нь хэлбэлзэж, бетон хольцын усны зарцуулалтыг өөрчилж, температурыг огцом бууруулах аюултай. Элсний хувьд кварцлаг шинж чанар сайтай, цахиурын агууламж өндөртэй байвал бетоны шинж чанарт эерэгээр нөлөөлдөг.
Үйлдвэрлэл эрхэлж байгаа нийт газрууд чанарын асуудал бус эдийн засгийн хэмнэлтийг харж бүтээгдэхүүнийг үйлдвэрлэлдээ нэвтрүүлдэг талтай.
2017 оноос эхлэн улсаас 100 гаруй каррьерийн тусгай зөвшөөрлийг цуцалсан нь дүүргэгч материалын эрэлтийг ихэсгэсэн. Ингэснээр түүхий эд материалын дутагдалд орсон үйлдвэрлэгчид чанарын шаардлага бүрэн хангаагүй материалыг үйлдвэрлэлдээ нэвтрүүлэхээс өөр аргагүй байдалд шилждэг. Манай компанийн хувьд Дархан хотод байрлах өөрийн каррьераас нийлүүлэлтээ хийж, ложистикийг төмөр зам ашиглан шийдэж байна. Түүхий эд, материалынхаа хадгалалт, хамгаалалтыг тогтмол хянах, ялангуяа өмнө нь хэрэглэж байгаад үлдсэн, эсвэл үйлдвэрлэгч таван сар гаруй хугацаагаар хадгалсан цементэд заавал шинжилгээ хийж хэрэглэх боломжтой эсэхийг тогтооно. Цемент нь нарийн ширхэгтэй нунтаг материал учраас чанараа амархан алдаж идэвх (барьцалдах болон бат бэх чанар) нь гурван сар хадгалахад 20 хувь, зургаан сард 30 хувь, жил хадгалахад 40 хувь буурдаг. Химийн нэмэлт хөлдсөн л бол чанараа алдана. Бид үйлдвэрлэлдээ дотоодын тухайлж хэлбэл “Хөтөлийн цемент шохой” ХК–ийн бүтээгдэхүүнийг ашигладаг. Үүний зэрэгцээ шинээр зах зээлд гарч буй бүтээгдэхүүнүүдийг цаг тухай бүрт шинжилгээнд хамруулж, өөрсдийн түүхий эдэд тохирох эсэхийг тогтмол судлан шинжилж үйлдвэрлэлдээ нэвтрүүлдэг.