Жил болгоны хаврын улиралд зохион байгуулагддаг “Барилга, нийтийн аж ахуйн салбарын удирдах ажилтнуудын зөвлөгөөн” өнөөдөр Төрийн ордноо боллоо.

   Энэхүү зөвлөгөөн нь барилгын төрийн болон төрийн бус байгууллагууд хэрэгжүүлсэн ажлаасаа гадна цаашид хийхээр төлөвлөсөн ажлаа танилцуулж, салбарынхаа хувийн хэвшлийнхэн болоод мэргэжилтнүүд, инженерүүд, барилгачдынхаа санал бодлыг сонсож, цаашдын бодлогыг тодорхойлох зорилготойгоор ийнхүү 600 гаруй хүний бүрэлдэхүүнтэйгээр зохион байгуулагдсан юм.



   Зөвлөгөөний эхэнд Барилга, хот байгуулалтын сайд Х.Баделхан нээж барилгын салбарынханд мэндчилгээ дэвшүүлээд: Улс орны эдийн засаг амаргүй байгаа энэ нөхцөлд барилгын салбарт орчин цагийн металл, төмөр бетон карказ, шилэн фасад бүхий олон давхар барилгууд сүндэрлэж, инженерийн нарийн төвөгшил шаардлага бүхий Хөшигийн хөндийн нисэх буудлын цогцолбор байгууламж, дотоодын хэрэгцээг хангахуйц улирлын хамааралгүй барилга, орон сууц барих, дотоодод байшин үйлдвэрлэх үйлдвэр, хот болон хөдөөд олон тооны барилга ашиглалтад өгсөн үр дүнтэй байна. Энэ хугацаанд Барилга, хот байгуулалтын яам бодлогоор зарим өөрчлөлт шинэчлэлт хийлээ. Тухайлбал, барилгын ажилтанг давтан сургах, мэргэжил дээшлүүлэх, мэргэжлийн зэрэг олгох, барилга байгууламжийн зураг төсөл боловсруулах, барилгын ажил гүйцэтгэх, өргөх байгууламж ба түүний эд ангийн үйлдвэрлэл, угсралт, засвар үйлчилгээ хийх хуулийн этгээдэд тусгай зөвшөөрөл олгох үйл ажиллагааг гэрээний үндсэн дээр мэргэжлийн төрийн бус байгууллагаар гүйцэтгүүлэхээр шийдвэрлэснийг дурдсан юм.

   Тэрээр цааш нь, төрийн бус мэргэжлийн байгууллагууд болон хувийн хэвшлийнхний дуу хоолой, санал санаачилгыг төрийн байгууллагын ажилд тусгаж, шинэ технологи ба инновацийг энэ салбарт хөгжүүлэхэд өнөөдрийн зөвлөгөөн чухал ач холбогдолтой гэдгийг онцоллоо.



   Түүнчлэн зөвлөгөөнд Монгол Улсын Ерөнхий сайд У.Хүрэлсүх оролцож хэлсэн үгэндээ, Монгол Улсын Засгийн газар 2016-2020 оны үйл ажиллагааны хөтөлбөртөө барилга, хот байгуулалтын чиглэлээр иргэдийн эрүүл, аюулгүй орчинд амьдрах нөхцөлийг хангасан хот, суурин газрыг төлөвлөж, байгаль орчин, хүний эрүүл мэндийн шаардлагад нийцсэн барилгын үйлдвэрлэлийг дэмжиж, хүн амыг эрүүл, аюулгүй, хүртээмжтэй орон сууцаар хангах төрийн бодлогыг боловсруулан хэрэгжүүлэх зорилт тавин ажиллаж байгааг дурдсан юм. Энэ хүрээнд улс, орон нутгийн төсөв болон гадаадын зээл, тусламжаар Монгол Улсын хүн амын нутагшилт, суурьшлын хөгжлийн ерөнхий төсөл боловсруулах, ипотекийн зээлийг хөнгөвчлөх, иргэдийг хямд өртөгтэй орон сууцаар хангах, түрээсийн орон сууцны санг нэмэгдүүлэх, гэр хорооллын дэд бүтцийг сайжруулах, инженерийн шугам сүлжээнд холбох ажлыг эрчимжүүлэх, хөрөнгийн асуудлыг шийдвэрлэх зэрэг ажлуудад онцгойлон анхаарч байгаа гэлээ. Мөн Улаанбаатар хотын болон аймгийн төвүүдийн бохир ус цэвэрлэх байгууламжийг шинээр барих, барилга, барилгын материалын үйлдвэрлэлд дэвшилтэт техник, технологи, инновацийг нэвтрүүлэн бүтээмжийг нэмэгдүүлэх, дуусаагүй байгаа төсөл, хөтөлбөрүүдийг нэн тэргүүнд ашиглалтад оруулах, тус салбарын инженер, техникийн ажилтан, мэргэжилтнүүдийг шинэ дэвшилтэт технологид сурган мэргэшүүлж, ур чадварыг дээшлүүлэх чиглэлээр ажиллаж байгаагаа мэдэгдсэн юм. Ерөнхий сайд цааш нь, Барилгын салбар манай улсын бүтээн байгуулалтын гол тулгуур багана болохын хувьд тус салбар дахь бүтээмжийг нэмэгдүүлэх, улс орны эдийн засагт үр өгөөжөө өгөх аливаа дэвшилтэт арга хэрэгсэл, техник, технологи, бүтээлч санал, санаачилгыг дэмжинэ гэлээ.



   “Барилга, нийтийн аж ахуйн салбарын удирдах ажилтнуудын зөвлөгөөн”-д холбогдох салбарын албан тушаалтнууд Барилга, нийтийн аж ахуйн салбарт төрөөс баримталж буй бодлого, хэрэгжилт, салбарын хөрөнгө оруулалт, түүнийг сайжруулах боломж, мөн хөдөлмөрийн зах зээлд эрэлт, нийлүүлэлтийн бодлого, нийслэлийн хэмжээнд хэрэгжиж буй төсөл хөтөлбөрүүдийн хэрэгжилт гээд олон талын мэдээлэл өгсөн илтгэлүүдийг танилцуулсан юм.

   Зөвлөгөөний дунд болон төгсгөл хэсэгт оролцогчдын санал хүсэлтийг сонсож, асуултад хариулах хэлбэрээр уулзалт үргэлжилсэн юм. Зөвлөгөөн маргааш Монголын архитекторуудын эвлэл, Барилгын хөгжлийн төв, МҮХАҮТ-д салбар хуралдаануудаар үргэлжилнэ.