Номонд дурлагсдын мөрөөдлийг биелүүлсэн нэгэн гайхалтай бүтээн байгуулалтыг Иранчууд хийжээ. Тус улсын Тегеран хотноо дэлхийн хамгийн том номын дэлгүүрийг байгуулсан байна. “Book Garden” дэлгүүрийн барилгын ногоон дээвэр нь 14,307 м.кв талбайтай бөгөөд дотор талдаа 1,6 км үргэлжлэх олон сая ном бүхий тавиуруудтай аж.

  Энэхүү төсөл нь 65,032 м.кв талбайд хэрэгжүүлэх кино театр, шинжлэх ухааны болон сургалтын танхимууд, залбирлын өрөө, зоогийн газар зэргийг багтаасан томоохон цогцолбор бүтээн байгуулалтын нэгээхэн хэсэг нь юм.
“Book Garden” төв нь Иран хүүхдүүдийг орчин үеийн шинжлэх ухаан, техник технологийн мэдээллээр хангаж, тэдний боловсролд хувь нэмэр оруулах зорилгоор байгуулагдаж байгаа гэдгийг Парламентын дарга Али Ларижани хэллээ.



  “Энэхүү номын төвийг нээсэн явдал нь Иран улсын хувьд соёлын маш том арга хэмжээ болж байна. Хүүхдүүд маань соёлын болоод академик боловсрол эзэмших боломжтой боллоо” хэмээн Тегеран хотын дарга Мухаммад Бакир Калиб мэдэгджээ.



  “Book Garden” төвийг байгуулах санаа анх 2004 онд Тегераны Олон улсын номын үзэсгэлэн худалдаан дээр яригдаж байжээ. Барилгын ажил нь өнгөрөгч хавар дууссан бөгөөд сүүлийн хэдэн сард зохион байгуулагчдын зүгээс ном хэрэгслээр баяжуулах ажлыг хийсэн байна. Зөвхөн бага насны хүүхдүүдэд л гэхэд 400,000 нэр төрлийн ном байгаа аж. Тэдэнд зориулсан хэсэгт намхан тавиуруудыг тавьж, өөрсдөө хүссэн номоо авч чадахаар тав тухтай орчинг бүрдүүлжээ.



  “Book Garden” нь дэлхийн хамгийн том номын дэлгүүр гэдгээрээ Нью-Йоркийн Тавдугаар өргөн чөлөөнд байрлах “Barnes & Noble” төвийг ардаа орхиж, Гиннесийн дэлхийн дээд амжилтыг тогтоогоод байна.