Монгол Улсын засгийн газар, Барилга хот байгуулалтын яам, Нийслэлийн засаг даргын тамгын газраас хамтран хэрэгжүүлж буй “Ногоон нуур” орон сууцны хорооллын шав тавих ёслолын арга хэмжээ боллоо.

  Төслийн хүрээнд 5.3 га газарт иж бүрэн цогцолбор хорооллын төсөл хэрэгжүүлэх бөгөөд эхний ээлжинд 3.8 га газарт нь 1008 айлын орон сууц, 960 хүүхдийн сургууль, 240 автомашины зогсоолыг авто болон явган хүний зам, хүүхдийн тоглоомын талбай, ногоон байгууламжтай нь байгуулах юм.

  2017 оны өнгөрсөн 5 дугаар сард Монгол улсын Ерөнхий сайд Ж. Эрдэнэбатын БНХАУ-д хийсэн албан ёсны айлчлалын хүрээнд БНХАУ-аас 2 тэрбум юань буюу 350 сая ам.долларын буцалтгүй тусламжийг үзүүлэхээр шийдвэрлэсэн билээ. Тус буцалтгүй тусламжийн хөрөнгийг бүхэлдээ агаар, хөрсний бохирдолтой тэмцэх, гэр хорооллын дахин төлөвлөлт, инженерийн дэд бүтцийн шугам сүлжээний ажилд зарцуулахаар шийдвэрлэсэн юм. Үүнээс эхний ээлжинд 70 сая ам.долларыг гэр хорооллын дахин төлөвлөлтийн төсөлд зарцуулахаар Засгийн газрын хуралдаанаар шийдвэрлэжээ.

 Төслийг хэрэгжүүлэх, гүйцэтгэх бүтээн байгуулалтад дотоодын үйлдвэрүүдийн барилгын материалыг ашиглаж, Монгол компаниуд, ажилчдыг оролцуулах аж.

  Тухайлбал, МБҮА-ийн гишүүн, гэр хорооллын дахин төлөвлөлтийн төсөл хэрэгжүүлэгч “Грийн ресурс констракшн”, “Бүрд констракшн”, “Бармон”, “Цагаан хуаран консалтинг”, “Заг групп”, “Жигүүр гранд групп” зэрэг компани, аж ахуйн нэгжүүд уг төсөлд оролцож байгаа юм.