Дэлхийн интернэтийн дөрөв дэх удаагийн чуулга уулзалт Шанхай хотод болж өнгөрлөө. Энэ удаагийн чуулганы гол сэдэв нь үсрэнгүй хөгжиж буй Хятадын интернэт зах зээлийн асуудал болж байна гэж олон улсын ажиглагчид онцолж байна.

Хятадын Кибер судалгааны академийн мэдээлснээр тус улсын цахим эдийн засгийн хэмжээ 2016 оны эцсийн байдлаар 22.58 их наяд юаньд (3.4 их наяд ам.доллар) хүрсэн байна. Энэ тоо цаашид ч өсөх хандлагатай байгаа аж.

Хятадын эрх баригчид “Facebook”, “Twitter” гэх мэт олон улсын нийгмийн сүлжээний вэб сайтуудыг улс орных нь дотоодын аюулгүй байдалд ноцтой хохирол учруулна гэж сэрэмжлэн хориглодог. Цаашид ч интернэтийн эрх чөлөөг хязгаарлах талаар ажиллана.

Гэсэн хэдий ч “Google” компани Хятадын хакерчдын довтолгоонд өртсөнийгөө үл умартан тус улсын зах зээлд байр сууриа эзлэхийг зорьж байгаа аж. Мөн “Apple” компани Хятадын удирдлагуудтай хамтын ажиллагаа өрнүүлж эхлээд байна. Хятадын аварга зах зээлээс шанагаар хутгах төдий л олон улсын компаниудын орлого үлэмж нэмэгдэнэ гэдгийг шинжээчид илэрхийлж байгаа юм.

“Синьхуа” агентлагийн мэдээлснээр, өдгөө дэлхий дахинд интернэт хэрэглэгчдийн тоо 3.89 тэрбумд хүрээд байгаа бол Хятадад энэ тоо 751 саяд хүрчээ. Хятадад гар утсанд зориулсан цахим худалдааны шинэ арр, хоол хүнс захиалах, цахим тоглоом гэх мэт интернэтийн боломжинд суурилсан бизнес өргөжиж байна.