Европ технологийг Монголдоо амжилттай нутагшуулж, барилгын туслах материалын олон салбарыг нэг дор цогцлоосон, дотоодын 100 хувийн хөрөнгө оруулалттай, үндэсний үйлдвэрлэгч “Юмэко” компанийг онцолж, Гүйцэтгэх захирал Я.Нарантуяаг урьж ярилцлаа. Тэрээр ХБНГУ-д суралцаж байхдаа аливаа бүтээгдэхүүнийг үйлдвэрлэхдээ тоонд бус, чанарт нь анхаарах ёстойг ягштал ойлгож, тэр хэрээрээ өндөр шаардлага тавьж үйлдвэрлэлээ явуулж хэвшил болгохын төлөө ажиллаж буй нэгэн ажээ.
Ингээд түүний ярилцлагыг хүргэе.

- Хэчнээн төрлийн, ямар бүтээгдэхүүнүүдийг зах зээлд нийлүүлж байна вэ?

- Манай “Юмэко” ХХК нь тавилга үйлдвэрлэл, хөнгөн ган хийц (си хэлбэрийн профиль хийц), цонх, хаалганы үйлдвэрлэл гэсэн 3 чиглэлээр, нийт 90 гаруй ажилтантайгаар үйл ажиллагаагаа явуулдаг, үндэсний үйлдвэрлэгч компани юм.

Цонхны үйлдвэр маань 2009 онд байгуулагдаж, ХБНГУ-ын “Elumatec” компанийн ELUMATEC маркийн бүрэн автомат тоног төхөөрөмжөөр хуванцар болон металл цонх, хаалга, шилэн фасад үйлдвэрлэж, Ривер Гарден, Тайм Скуэр, Цэцээ гүн, Дипломат, Jarden Village, Jarden Tower, River Stone, Гэгээнтэн зэрэг хотхонд амжилттай нийлүүлсэн.

Бид Монгол орны эрс тэс уур амьсгалд зохицсон, өндөр чанартай, дулаан тусгаарлалт сайтай цонх үйлдвэрлэхээр судалгаа хийсний дүнд Германы тэргүүлэгч, хуванцар цонхны түүхий эд нийлүүлэгч “Саламандер”, тоноглол цоож үйлдвэрлэгч “Зигэниа” брэндийг сонгож, зорьсон бүтээгдэхүүнээ гаргаж, хэрэглэгчиддээ хүргэж чадлаа. 

Цонх нь дулаан алдагддаг гол хэсэг тул хэрэглэгч хамгийн чанартайг, ялангуяа сайн чанарын ган хүчитгэгчтэй, EPDM резинтэй, олон жилийн эдэлгээнд тэсвэртэй нугас цоож, аюулгүй байдлыг хангасан нэмэлт тоноглолуудтай, ялаа шумуулын тор, дулаан сайн тусгаарлах тусгай шил бүхий цонхыг гэртээ суулгаж байж халаалтын зардлаа онцгой хэмнэж, тав тухтай амьдрах боломжоо бүрдүүлнэ шүү дээ.

- Тэгвэл чанартай, сайн цонх сонгохдоо юунд анхаарах ёстой вэ?

- Өндөр чанартай цонх сонгох нь үл хөдлөх хөрөнгийн үнэлгээг өсгөх сайн талтай. Иргэд орон сууц худалдан авахдаа барилгын ерөнхий хийц, цонх, сантехникийн материал зэргийг чухалчилж, сонголтоо хийдэг гэсэн судалгааны дүн гарсан байсан.

Өнөө үед том саруул цонхтой амины сууц болон орон сууцны барилгууд түлхүү баригдаж буйтай холбогдуулан хэрэглэгчдийн хэрэгцээ шаардлагад нийцүүлэн, металл цонх, хаалга үйлдвэрлэж байна. Металл цонхны давуу тал нь хуванцрыг бодвол бөх бат байдгаас гадна ашиглалтын хугацаа урт байдгаараа онцлогтой.

Харин манай зах зээл дээр уг шалгуурт нийцэх бүтээгдэхүүн төдийлөн үйлдвэрлэж чадахгүй байна. Ихэвчлэн гадны орнуудад захиалгаар хийлгэн, авчирч суурилуулдаг.  Харин манай компани уг асуудлыг шийдэх зорилгоор Европоос манай орны уур амьсгал, онцлогт тохируулсан түүхий эд, материалыг захиалан авчирч, хүйтэн сэрүүний улиралд таны тав тухыг бүрэн хангахуйц металл цонх, хаалга, фасадыг өөрсдөө үйлдвэрлэж эхэлсэн.

Ингэхдээ Европын металл цонх, фасадны түүхий эд үйлдвэрлэлээр тэргүүлэгч “Алупроф” компанийг сонгож, албан ёсны төлөөлөгчийн гэрээ байгуулан ажиллаж байна. Дэлхий нийтийн чиг хандлагыг ажиглаж байхад, хуванцар гэхээсээ илүүтэй металл цонх, хаалгыг сонгон ашиглах нь нийтлэг болсон.

- Танай хөнгөн ган хийцийн үйлдвэрлэлийн тухайд...

- Манай компани 2013 онд улс орныхоо бүтээн байгуулалт, барилга угсралтын ажилд хувь нэмрээ оруулах, дотоодын үйлдвэрлэлийг хөгжүүлэх үйлсэд гар бие оролцохоор барилгын дотор ханын ажилд чухал хэрэгцээтэй “си” хэлбэрийн профиль хийц буюу хөнгөн ган хийцийн үйлдвэрлэлийг байгуулсан.

“Си” профиль хийцийн үйлдвэрт АНУ-ын “Pinnacle LGS” компанийн машин тоног төхөөрөмжийг ашиглаж, 75, 89, 150 мм-ийн зузаантай хөнгөн ган хийц хэвлэж, дотор хана, зөөврийн ажлын байр, харуулын бутик, 1-3 давхар амины орон сууцны карказ зэргийг “Номин констракшн”, “Эрдэнэт Орчлон”, “Эрдэнэ Ремикс”, “Мунчулуу” зэрэг барилгын компаниудад нийлүүлж байна.

Уг технологийг 1-3 давхар хүртэлх барилгын карказ, барилгын өргөтгөл, өрөө хоорондын тусгаарлах хана хийхэд өргөн ашигладаг. Өрөө хоорондын ханыг хийхдээ барилгын талбай дээр урьдчилан хэмжээ авч үйлдвэрлэдэг тул угсрахад хялбар, цаг хугацаа хэмнэсэн, ажиллах хүчний зардал багатай, зузаан бат бөх чанартай болдгоороо давуу талтай. Бид дотоодынхоо барилгын салбарын тэргүүлэгч компаниудад өрөө хоорондын ханын карказан бэлдцийг нийлүүлж, хамтын ажиллагаа маань өргөжсөөр байна. 

Түүнчлэн амины орон сууц, дэлгүүр, цэцэрлэг, оффис, амралтын газрууд зэрэг 1-3 хүртэлх давхар бүхий барилгуудын карказ үйлдвэрлэдэг. Энэ нь Канад технологийн барилгатай төстэй ч, модны оронд хөнгөн ган төмөр бэлдэц ашигладаг, галд тэсвэртэй, хорхоо шавжид идэгдэхгүй, бат бөх чанараараа ялгаатай. Уг технологиор барилга барихад цаг хугацаа хэмнэсэн, ажиллах хүчний зардал бага, төв суурин газраас алслагдсан газар барих боломжтой, байгальд ээлтэй, орон зайг хүссэнээрээ шийдэх боломжтой, тээвэрлэж угсрахад хялбар, материалын сонголт ихтэй, жилийн аль ч улиралд барих боломжтой зэрэг олон давуу талтай.

- Тавилгын үйлдвэрлэлийнхээ онцлог, давуу талаас хуваалцахгүй юу?

- Бид ХБНГУ-ын “Homag Group”-ийн HOMAG брэндийн тоног төхөөрөмжийг сонгон суурилуулсан. Үйлдвэр ашиглалтад орсноос хойш 2014-2015 онд Төв аймгийн Баян суман дахь цэцэрлэгийн иж бүрэн тавилга, ариун цэврийн өрөө болон гал тогооны тавилга үйлдвэрлэж, мөн Ривер Гарден, Тайм Скуэр, Цэцээ Гүн, Дипломат хотхонуудад нийлүүлсэн.

Манай компани 2009 оноос барилгын туслах бараа материал үйлдвэрлэл явуулж эхэлсэн бөгөөд Германы хамгийн сүүлийн үеийн тоног төхөөрөмж, түүхий эд материалыг ашигладгаараа бусад үйлдвэрүүдээс ялгаатай.

Бид тавилгын зах зээлд хөл тавихаас багагүй хугацаанд судалгаа хийж, гадны мэргэжилтнүүдтэй хамтран ажилласны дүнд шинэлэг загвар, түүхий эд материалаар дахин давтагдашгүй тавилга үйлдвэрлэж, хэрэглэгчдэд өндөр чанартай, хүний эрүүл мэндэд сөрөг нөлөөгүй материалаар хийсэн бүтээгдэхүүн нийлүүлж, зах зээлд өөрийн гэсэн байр суурьтай болж чадсандаа баяртай байдаг. 

Айл өрхүүд тавилгаа төдийлөн ойрхон хугацаанд солиод байдаггүйгээс бат бөх, загвар нь хуучрахгүй, олон жилийн эдэлгээ даах, үнэ цэнээ алдахгүй тавилгыг захиалан авахыг хүсдэг. Тухайн үед хэрэглэгчдийн хэрэгцээ шаардлагыг бүрэн хангахуйц үйлдвэрлэгчид их ховор байсан. Чанар сайтай тавилгуудыг гадны орнуудаас захиалгаар авчирдаг компаниудтай чанараар өрсөлдөх, гадагшаа урсах мөнгөн урсгалыг дотооддоо авч үлдэх, ажлын байрыг олноор бий болгох зорилгоор тус тавилгын үйлдвэрээ анх байгуулсан, одоо ч энэ л зорилгоо биелүүлэхийн төлөө хичээн ажилласаар байна. 

Одоогоор Ривэр Гарден хотхон, Мишээл Экспод өөрсдийн загварын байраа нээгээд байна. Манай үзэсгэлэнгийн танхимуудаар зочилсон хэн бүхэн Европ чанар, тав тухыг мэдрэх болно шүү.
-
Шинэ технологийг нэвтрүүлж, үйлдвэрлэлээ явуулахдаа ажилтнуудынхаа мэдлэг, ур чадварыг хэрхэн уялдуулж байна вэ?

- Ажиллах хүчнийхээ чадамжийг дээшлүүлж, өрсөлдөхүйц мэдлэг чадвартай болгох зорилгоор Герман, Орос, Польш зэрэг орнуудаас мэргэжилтнүүдийг тогтмол урьж, сургалт явуулдаг. Зах зээлийн өрсөлдөх чадвараа нэмэгдүүлж, шинэ бүтээгдэхүүн үйлчилгээ, технологийг нэвтрүүлэн ажилладаг бидний хувьд байнга шинэчлэл хийх шаардлага тулгарч байдаг.

Эдийн засгийн хямрал, хүндрэл нүүрлээд буй жилүүдэд үндэсний үйлдвэрлэгчийн хувьд манай “Юмэко” компани зах  зээлийн хөгжилд чадах чинээгээр өөрийн хувь нэмрийг оруулж, тасралтгүй тогтмол үйл ажиллагаагаа явуулж, үйлдвэрлэлээ өргөжүүлж, шинээр ажлын  байрыг бий болгон нийгмийн хариуцлагаа биелүүлэн ажиллаж байна.

Төр засгаас үйлдвэрлэгчдээ дэмжсэн бодлого барьж байгаа ч, дотоодод үйлдвэрлэл эрхэлдэг, үндэсний үйлдвэрлэгч аж ахуйн нэгжүүдийг  дэмжих  бодлогыг  улам эрчимжүүлж, гаднаас импортоор оруулдаг бэлэн бүтээгдэхүүний татварыг нэмэгдүүлэх шаардлагатай юм. Жишээлбэл, чанар муутай хаалга, цонх зэргийг гаднаас бэлэн оруулж ирдэг татварыг нэмэх замаар зах  зээл,  үйлдвэрлэгчдээ, цаашилбал улс орныхоо эдийн засгаа хамгаалсан хууль тогтоомжууд олныг гаргаасай гэж хүсэж байна.

Эдийн засаг бат бөх байхын үндэс нь Дотоодын үйлдвэрлэл шүү дээ.
 
Танд баярлалаа. Бүтээн байгуула, үйлдвэрлэх их үйлсэд тань өндөр амжилт хүсье.