Гэр хорооллыг бүрэн барилгажуулахад багадаа 60 жил шаардагдана. Одоогоор энэ хугацааг дөтлөх дэлхий нийтэд болон манай улсад хэрэгжихээр төлөвлөгдсөн хамгийн шилдэг жишиг нь “Сервис центр” юм. Уг төсөл иргэдийн дунд дуулдаад нэлээд жилийг ардаа үдээд байсан ч энэ хавраас албан ёсоор хийж хэрэгжүүлэхээр нийслэл ам гарч, бичиг цаасны ажил үндсэндээ цэгцэрчээ.

Тодруулбал, нийслэлийн хоёрдугаар бүс буюу нам болон дунд давхрын амины орон сууцны бүсэд инженерийн шугам, сүлжээ очих боломжгүй байршлуудад “Сервис центр” инженерийн дэд бүтэц бүхий төвийг байгуулах юм. Барилга хот байгуулалтын яам, нийслэлийн Засаг даргын Тамгын газар, нийслэлийн Гэр хороолол дэд бүтцийн газрууд саналаа нэгтгэн 2020 он хүртэл 100 орчим Сервис центр буюу инженерийн дэд бүтцийн төвийг байгуулан, 20000 орчим өрхийг хамруулах боломжтой гэж үзжээ. Энэ нь 200-300 өрхийн дунд нэг Сервис центр гэсэн ойлголт юм. Үүнийг Гэр хорооллын дэд бүтцийн хөгжлийн газар хариуцаж буй.

Сервис центр дотор байрлах дулааны технологи нь байгалийн хий буюу газз, гүний дулаан ашигласан, цэвэр усыг гүний худаг ашигласан, бохирын системийг байгаль орчинд ээлтэй технологи төдийгүй саарал усны систем ашиглан барьж байгуулах боломжтой.


        Үүнтэй зэрэгцэн 2015 онд батлагдсан “Хот суурин газар дахин хөгжүүлэх” тухай хуулинд заасан газар дахин зохион байгуулах тухай ойлголт яригдана. Одоогийн гэр хорооллын бүсүүдэд гудамжны тохижилт, хаяглалт дутмаг байдаг. Эдгээр нөхцөл байдлыг шинэчлэн, нэгэн хэвийн амины орон сууц, нам буюу дунд давхрын орон сууцны хороолол болгон хөгжүүлэх төлөвлөгөөтэй байна.

          Одоогийн байдлаар ТЭЗҮ нь боловсруулагдсан, ажил нь үргэлжилж байгаа бөгөөд Нийслэлийн Засаг даргын орлогч П.Баярхүү “Ирэх хавар Сервис центр байгууламжийн барилгын ажлыг эхлүүлнэ” хэмээн амлаж байна.