ICON буюу New Story компанийнхан энэхүү төслийг амжилттай хэрэгжүүлж, түгээж чадвал дэлхий дээр нэг тэрбум хүн орон байраар хангагдах боломж бүрдэх аж. Тэд 3D хэвлэгчээр 55-74 м.кв талбайтай сууцыг 24 цагийн дотор барих аргачлалыг судалж, туршилтын анхны загваруудаа АНУ-д барих зөвшөөрлөө авчээ. Энэхүү сууцны өртөг нь 4,000 доллар байх гэнэ.

   Техасын Оустин хотноо эдгээр 3D технологийн сууц барихыг зөвшөөрөөд байгаа юм. Сууцыг барихын тулд ICON компанийнхан Эл Сальвадор, Гайти гэх мэт ундны ус хомс, эрчим хүчний шугам сүлжээ хүрэлцээгүй газарт ч ажиллах боломжтой Vulcan гэх 3D хэвлэгчийг бүтээжээ. Энэ нь барилга барих уламжлалт арга барилаас хэд хэдэн давуу талтайг компанийн үүсгэн байгуулагч Жэйсон Баллард онцолсон байна.



   New Story компанийнхан тухайн орон нутагт нийтлэг байдаг барилгын материалуудыг ашиглан зуурмаг бэлтгэж ижил төрлийн загвартай 3D сууцнуудыг барихаар төлөвлөжээ. Ингээд орон нутгийн ажилчидтай хамтарч хандивын ажил хийж, уламжлалт барилгын ажилд шаардагддагтай адил байшин тус бүрт дөрвөн хүн ажиллуулах аж. 3D хэвлэгчээр байшин барихад ажиллах хүч бага шаардагдах боловч орон нутгийн ажлын байрны хэрэгцээг хангах үүднээс ийнхүү тоог цөөлөхгүй байхыг хичээж байгаа гэнэ.



   Тэд буяны үйлсэд зориулах анхны төслөө Эл Сальвадорт эхлүүлж, бусад газарт шат дараатайгаар хэрэгжүүлэх аж. Одоогоор ийм төрлийн 100 сууц барих санхүүжилтийг босгохоор цуглуулж байгаа юм. Цаашлаад дараагийн шатны судалгаа, хөгжүүлэлтийг хийж байгаа гэнэ. 3D сууцны анхны эзэд 2019 оны хоёр юм уу, эсвэл гуравдугаар улиралд байшиндаа орох юм байна.