Лондон хотын West End дүүрэгт эрчим хүчээр хангах зориулалт бүхий дэлхийн хамгийн анхны ухаалаг гудамжийг байгуулах ажил дуусч, ашиглаж эхлээд байна. Өөрөөр хэлбэл, тус гудамжны явган замыг эрчим хүч үүсгэх Pavegen-ний хавтангуудаар хийж гүйцэтгэсэн юм. Явган зорчигчид Bird Street гудамжаар явж өнгөрөхдөө зориулалтын аппликейшнд холбогдож, тэдний хөлийн алхаа хэчнээн хэмжээний эрчим хүч гаргаж буйг үзэх боломжтой аж.

  Pavegen-ийхэн Bird Street гудамжинд ойролцоогоор 10 м.кв орчим талбайд хавтан суурилуулжээ. Энэ нь хүний алхалтын хүчийг эрчим хүч рүү хувиргаж, ойр орчмын газруудын гэрэлтүүлгийг асаах болон шувуудын чимээг дуугаргах хүчин чадал бүхий цахилгааныг үйлдвэрлэх юм.



  Түүнчлэн блютүүт бага эрчим хүч бүхий дамжуулагчдыг энэ хэсэгт байрлуулснаар хэрэглэгчид эрчим хүч үүсгүүрийн хавтангууд болон аппликейшнтэй холбогдож чадах аж. Үүнээс хүмүүс эрчим хүчээр хангах тэрхүү хавтан зам дээр алхах өөрсдийн алхааг хэрхэн цэвэр эрчим хүч гаргаж, ямар хөнгөлөлт, урамшуулал эдэлж болохыг харах боломжтой.



  Pavegen компанийн гүйцэтгэх захирал Лоренс Кембол-Күк  энэ талаар ярихдаа, “Бидний Вашингтон хот болон Хитроугийн нисэх буудал дахь тээврийн хэсэгт суурилуулсан бидний ажил нь манай технологийг олон нийтийн газар, жижиглэнгийн худалдааны төвүүдэд ашиглах боломжтойг харуулж байна. Жижиглэнгийн худалдаачид онлайнаар өрсөлдсөнөөр хөл хөдөлгөөн ихтэй гудамжийг илүү таатай болгож, хүмүүс энд сэтгэл хангалуун байх нөхцөл бүрдэнэ” гэжээ.



  Түүнчлэн Bird Street гудамжинд азотын давхар ислийг сорогч, агаар цэвэршүүлэгч зэрэг нэмэлт төхөөрөмжүүдийг суурилуулахаас гадна агаар цэвэршүүлэх будгийг ашиглажээ.