Интернэт маркетинг, онлайн зах зээл эрчимтэй хөгжиж буй энэ үед барилгын салбарт дижитал маркетингийг хэрхэн ашиглах тухай “Greensoft” ХХК-ийн Захирал Э.Амартай сонирхолтой ярилцлага өрнүүллээ.

- Юуны өмнө интернэт хэрэглээ, онлайн зах зээлийн хөгжилтэй холбоотой хамгийн сүүлийн үеийн мэдээллээсээ хуваалцахгүй юу?

- Сошиал медиа, дижитал хувьсал гарснаар хүмүүсийн өдөр тутмын амьдралд асар их өөрчлөлт орж байгаа. Үүнийг дагаад бизнесийн байгууллагынхан цахим орчинд маркетингаа явуулах зайлшгүй шаардлагатай болж байна. Ялангуяа жижиг, дунд бизнес эрхлэгчид маркетингаа томоохон байгууллагуудтай дүйцэхүйц хэмжээнд маш бага зардлаар, өргөн далайцтай хийх боломжтой болсноороо давуу талтай. Дижитал бизнес өдрөөр биш, цагаар маш хурдацтай хөгжиж байна. Бизнесийн байгууллагууд мөр зэрэгцэн алхаж, энэ хурдыг гүйцэж чадахгүй бол ирээдүйд хаалгаа барихад хүрнэ.

- Онлайн салбар асар хурдтай хөгжиж буй энэ үед вэб сайт хэр хугацааны давтамжтайгаар шинэчлэгдэж байх ёстой юм бол оо?

- Ер нь статик вэбсайтын үе буюу вэб 1:0 гэж ойлголт байсан. Нэг хэсэг байгууллага болгон л өөрийн гэсэн гоё сайттай болж байсан үе л дээ. Үүний дараа вэб 2:0 ойлголт гарснаар хүмүүс вэбийг зүгээр үздэг байсан бол өөрсдөө оролцдог болсон. Энэ давалгаа нь дэлхийн бусад орнуудын хувьд аль хэдийн дуусчихсан, харин манайд бол вэб сайтууд нь ердийн нэг онлайн танилцуулга төдий хэвээрээ байна. Гэтэл олон улсын хэмжээнд вэбүүд дараагийн үедээ хэдийн орчихсон. Тухайлбал, хэрэглэгч тухайн сайтад нэвтрээд нэг барааг үзэж байх үед борлуулалтын менежер нь шууд залгаж, бараагаа сурталчлан, хэрэглэгчийн хүссэн асуултад хариулт өгдөг болсон. Яг л дэлгүүрт ороход худалдагч угтаж аваад бараагаа тайлбарлаж байгаа мэт. Тэгэхээр манай бизнес эрхлэгчид вэб сайтыг танилцуулгын түвшинд биш бодит үйлчилгээнд нэвтрүүлж ажиллах цаг болсон.

Вэб нь цаг үеэ дагаад байнга, өдөр тутам шинэчлэгдэж байх ёстой. Вэбүүдийн хувьд шинэчлэлтүүдийг хэсэг хугацааны дараа хийх нь өндөр зардалтай, ажиллагаа ихтэй, цаг хугацаа их шаардсан ажил болдог. Бидний хамгийн сайн мэдэх жишээ Фейсбүүк байна. Фейсбүүк шинэчлэлт хийхдээ огцом өөрчлөлт хийдэггүй, аажмаар өөрчилж байдаг. Нэг өглөө сэрээд харахад л нэг “баттон” нэмэгдчихсэн, өөр нэг өдөр шууд бичлэг хийдэг болчихсон байх жишээтэй. Энэ мэтчилэн өөрчлөлтийг аажмаар, алхам алхмаар хийж байдаг. Богино хугацаанд харахад өөрчлөлт нь мэдрэгдэхгүй, жилээр нь авч үзэхэд маш их өөрчлөгдсөн байдаг.

- Тэгвэл барилгын салбарт бизнесийг хэрхэн автоматжуулах вэ?

- Байгууллагуудын ирээдүйд өрсөлдөх чадварыг үлэмж нэмэгдүүлэхийн тулд бизнесийн автоматжуулалтыг оновчтой ашиглах хэрэгтэй. Ялангуяа барилгын салбарт хэрхэн уялдуулах тухай ярья л даа. Жишээлбэл: Үл хөдлөх хөрөнгийн нэгэн компанийн реалторууд өглөөнөөс авахуулаад цайны цаг хүртэлх хугацааг борлуулж буй үл хөдлөх хөрөнгүүдээ Фейсбүүкийн зарын группуудэд түгээхэд зарцуулдаг. Харин үдээс хойших хугацааг гадуур өнгөрүүлж, байр үзүүлэх, худалдан авагчдыг дагуулж явахад зориулдаг. Гэтэл үдээс өмнөх тэр дөрвөн цагийг мэдээлэл түгээхэд зарцуулна гэдэг хайран хугацаа. Энэ ажлыг хөнгөвчилж, вэбээс холбогдох мэдээллийг Фейсбүүк группуудэд автоматаар түгээдэг шийдлийг хийх боломж бий.

Ер нь хаана, ямар ажил дээр хамгийн их хугацаа алдаж байгааг тодорхойлж түүнийг нь мэдээллийн технологийн тусламжтайгаар хэрхэн автоматжуулж, цаг хэмнэж болох талаар судлах хэрэгтэй. Мөн хэрэглэгчдийг хүссэн үед нь бараа бүтээгдэхүүний үнийн саналыг и-мэйлээр хавсаргаж явуулах, дахин дахин хэлж тайлбарлах гээд цаг хугацаа шаардсан тогтмол хийдэг ажлыг хөнгөвчилж, автоматжуулах бүрэн боломжтой. Өөрөөр хэлбэл, автоматаар хариу өгдөг харилцан ярианы хэсэг шиг /chat bot/ үнийн саналыг автоматаар өгөх шийдэл бий. Ингэхдээ и-мэйл, зурвасаар илгээх, илгээсэн мэдээллийг нээж харсан эсэхийг борлуулагчийн зүгээс нягтлах шийдлүүдийг борлуулалтын автоматжуулалтаар шийдэж болно.

Цаашлаад бизнесийн байгууллагууд интернэт орчинд автоматжуулалтыг нэвтрүүлж, хийж чадвал заавал компьютерийн мэргэжилтэнг ажиллуулах, мэргэжлийн хүнийг хөлслөх шаардлагагүйгээр асуудлаа шийдэх боломжтой.

- www.barilga.mn сайтыг шинэчилж, өөрчлөхөд баримталсан гол зарчим юу байв? Ямар болгохыг зорьсон бэ?

- www.barilga.mn сайт урьд нь байгууллагуудын танилцуулгыг нэгтгэсэн хэлбэртэй байсан. 5 дахь удаагийн буюу одоогийн энэхүү шинэчлэлтээр тус вэбэд дөрвөн гол өөрчлөлтийг хийж байгаа.

Нэгдүгээрт, www.barilga.mn дээр бүтээгдэхүүн үйлчилгээгээ байршуулж байгаа хүмүүс тухайн мэдээлэл рүү нь хэчнээн хүн, хэзээ нэвтэрч орж үзсэн, тэр ч байтугай хэн хэн үзсэнийг харуулдаг статистикийн хяналтын самбар /dashboard/-тай болж байгаа. Өөрөөр хэлбэл, таны вэб рүү оруулсан ямар нэгэн зар, бүтээгдэхүүн, шинэ орон сууцны мэдээллийг үзэж байгаа хүмүүсийн нэр, зураг, утасны дугаар, и-мэйл хаяг гэх мэт үндсэн мэдээлэл бүртгэгдэж, цугласан дата нь таны мэдэлд очно гэсэн үг. Нэг ёсондоо вэб өөрөө амьд харилцаа үүсгэж, бодит мэдээллээр баялаг болж байгаа юм.



- Зорилтот хэрэглэгчээ алдалгүй “барьж авах” боломжтой гэсэн үг байх нээ?

Тийм ээ. Дижитал хөгжилд ахиц гарч, тухайн мэдээлэл дэх хандалтын тоо л мэдэгддэг байсан бол одоо тэр хандалтууд хэнээс ирж байгааг тодорхой мэдэх боломжтой болсон. Энэ нь бизнесийн байгууллагад зорилтот хэрэглэгчидтэйгээ эргэн холбоо барих бодит мэдээлэл болж чадна.

Дараагийн нэг чухал шинэчлэл бол ухаалаг утсанд зориулсан өөрчлөлтүүд. Монголд ухаалаг гар утасны моод ид хүчээ авчихсан, хүмүүсийн хэрэглээ суурин компьютераас гар утас руу шилжчихлээ. Хэрэглэгчдийн энэ хэрэгцээнд тааруулан www.barilga.mn вэбийн загвар, бүтэц зохион байгуулалтыг гар утас руу чиглүүлэн өөрчилж байна. Хамгийн энгийн функц нь юу гэхээр, хэрэглэгч гар утаснаас үзэж сонирхож буй бүтээгдэхүүнийхээ борлуулагчтай холбоо барихын тулд утасны дугаарыг нь хуулж, дуудлага хийх цонхоо нээж хуулсан дугаараа тавьж байгаад залгадаг төвөгтэй ажиллагааг хялбаршуулсан. Борлуулагчийн утас руу шууд залгах товчлуур дээр дараад л холбогдоно. Ерөнхийдөө бүх загвар гар утас руу чиглэж байна.



Гуравдугаарт, вэбийн гишүүн байгууллагууд үндсэн домэйн хаягаа www.barilga.mn дэх өөрийн хуудастай шууд холбож, мэдээллээ нэгдсэн байдлаар шинэчлээд явах боломжтой. Ингэснээр үндсэн домэйн хаяг дээрээ www.barilga.mn дэх статистик мэдээллээ харж, дүгнэх, цуглуулах давуу талтай.

Дөрөвдүгээрт, www.barilga.mn-д бүртгэлтэй компаниуд өөрийн дураар, хүссэнээрээ ажиллах технологийн шийдлүүдийг нь нээлттэй болгож өгсөн. Тухайлбал, өмнө нь өгөгдсөн стандарт цэсний дагуу л мэдээллээ шинэчилж байсан бол одоо өөрийн хуудас дээр цэс үүсгэх, бараа бүтээгдэхүүний ангилал нэмэх зэргээр хөгжүүлэх эрх чөлөөг нь олгож байна. Мөн хамгийн гол давуу тал нь хайлтын системд өөрийн бүтээгдэхүүн үйлчилгээг эхэнд гаргаж ирэх түлхүүр үгсийг www.barilga.mn-нийхээ “платформ” дээр тохируулах боломжтой болсон. Бизнес эрхлэгчид компанийнхаа нэрийг бичих биш, тухайн бүтээгдэхүүн үйлчилгээнийхээ нэр, холбогдолтой үгийг түлхүүр үг дээрээ бичих хэрэгтэй. Хэрэглэгчид танай компанийн нэрийг биш, ихэвчлэн бүтээгдэхүүнээр нь хайлт хийдэг шүү дээ. Түлхүүр үгсээ оновчтой хийж чадвал Google хайлтын системээс хайлт хийсэн зорилтот хэрэглэгчдэд танай бүтээгдэхүүн үйлчилгээ эхэнд харагдах боломжууд нэмэгдэнэ.

- Олон гишүүн байгууллагатай сайтын хувьд өөрчлөхийг хүссэн гол онцлогуудын талаар…

Цаашлаад www.barilga.mn-ний гишүүн байгууллагууд хүссэн үйлчилгээгээ авах нарийн тохиргоонуудыг хийлгэх боломжтой. Тухайлбал, танай бүтээгдэхүүнийг нэг хэрэглэгч нэвтэрч үзээд гарсны дараа түүнийг интернэт ертөнцөд “мөшгинө” гэх үү дээ. Тухайн хэрэглэгч Фейсбүүк, YouTube гээд интернэт орчинд хандалт хийх болгонд сонирхож байсан бүтээгдэхүүнийх нь сурталчилгааг хаа явсан газарт нь харагдаж байх тохиргоог хийнэ. Гэхдээ зөвхөн тэрхүү хэрэглэгчид өөрт нь л харагдах юм. Үүнийг “Дахин чиглүүлэх маркетинг” гэж нэрлээд байгаа.

Жишээлбэл, тоосго хайж байгаа хүн Google дээр тоосго гэж бичиж хайгаад, гарч ирснийх нь дагуу шууд худалдан авалт хийчихдэггүй. Хэд хэдэн удаа бичиж хайна, гарч ирсэн сонголтуудыг харьцуулан харна гээд худалдан авахын өмнөх алхмууд бий.

Харин бизнесийн байгууллагууд өөрийн бүтээгдэхүүнийг сонирхон харсан хэрэглэгчээ дахин чиглүүлж чадалгүй алдчихаад байдаг. Харин технологийн шийдлийн ачаар тухайн вэб дэх бүтээгдэхүүнийг нэг удаа нэвтэрч ороод харсан хэрэглэгчийг бүртгэн авч, дахин холбогдох боломжтой болсон. Хүсэх юм бол хэрэглэгчийг Фейсбүүк орчинд нь дагаж болно. Ялангуяа шинэ орон сууц борлуулагч компаниуд үүнийг ашиглахад тохиромжтой байх. Хэрэглэгч шинэ орон сууц хэсэг рүү нь орж харчихаад, дараа нь YouTube руу ороход нөгөө орон сууцных нь сурталчилгаа байх жишээтэй. Иймэрхүү нарийвчилсан, өндөр түвшний тохиргоонуудыг хийж болох нээ.

Эдгээр нь бизнесийн байгууллагуудад үнэ цэнээ өгөх шинэчлэл болж чадна гэж үзэж байгаа.

Товчоор хэлбэл, шинэчлэгдсэн www.barilga.mn-ээс нэгдүгээрт бүтээгдэхүүн үйлчилгээг үзэх гэж нэвтэрсэн бүх хэрэглэгчдийн мэдээллийг тухайн байгууллага өөрөө авах, хоёрдугаарт Google хайлтын системд мэдээлэл тань эхэнд харагдах, гуравдугаарт танай компанийн мэдээллийг гар утаснаас төвөггүйхэн харж холбоо барих, дөрөвдүгээрт нарийн тохиргоо хийлгэж зорилтот хэрэглэгчдээ интернэт орчинд дагадаг болох гэсэн дөрвөн гол давуу талыг олгож буй нь энэ удаагийн шинэчлэлтийн гол зорилго юм.

- Гишүүн байгууллагууд хоорондоо харилцах, хамтран ажиллах боломж нээлттэй юу?

- www.barilga.mn-д бүртгэлтэй тухайн нэг компани өөрийн профайл руу нэвтэрсэн бусад компаниудаа мэдэх боломжтой. Аль компаниас хэзээ, хэдэн удаа нэвтэрсэн гэдэг мэдээлэл ирэх учраас танд ойлгомжтой харагдана. Фейсбүүкийн нууц группт оруулсан нийтлэлийг “Seen by” гэдгээр нь хэн хэн харсныг мэдэж болдог шиг гэх юм уу даа. Энэ мэдээлэл нь www.barilga.mn вэбийн гишүүдийн хоорондоо харилцах, хамтрах эхлэл болно гэж үзэж байна. Аль нэг компаниас танай профайлыг олон дахин орж харсан бол та бүхэнтэй харилцах, хамтрах сонирхол байгаа л гэсэн үг.

Бас нэг зүйлийг нэмээд хэлэхэд, www.barilga.mn рүү хэрэглэгч нэвтрээд хайлтан дээр ямар нэгэн үг бичиж хайхад тухайн бичсэн үгийг бүртгэнэ. Тэрхүү хэрэглэгч вэбэд дахин нэвтрэхэд түүний хамгийн их хайсан, сонирхсон мэдээлэл өөрт нь түлхүү харагдах болно. Та хайлт дээр плита гэсэн бүтээгдэхүүн бичиж хайсан бол дараа нэвтрэхэд тань плита худалддаг компаниудыг танд харуулах жишээтэй. Яг л YouTube-д таны сонсдог, хайдаг бичлэгүүдийг Homepage-ээр харуулдаг шиг.

- Сайтын гол хэсэг болсон Шинэ орон сууцны хэсэг хэрхэн өөрчлөгдөж байна вэ? Төсөл борлуулагчдад ямар боломжуудыг олгож байна?

- Шинэ орон сууцны хэсгийн нүүрэн дээр том газрын зураг оруулсан. Орон сууц борлуулдаг бусад сайтуудад зөвхөн шинэ орон сууцны мэдээлэл багтдаг. Харин шинэчлэгдсэн www.barilga.mn-ний орон сууцны хэсгээс иргэдэд байр авахад хэрэгтэй бүх төрлийн зөвлөгөө мэдээллийг оруулдаг болохоор зорьж байна. Шинэ орон сууц авахдаа иргэдийн хамгийн их асуудаг асуултууд, зөвлөгөө нийтлэлүүд, байр авахаас өмнө болон байр авсны дараа хэрэг болох зөвлөмжүүд, тавилга гэр ахуйн барааны тухай гээд олон талын мэдээлэл авах боломжийг бүрдүүлж байна.

Мөн гишүүн компаниудын нэгэн адил тухайн компани нь орон сууцны мэдээлэл рүү нь нэвтэрсэн хэрэглэгчдийн мэдээллийг, мөн статистикийг харах боломжтой. Хэрэглэгчид хэзээ, хаанаас, хэдэн удаа, хэрхэн танай мэдээллийг үзэж байгааг харна. Хэрэглэгчдийн хандалтыг графикаар хараад явна. Эдгээрээс хамгийн чухал нь хэрэглэгч хаанаас, юугаар дамжиж танай шинэ орон сууцны мэдээллийг харж байна вэ гэдгийг мэдэх боломжтой болсон явдал. Танайд хандсан хэрэглэгчдийн хэд нь Google-ээс, хэд нь Фейсбүүкээс, хэд нь www.barilga.mn-ээс, хэд нь шууд танай нэрээр орж нэвтэрснийг ч нарийн харж болно.



Дээр хэлсэнчлэн танай мэдээллийг нэвтэрч орж харсан хэрэглэгчдийн үндсэн мэдээллийг авна гэдэг нь өөрөө бизнесийн байгууллагын хувьд маш том давуу тал. Зорилтот хэрэглэгчдээ мэдэх, дахин холбогдох, тэдэнд зориулсан сурталчилгаагаа и-мэйлээр явуулах, утсаар ярих, зурвасаар хүргэх, бүр борлуулалтын менежер биечлэн уулзаж мэдээлэл өгч ч болно. www.barilga.mn вэбийн зүгээс энэ бүх боломжийг гишүүддээ, шинэ орон сууцны мэдээлэл тавьсан компаниуддаа бүрдүүлж өгөх нь шинэчлэлийн гол зорилго.

- Хэрэглэгчийн мэдээлэл хэрхэн бүртгэгдэх вэ? Вэбэд бүртгэлгүй хэрэглэгчдийн мэдээллийг хэрхэн авах вэ?

- Аль нэг бүтээгдэхүүн үйлчилгээг өдөрт 100 хүн үзсэнээс 30 нь бүртгэлээрээ нэвтэрч орсон хэрэглэгч, 70 нь бүртгэлгүй хэрэглэгч гэж бодъё. Тэгэхээр яг “Log in” хийж нэвтэрч орсон хэрэглэгчдийг таниж, тэдний мэдээллийг цуглуулна гэсэн үг. Гэхдээ www.barilga.mn-ний шинэчлэгдсэн платформын нэг зорилго нь бүх хэрэглэгчийг бүртгэлжүүлэх. Үүнийг аажмаар алхам алхмаар хийх юм. Бүртгэлгүй хэрэглэгчдийг аль болох бүгдийг нь бүртгэлжүүлэхийг зорьж байна. Ингэснээр гишүүн байгууллагуудад бүр олон давуу талыг авчирна.

- Нэмэлт давуу талуудын тухайд…

- Шинэ орон сууцны төслүүдийн зургийг 360 градус бүхий технологиор үзэх боломжтой болсон. Тийм болохоор төсөл хэрэгжүүлэгч компаниуд өөрсдийн загварын байрныхаа зургийг 360-аар харуулснаар хэрэглэгчид тухайн барилгын бодит байдлыг харуулсанаар очиж үзэх цагаа хэмнэх бусад баригдаж буй барилгуудаас ялгарах онцлог давуу талуудаа тодотгож, хэрэглэгчдийн хандалтыг татах зэрэг ач холбогдолтой.

Ер нь энд яригдсан дижитал маркетингийн олон давуу талыг www.barilga.mn-ний гишүүн болсон байгууллагууд өргөнөөр ашиглаж, техник технологи хурдацтай хөгжиж байгаа өнөөгийн зах зээлд өрсөлдөхүйц, үнэ цэнээ нэмэгдүүлэх асар их боломж байна. Та бүхэнд амжилт хүсье.


Дэлгэрэнгүйг "БАРИЛГА.МН" сэтгүүлээс