Төв цэвэрлэх байгууламжийг шинэчлэх ажлын талаар өнгөрсөн 12 дугаар сард Ерөнхий сайдын үүрэг болгосноор Барилга, хот байгуулалтын сайдаар ахлуулсан, Байгаль орчин, аялал жуулчлалын яам, Эрүүл мэндийн яам, Нийслэлийн засаг даргын ажлын албанаас хамтарсан 15 хүний бүрэлдэхүүнтэй ажлын хэсэг байгуулагдсан юм.

   Барилга, хот байгуулалт сайд Х.Баделхан хэлэхдээ “Одоо ашиглагдаж байгаа төв цэвэрлэх байгууламж нь 1964 онд ашиглалтад орсноос хойш нийт 900 метр куб лагийг хуримтлуулсан байдаг. Үүнээс 70 хувь нь хатсан лаг, 30 хувь нь үнэртэй, шингэн лаг байдаг. Эхний ээлжинд 50 жилийн турш хуримтлагдсан лагийг химийн бодисоор үнэргүйжүүлэх, хоргүйжүүлэх ажлыг, хоёрдугаарт өдөрт бүр гарч байгаа 1000 метр куб лагийг технологийн дагуу зарим нэг тоног төхөөрөмжийг тавьж, улмаар пресс шахах, усыг нь тусад нь ялгаж хатаах, шатаах гэсэн дарааллын дагуу арилгаж, үнэргүйжүүлэх ажлыг ойрын хугацаанд зохион байгуулна” гэв.

   Манай улс нь лагийн үнэрийг дарах цогц арга хэмжээг анх удаа авч хэрэгжүүлж байгаа төдийгүй цаашид Герман, Япон улсуудын “Лагийг бактераар идүүлэх” технологийн талаарх төгс шийдлийг авч хэрэгжүүлж, туршлага хуримтлуулах аж.