Барилгын салбарт амжилттай ажиллаж, эрхэм “Барилгачин” алдрыг хүртэн яваа нэгэн үеийнхний манлай болсон залуусын түүчээг “Ажлын нэг өдөр” буландаа урьж, тэдний өдөр тутмын ажлын үйлсийн хэв маяг, онцлогийг тусгахын зэрэгцээ амжилтынх нь нууцыг уудлан дэлгэж, энэ л салбарт зүтгэж яваа нөхдүүдэд нь сургамжлан, уншигч олондоо танилцуулдаг билээ. Ээлжит ярилцлагынхаа зочноор барилгын салбарт 23 жил хөдөлмөрлөж, өдгөө 200 гаруй барилга, байгууламжийг Улсын комиссод хүлээлгэн өгч, тэр дундаа улсын маань нүүр царай болсон “Ривер гарден”, “Тайм скуэр” хотхоныг бүтээн босгож буй NCD группын  Ерөнхий инженер Ч.Нацагдоржийг урьсан юм.  

Одоо хашиж буй албан тушаал: “Номин констракшн” ХХК-д Талбайн дарга, Ерөнхий инженер 
Төрсөн газар: Ховд аймаг, 1972 он
Мэргэжил: БАС Иргэний ба үйлдвэрийн барилгын конструктор инженер
Ашигладаг программ: AutoCad, Ms Word, Excel, Outlook, PowerPoint, Project
Facebook хаяг: Natsagdorj Chimedtseren
 

-Таны ажлын чиг үүрэг?
Ерөнхий инженер гэдэг нэн түрүүнд компанийн хөдөлмөр ахуй, эрүүл аюулгүй байдлыг чанд хангуулах үүрэгтэй. Улмаар ажлын чанарт хяналт тавих, материалын доголдол гаргахгүй байх, барилгын ажлыг норм дүрэм, стандартын дагуу хийгдэж байгаа эсэхэд анхаардаг. Эдгээр чиг үүргийн дагуу манай байгууллагатай хамтарч ажилладаг ажил гүйцэтгэгч 70-аад компанийн 1500 гаруй ажилтныг удирдлагаар хангаж, зохиогч, захиалагч, гүйцэтгэгч нарын хооронд уялдаа холбоогоор хангаж байна.

МУ-д мөрдөгдөж байгаа норм, дүрэм цаг тухай бүрт шинэчлэгдэж чаддаггүй учраас манай компани хэрэглэгдэж байгаа материал, тоног төхөөрөмждөө тааруулан дотоод журам, стандарт гаргадаг. Үүнд хяналт тавьж, зөвлөгөө өгөх үйл ажиллагааг зохион байгуулдаг. Түүнчлэн барилгаа улсын комисст хүлээлгэн өгөх, бүх шатны зөвшөөрөл, бичиг баримтын ажлыг биечлэн хөөцөлдөж авах үүрэгтэй байдаг даа. Энэ мэтчилэн олон чиг үүргийг гүйцэтгэн ажилладаг.

-Өдөр тутмын ажил тань хэрхэн өнгөрдөг?
Зуны цагийн хуваарьт шилжээд өглөө 08-19 цаг хүртэл ажиллаж байгаа. Өглөө ирмэгц мэйл хаягаа шалгаж, дараа нь инженер, техникийн ажилтнууддаа үүрэг даалгавар өгч, зөвшилцдөг. Өнөөдрийн тухайд 09 цаг 30 минутад “Тайм скуэр” төслийн талбайн үзлэгтэй. Ингэхдээ, талбайн ажлын чанарын хяналт шалгалтыг хийж, материал хадгалалт зөв эсэх, хөдөлмөрийн аюулгүй байдал, эрүүл ахуй зөрчигдөж байгаа эсэх гэх мэтийг шалгана. Барилгын талбайн үзлэг ойролцоогоор 4 цаг үргэлжилдэг.

Гүйцэтгэгч компаниуд гүйцэтгэл авах ажил хүлээлцэх акт гаргасан бол биечлэн шалгаж баталгаажуулдаг. Харин үдээс хойш 17 цагт төслийн хуралд оролцох ёстой. Бид долоо хоногт 1 удаа төслийн хурал зохион байгуулдаг юм.


-Та хийх ажлын жагсаалтаа хэрхэн хөтөлдөг вэ?
Ширээний календарь дээр хөтлөхөд хялбар бөгөөд нүдэнд шууд тусдагаараа амар санагддаг. Үүний зэрэгцээ утасныхаа тэмдэглэл дээр бичээд сэрүүлэг тавих замаар өдөр тутмын төлөвлөгөөгөө хөтлөөд явчихдаг.  

-Хичнээн блок барилгын ажил нэгэн зэрэг явагдаж байна вэ?
 “Ривер Гарден” хотхонд нийт 7 блок секц баригдахаас 3 нь улсын комисст хүлээлгэн өгсөн, дөрөвт нь нь угсралтын ажил ид явагдаж байна. Харин “Тайм Скуэр” төсөл дээр 4 барилгын угсралтын ажил нэгэн зэрэг үргэлжилж байгаа. Үүн дээр нэгдсэн граж болон бусад байгууламж нэмэгдэнэ.

-Одоогоор талбай дээр нийт хэдэн хүн ажиллаж байгаа вэ?
Яг одоогоор бидний байгаа Ривер гарден-2 төсөл дээр 50 орчим компанийн 600 гаруй ажилтан ажиллаж байна.


-Талбайн зохион байгуулалт гэж юу юм бэ?
Барилга угсралтын бүхий л ажил явагдаж буй талбайд холбогдох бүхий л ажил, удирдан зохион байгуулах, чанартай барилга, аюулгүй, эрүүл орчинг зэргийг хэлэх байх даа. Уг үйл явц нь талбайн зохион байгуулалтын зургаар баталгааждаг. Үүнийг захиалагч компани хийж батлуулна. Миний гарт байгаа энэ зураг л даа. Таны харж байгаачлан талбайн зүүн хойно машины дугуй угаах хэсгээр дамжин талбайд машин нэвтрэхээс эхлэн, ажилчдын тамхи татах болон устай ариун цэврийн өрөө, барилгын материал хураалт, хашааны эмх цэгц, ажилчдын эрүүл, аюулгүй байдал зэргийг цөмийг тусгасан байдаг.

-Талбайн хяналтыг ямар үе шаттайгаар хийдэг вэ?
Газар, шорооны ажил хийгдэж дуусахаас эхлүүлээд ханын шавардлагын дараа замаск хийхээс өмнө, хэв хашмал хуулахын тулд бетоныхоо маркийг шалгаж, бэхжилт нь хэдэн хувьтай байгааг шалгасны дараа гэх зэргээр барилгад хийгдэж буй бүх ажлын төгсгөл бүрт хяналт хийж, дүгнэлт тавин, үе шат хариуцсан акт бичгээр харилцан хүлээлцэж, дараа дараагийн ажлуудыг хийнэ.

-Талбайн хяналтын явцад барилгын ажлыг буруу гүйцэтгэсэн тохиолдолд гарвал хэрхэх вэ?
Бид алдаа зөрчил хайхаас илүүтэй, зөрчил гаргахгүйн тулд хянаж, сэргийлж ажиллаж байгаа. Ямар нэгэн зөрчил гарахад алдаатай хийсэн ажил, буулгах явц, дахин шинээр хийх гээд 3 дахин их хөдөлмөр, зардал гарах учир энэ эрсдэлээс аль болох зайлсхийж, нэн түрүүнд гүйцэтгэгч компани, инженер техникийн ажилтнуудтайгаа зөвлөлдөж тухайн ажлаа эхлүүлдэг. Тиймээс энэ төрлийн тохиолдол ховор.


-Ажиллах үедээ бухимдах асуудал гарвал түүнээс хэрхэн ангижирдаг?
Ийм тохиолдолд эхлээд уртаар амьсгаа авч, тайвшрахыг хичээдэг, яагаад ийм зүйл болов гэж боддог. Маргаанд ялахын гол үндэс нь бууж өгөх гэдэг шүү дээ. Иймд нөгөө хүнийхээ оронд өөрийгөө төсөөлж үзэхэд илүүдэхгүй. Аль болох бухимдахгүйг л хичээдэг. 
 
-Танд хамгийн их сургамж өгсөн ажил?
Би барилгын салбарт тасралтгүй 23 жил ажиллахдаа 200 гаруй барилгыг улсын комисст хүлээлгэн өгсөн. Гэхдээ өнөөг хүртэл би өөрийгөө “инженер” болоогүй л яваа гэж боддог. Өөрийгөө голж, удирдлаган дороо ажиллаж байгаа залуучуудаасаа ч суралцаж, надад өдөр болгоны ажил сургамж мэт санагддаг.
Ер нь барилгын зураг төсөл нь тааруу ч түүнийг захиалагч, гүйцэтгэгч, оршин суугчийн өнцгөөс нь харж, сайн гүйцэтгэх талаас нь бодож, хичээж ажиллахад гологдол шилэгдэл бага гарч, хэрэглэгчийн сэтгэл ханамж хүртэл өндөр байдаг.

-Салбарын хөгжилд тушаа болсон зүйл юу байна?
Улс төрийнхөн барилгын салбарт орох явдал. Мэдлэг чадвартай боловсон хүчнийг үл харгалзан бүх томилгоог улс төрийн үүднээс хийдэг байдал сэтгэл эмзэглүүлдэг. Шинэ материал, технологи Монголд нутагшуулах гэхээр өөрсдөө мэдэхгүй мөртлөө болохгүй бүтэхгүй гээд байдаг хэдхэн хөгшин зөвлөхүүдтэй. Барилгын бодлого барьж биднээс олон алхмын урд явах ёстой Барилгын Хөгжлийн Төв нь мөнгөний хойноос хөөцөлддөг аж ахуйн байгууллага болсон нь бүүр харамсалтай.

-Зураг төслөөсөө тэс өөр баригдаж буй барилгуудыг хараад танд төрдөг сэтгэгдэл...
Тэр байтугай ганц цүнхтэй компани хүртэл байдаг шүү дээ. Үнэхээр хэлэх үг олддоггүй. Зарим барилгын захиалагч компаниуд гүйцэтгэгчээ сонгохдоо нарийн судлаагүй, өнөө маргаашийн хямдыг нь бодож авч ажиллуулчихаад, “Хазгай муруй хийчихлээ, одоо хэрхэх вэ” гэсэн нөхцөл байдалтай бишгүй л таардаг. Барилгыг муу барьсан бол учрах хор уршиг нь асар их учир дээрээс Бурхан харж байгаа гэж бодон ажилдаа сэтгэл гарган хийх нь чухал юм.
Нөгөөтэйгүүр салбарын их, дээд сургуулиудын сургалтын хөтөлбөрт орсон хичээлүүд, зааж байгаа зүйлс бодит байдалтай нийцэх нь ховор, хоцрогдсон арга барилаар явж байгаа.


-Тийм бол танд салбарын хөгжилд хурд нэмэхүйц ямар санал, санаачилга байна?
Тухайн барилгын ханан дээр нь зураг төслийн болон барьсан инженерийн нэрийг зурагтай нь хадах хэрэгтэй санагддаг. Үүнийгээ нэг стандартад оруулан улс орон даяар мөрддөг байх. Ингэснээр тухайн хүний нэр бичигдэх учраас барилга улам чанаржих болно гэж үзэж байна.

-Нэг бодлын барилгачдаа алдаршуулах юм байна даа.
Тийм. Хийсэн бүтээснээ бусдад үзүүлсэн, дурсамжтай сайхан ажил болно.

-Барилгачид гэдэг үнэхээр даруухан улс шүү. Баригдсан барилгын сайхныг магтахаас бус барьсан хүмүүсийг нь хэн ч мэддэггүй, чимээгүй сууж байдаг.
Тийм шүү. Тийм хүмүүс дэндүү олон юм даа.

-Та өөрийн бодол, үнэлэмжээр өнөө цагийн Монголын шилдэг инженерүүдийг нэрлээч гэвэл?
“Тулга проект” ХХК-ийн захирал Г.Тулга, “S Development” ХХК-ийн инженер Ч.Баасансүрэн, ШУТИС-ийн багш М.Сугар, “Улаанбаатар барилга” ХХК-ийн Ерөнхий инженер Г.Чулуут нар байна. Бүгдээрээ манай ангийнхан л даа. /инээв/ Мөн “ЭНЭ” ХХК-ийн захирал Г.Намсрай гуай, “Эрчим төсөл” ХХК-ийн инженер А.Цогт гээд авьяас чадвараараа шигшигдсэн хүмүүс олон бий.

-Залуучуудад хандаж хамгийн чухал гэсэн зөвлөгөөг өгвөл?
Залуучуудад хандаж хэлэхэд гадаад хэлний мэдлэг боловсролоо байнга дээшлүүлж, мэргэжилдээ эзэн болж, эрүүл чийрэг байхыг зөвлөж байна.


         
          Бид бүхэн барилгыг гайхамшигтай хэмээн бахдан биширдэг атлаа түүнийг бариулсан энгүй барилгачдыг огт мэддэггүй. Тэдгээрийг олонд таниулах, алдаршуулахыг гол зорилгоо болгосон “Ажлын нэг өдөр” булантай хамт байдаг уншигч та бүхэнд баярлалаа.