Барилга, хот байгуулалтын яамны НЭЭЛТТЭЙ ХААЛГАНЫ ӨДӨРЛӨГ Сүхбаатарын талбайд өнөөдөр нээгдлээ. Хот байгуулалт, газрын харилцаа, геодези зурагзүй, барилга, барилгын материал үйлдвэрлэл, орон сууц нийтийн аж ахуй, дэвшилтэт техник технологи нэвтрүүлэгчид, салбарын төрийн болон төрийн бус мэргэжлийн байгууллагууд, холбоод, бизнес эрхлэгчдийг өдөрлөгт хамруулж, өнөөдөр, маргааш хоёр өдрийн турш иргэдэд мэдээлэл өгч ажиллах юм.

  Түүнчлэн өдөрлөгт хүрэлцэн ирснээр та бүхэн барилгын материалын үйлдвэрлэл, ипотекийн зээл, шинэ орон сууцны мэдээлэл, төр болон хувийн хэвшлийнхний хэрэгжүүлж буй төсөл хөтөлбөр, газар зохион байгуулалт гээд олон талын мэдээллийг авах боломжтой.

Өдөрлөгийн нээлтийн ажиллагааны үеэр Барилга, хот байгуулалтын Сайд Г.Мөнхбаяртай цөөн хором ярилцсаныг хүргэж байна.

- Төр засгаас салбарт баримтлах бодлого чиглэлийн талаар...

- Барилга, хот байгуулалтын яамны гол бодлого бол салбарынхаа хувийн хэвшлийг дэмжих явдал. Ингэснээр иргэдийн өмнө тулгараад байгаа гэр хорооллын дахин төлөвлөлт, Улаанбаатар хотын гэр хороолол дахь шугам сүлжээ, дэд бүтцийг иж бүрнээр шийдвэрлэх боломжийг төсвийн хувьд эрэлхийлж байгаа. Засгийн газрын сүүлийн хуралдаанаар Монгол улсад БНХАУ-аас үзүүлсэн буцалтгүй тусламжийн хоёр тэрбум юаниар агаарын бохирдол, гэр хорооллын орчны бохирдлыг шийдвэрлэх дэд бүтцэд зориулахаар шийдсэн. Бэлтгэл ажлын хүрээнд барилгын бүх компаниудтай уулзаж байна. Мөн өмнө нь нийслэлтэй гэрээ хийж гэр хорооллын дахин төлөвлөлтийн төсөлд багтсан ч ажил нь зогсонги, иргэдэд хүлээлт үүсгэсэн компаниуд нэлээд бий. Төсөв хөрөнгө дутагдсан, дэд бүтцээ шийдэж чадахгүй байгаа газруудыг түүвэрлээд үзэхэд 155 тэрбум төгрөг шаардлагатай байгааг бас шийдвэрлэх юм.

Төслийн хувьд зарим компаниуд хүчин чадлаасаа давсан талбай авсан байна, 40 га, 20 га гэх мэт. Төрөөс дэд бүтцийг шийдэж байгаа учраас энэ компаниудын гүйцэтгэж чадахгүй байгаа барилгажуулах талбайг хувааж, олон компани ажлыг зэрэг гүйцэтгэх нөхцөлийг бүрдүүлэх шийдвэр гаргасан. Түүнчлэн гэр хорооллын дахин төлөвлөлтийн дэд бүтцийг эхний ээлжинд шийдвэрлэх шаардлагатай газруудыг судалж байна. Юун түрүүнд Улаанбаатар хотын Сонгинохайрхан, Баянзүрх, Хан-Уул, Сүхбаатар, Чингэлтэй гэсэн төвийн дүүргүүдэд дэд бүтэцтэй холбоотой асуудлуудыг шийдвэрлэнэ.

- Арилжааны банкууд ипотекийн зээлийг гэрээт компаниудынхаа орон сууцанд олгож байгаа нь хууль зөрчсөн асуудал мөн биз. Энэ тухайд?

- Өнгөрсөн хугацаанд ипотекийн зээлийн эх үүсвэр нэг талаас буюу Монголбанкны 4 их наяд төгрөгийн түвшинд шийдэгдэж ирсэн. Энэ нь сардаа тодорхой доголдол үүсэхэд өргөдлөө өгчихөөд зээлд хамрагдаж чадахгүй байгаа иргэдийн асуудлыг үүсгэсэн.  Тэгэхээр МУ-ын засгийн газар энэ оны төсвийг батлахдаа ипотекийн зээлийн санхүүжилтийн талыг нь тусгаж, үлдсэнийг нь Монголбанкнаас гаргах тохиролцолд хүрсэн. Энэ зургадугаар сард багтааж өмнө нь өргөдлөө өгсөн ч зээл нь батлагдаагүй иргэдэд ипотекийн зээлийг нь олгох хэмжээний эх үүсвэрийг арилжааны банкуудад олгохоор Монголбанк, Сангийн яам ажиллаж байна. Өөрөөр хэлбэл, сард 25 тэрбум төгрөгийн ипотекийн зээл эргэн төлөлтөөр санхүүжүүлэгдэж байсан бол одоо сард 51-52 тэрбум төгрөг арилжааны банкуудад хүрэх юм. Түрээсийн орон сууц хөтөлбөрийг Сонгинохайрхан дүүрэгт үргэлжлүүлэх ажлыг эхэллээ. Цаашид ч үргэлжлүүлэх болно оо.

- Гэр хорооллын дахин төлөвлөлтийн ажил эхэллээ гэхэд зах зээлд шийдэгдээгүй 45,000 барилгын асудал хөндөгдөнө. Энэ асуудлыг хэрхэн шийдэх вэ?

- Иргэдийн хэрэгцээг хангасан 80-100 м.кв талбайтай орон сууцнууд зах зээл дээр ховорхон бий. Тансаг зэрэглэлийн, том талбайтай, өндөр үнэтэй байрнууд борлогдоогүй орон сууцнуудын ихэнх хувийг эзэлж байгаа. Гэтэл 80 м.кв-аас ихгүй талбайтай орон сууц л ипотекийн зээлд хамрагдах нөхцөлтэй шүү дээ.

- Орон сууцны худалдан авалтыг нэмэгдүүлэхийн тулд гадаадад амьдарч байгаа иргэдийг ипотекийн зээлд хамруулах боломжийн тухай ярьж байсан?

- Боломж байгаа. Иргэдийг гадаадад, эсвэл дотоодод амьдарч байгаагаар нь ялгаварлаагүй. Урьдчилгаа төлбөрөө, сар тутмын төлөлтөө төлж чадах л юм бол боломжтой.

- Ипотекийн найман хувийн зээлийн урьдчилгааг бууруулах боломж бий юу?

- Урьдчилгаа төлбөрийг бууруулах нь утгагүй зүйл. Зээлийн хугацаа 20 жил байсныг 30 болгосон. 58 сая төгрөгийн зээлийг 20 жилээр авсан бол сард 400 мянга орчим төгрөгийг төлөх ёстой. Сар тутмын төлөлтийг нь багасгах үүднээс зээлийн хугацааг уртасгасан.

- Тэгвэл гадаадад амьдарч, ажиллаж байгаа иргэд энэ зээлд хэрхэн хамрагдах вэ?

- Яг л Монголд амьдарч буй иргэдийн нэгэн адил нөхцөл шаардлага тавигдана шүү дээ. Гадаадад амьдарч байгаа иргэдэд өөр шаардлага тавина гэсэн ойлголт байхгүй. Ажиллаж байгаа компанийн мэдээлэл, орлогоо тодорхойлох л ёстой.