Орон сууцтай болохоор зэхэж, хаанаас хэрхэн мэдээлэл олж авахаа мэдэхгүй эргэлзэж суугаа уншигч та бүхэндээ хэрэгтэй 10 зөвлөмжийг хүргэе.

  Олон газраар явж цаг алдалгүйгээр, хүч хөдөлмөрөө зориулан байж хуримтлуулсан мөнгөөрөө эдэлгээ даах сайн чанартай, ирээдүйд үнэ цэнээ хадгалах байршил сайтай, боломжийн үнэ ханштай, ашиглалтын зардал багатай байр худалдан авахын тулд та сайтар тунгааж, сэтгэлийн хөөрлөөр бүү хандаарай. Орон сууц гэдэг хүний бүхий л амьдралынхаа туршид ганц, хоёрхон удаа худалдан авдаг онцгой бүтээгдэхүүн юм.

  Тиймээс мэргэжлийн хүний зөвлөгөөг дагаж, гэр бүлээрээ тав тухтай амьдарч, сайн сайхан амьдралын орчныг бүрдүүлэх тийм л байрыг худалдан авахыг хүсч байгаа бол та:

1. Мэдээллийн оновчтой эх сурвалж олох

Та хаанаас хамгийн хялбар аргаар олон байрны мэдээлэл авч болох талаар танилуудаасаа, бусад эх сурвалжуудаас асууж мэдээлэл цуглуул. Байр хайж, худалдан авах үйл явц нь ямар процессоор явагддагийг мэдэхийн тулд саяхан байшин, орон сууцтай болсон хүмүүсээс, эсвэл мэргэжлийн реалтороос асууж зөвлөгөө авч болно. Мөн салбарын мэргэжлийн хэвлэл, вэб сайтуудаас ч мэдэх боломжтой шүү дээ.

2. Байршлаа оновчтой тодорхойл

Сонгосон байршилд тань ажил, сургууль, цэцэрлэг байгаа эсэх, автобусны буудал, хүүхэд тоглох талбай, салхилаад суух газар, ногоон байгууламж, дэлгүүр, үзвэр үйлчилгээний газруудтай хэр ойр байрладаг зэргийг харгалзан үзэж байж тохиромжтой байршлыг сонгоно.

3. Санхүүгийн боломжоо судлах

Байраа ипотекийн болон бусад төрлийн зээлээр авах гэж байгаа бол банкны зээлийн эдийн засагч таны ямар үнэтэй орон сууц худалдаж авах боломжтойг урьдчилгаа төлбөр болон орлогын мэдээлэлд тань үндэслэн хэлж өгнө. Ингэснээр та өөрийн худалдан авах боломжит байраа хайж, цаг заваа хэмнэх болно.

4.  Орчин тойрноо судал

Та сонгосон байрныхаа ойр хавийг судалж хүсэл, хэрэгцээнд тань тохирох эсэхийг шалга. (Агаарын бохирдол, гудамжны тохижилт, тоглоомын талбай, зогсоол, халаалт, лифт, СӨХ-ийн үйлчилгээ гэх мэт). Хамгийн гол нь тухайн байранд амьдардаг хүмүүстэй ярилцаж сэтгэгдлийг нь сонсож болно. Ингэсэнээр та гэр бүлийнхээ хамтаар тайван амгалан, тохь тухтай амьдрах боломжоо бүрдүүлж чадна.

5. Үл хөдлөх хөрөнгийн мэргэжилтнийг сонс

Тэд тухайн хүний санхүүгийн боломж болон хэрэгцээ шаардлагад нь тохирохуйц байр, сууц хаана байгааг хамгийн сайн мэддэг хүмүүс. Орон сууцны зах зээлийн үнэ хаана, ямар ханштай байгааг реалторууд л сайн мэдэх тул таныг хэт өндөр үнэтэй байр авахаас сэргийлж чадна. Сайн реалтор хамгийн мэргэн туслагч байж чадна.

6. Бусад зардлыг битгий март

Таны худалдан авах гэж буй сууц хуучин байр уу, эсвэл ганцхан блок уу, хотхон юм уу гэдгээс шалтгаалаад ашиглалтын зардал нь өөр өөр байдаг. Тиймээс СӨХ, дулааны төлбөр, татвар, бусад урсгал зардалд тогтмол төлдөг шимтгэлүүдийг судалж мэдэх хэрэгтэй.

7. Мэргэжлийн шинжээчээр байраа шалгуул

Тухайн байр Монгол Улсын норм стандарын дагуу баригдсан уу, ямар материал ашигласан, тухайн орон сууцны хэмжээ, хийц, сантехник, цахилгааны холболт, дотоод заслыг хэрхэн хийж гүйцэтгэсэн гээд өөрөө шалгаж мэдэхгүй зүйлсээ мэргэжлийн байгууллага, хүмүүсээр шинжлүүлж зөвлөгөө авах нь мөн л байраа зөв сонгох чухал алхмуудын нэг юм.

8. Бичиг баримтыг шалга

Тухайн орон сууцны гэрчилгээ өмчлөгчийн мэдээлэл, барьцаанд байгаа эсэх, СӨХ, цахилгааны төлбөрөө барагдуулсан эсэхийг мэд. Шинэ орон сууц бол улсын мэргэжлийн комиссын дүгнэлт гарсах эхэх, дуусаагүй бол холбогдох зөвшөөрөл, гүйцэтгэгч, захиалагчийн мэдээллийг шалгаж гүйцэтгэгч байгуулгыг судалж мэд

9. Орон сууцны зээлийн төрлөө сонго

Манайд үйл ажиллагаа явуулж байгаа арилжааны банкууд орон сууцны болон ипотекийн зээл гаргаж байгаа. Үүнээс өөрт хамгийн тохиромжтой зээлийн төрлөө сонгож, эдийн засагчаас зөвлөгөө аваарай. Танд гэж хэлэхэд 1980 оноос хойш ашиглалтад орсон, 80 м2-аас доош талбайтай байр найман хувийн зээлд хамрагдах боломжтой байгаа шүү.

10. Байраа худалдаж авахад бэлтгэ

Банкнаас зээл авч байраа худалдаж авахад бусад зардал (зээлийн шимтгэл, татвар, нотариат, даатгалын төлбөр гэх мэт) гарах тул түүнд бэлтгэж, шаардлагатай урьдчилгаа мөнгө бэлэн байлга.