Камеруны “Hermann Kamte & Associates” компанийн архитекторууд Африкийн домогт Баобоб модны хэлбэрээс санаа авч, модон хийц бүхий өндөр барилга барихаар төлөвлөлт, дизайны ажлыг гүйцэтгэжээ. Тухайн орон нутгийн эх үүсвэрээс буюу байгалийн гаралтай материалыг ашиглан барих мушгирсан хэлбэртэй уг цамхгийн загвар, хүрээлэн буй орчинд ээлтэй, хүний эрүүл мэндэд сөрөг нөлөөгүй зэрэг шинж чанарууд ирээдүйн хот төлөвлөлтийн хэв маягт багагүй нөлөө үзүүлнэ гэж бүтээн байгуулагчид нь үзэж байгаа аж.





  Архитекторуудын хэлж буйгаар, энэхүү цамхгийн загвар нь хүн амын хэт нягтаршлаас үүдэлтэй байгальд үзүүлж буй сөрөг нөлөөллийг бууруулах оновчтой шийдэл болж, ирээдүйн ухаалаг барилгын үндсэн санаа болж чадна гэжээ. Ногоон барилгын материал болон эрчим хүчний хэмнэлттэй шийдлүүдийг ашиглан барьсан уг барилга ирээдүйд “зах зээлд эрэлттэй, эдийн засгийн хувьд хэмнэлттэй, байгальд ээлтэй, хүрээлэн буй орчин, нийгмийн орчин сайтай” хот төлөвлөлтийг бүрдүүлэх олон давуу талтай.





  “Native Skyscraper” барилгын төлөвлөлт нь мушгиран дээшилж буй хэлбэртэй. Ногоон багануудыг мод болон шилэн фасадаар холбожээ. Дизайны багийнхан энэхүү ногоон барилгадаа барилгын үндсэн материал болох модыг ашиглаад зогсохгүй эргэн тойрны цамхгуудтай холбохыг зорьжээ. “Мод бол байгаль эхийн нэгэн гайхалтай бүтээл. Энэ нь бидний бүтээлийг байгаль орчинтой шууд холбож өгч байгаа юм. Хорвоо дэлхий дээр яг адилхан хоёр мод огт байдаггүй шүү дээ” хэмээн архитекторууд нь өгүүлжээ.



  Цамхгийн дотор засал чимэглэл нь тэр чигээрээ байгалийг санагдуулам аж. Модон дам нуруу, багана зэрэг нь ил харагдах учраас яг л мөчир юугаа дэлгэсэн том модон байшин шиг харагдах гэнэ.