Нийслэл хотын өнгө төрхөд үзэмж нэмэх, иргэдийн тав тухтай байдлыг бүрэн хангахуйц “Авто машингүй гудамж” төслийн ажлыг эхлүүлж байна. СБД-ийн 4-р хороонд, Хичээнгүй сайд Б.Цэрэндоржийн гудамжны цэцэрлэгт хэрэгжүүлэх төслийг Нийслэлийн засаг даргын тамгын газраас санаачлан, Монголын барилгын үндэсний ассоциаци болон “БҮТИ” компани гүйцэтгэгчээр ажиллахаар болжээ.

  Өнөөдөр “Авто машингүй гудамж” төслийн ажлыг албан ёсоор эхлүүлж, хамтран ажиллагч талууд тууз хайчилсан юм. Төслийн хүрээнд 11,000 м.кв талбайд газрын гадаргуу дээр оршин суугчдыг ая тухтай орчин нөхцөлөөр хангах ногоон байгууламж бүхий тохижилт, газрын 0 тэнхлэгээс доош олон нийтийн үйлчилгээний байгууламж барихаар төлөвлөжээ.

  Нээлтийн ажиллагаанд хотын захирагч С.Батболд, МБҮА-ийн Тэргүүн дэд ерөнхийлөгч Н.Баярсайхан, Гүйцэтгэх захирал Л.Хулан болон УЗ-ийн бусад гишүүд, төлөөлөгчид оролцлоо.

НЗД бөгөөд Улаанбаатар хотын захирагч С.Батболд:



Төр ба хувийн хэвшлийн хамтран хэрэгжүүлж буй тус төсөлд барилгын салбарын төрийн бус мэргэжлийн байгууллага, холбоод оролцож, нийслэл хотдоо хөрөнгө оруулалт хийж буйгаараа ихээхэн онцлогтой. Хичээнгүй сайд Б.Цэрэндоржийн гудамж нь өөрөө хотын төв хэсэг. Тиймээс энэ хэсгийг иргэд, жуулчдын ая тухыг хангасан газар доорх байгууламж бүхий, дээрээ тохижилттой авто машингүй гудамж болгоход маш тохиромжтой. Төсөлд хамтрагч талууд харилцан тохиролцож гарын үсэг зураад, зураг төслийг нь боловсруулж, НХТЕТГ-аар батлуулж, хэрэгжүүлэхэд бэлэн боллоо.

Энэ хэсгийг Зүүн Хойд Азийн аялал жуулчлалын бүс болох зорилтын хүрээнд Сөүлийн гудамжтай нийлүүлж, авто машингүй болгохоор зорьж байна. Энд жуулчдад зориулсан арга хэмжээнүүдийг зохион байгуулах боломжтой.

МБҮА-ийн УЗ-ийн гишүүн, “БҮТИ”ХХК-ийн Ерөнхий захирал Г.Батжаргал:



Энэ нь нэг талаас НЗДТГ, нөгөө талаас МБҮА гэсэн төр ба хувийн хэвшлийн хоёр байгууллагын хамтран хэрэгжүүлж буй анхны том төсөл болох гэж байна. Монгол улсын аялал жуулчлалын салбарыг хөгжүүлэхийн тулд гадаадын жуулчид болон иргэд, ард түмэндээ зориулахын зэрэгцээ ажлын байрыг бий болгож, гэрэлт гудамжаа улам тэлсэн ихээхэн ач холбогдолтой төсөл юм.

“БҮТИ”-ийн хувьд салбартаа 14 жилийн туршлагатай, хамгийн сүүлд Хөшигийн хөндийн онгоцны буудал дахь барилга угсралтын ажлаас 90 гаруй хувийг нь амжилттай гүйцэтгэсэн.

Харин энэ төсөлд МБҮА-ийн гишүүн болох 30-40 компани нэгдэж ажиллана. Төсөл нь нийт  260 гаруй метр урт талбайг эзлэх ба Улсын их дэлгүүрээс АСА цирк хүртэл нүхэн гарц барина. Өөрөөр хэлбэл гурван том цогцолборыг холбож чадсан сайхан төсөл болох юм. 80 м урт, 40 м өргөнтэй 3-4 блок барилгаар уг төсөл хязгаарлагдаж байгаа. Төсөл одоо буюу энэ онд үндсэн ажлаа эхлүүлж, 11 сард эхний блокыг дуусгаж, үлгэр жишээ үзүүлэхээр зорьж байна.