Хосгүй өндөр цамхаг, өвөрмөц хийц бүтээцтэй барилгууд шил дараалан баригдаж архитектурын гайхамшгийг бүтээсээр. Тэгвэл өөрийн содон шийдлээрээ дэлхийн гайхамшигт барилгуудын жагсаалтад зүй ёсоор багтаж буй бүтээн байгуулалт бол “Market Square” цамхаг билээ.

  АНУ-ын Техас муж дахь Хьюстонд байрлах уг цамхгийн 40 дүгээр давхарт байрлах шилэн ёроолтой усан сан нь яг л тэнгэрт дүүлэн хөвөх мэт их хотын амьдралыг дээрээс тольдох боломжийг олгох ажээ. Энэ бол сүүлийн жилүүдэд тансаг зэрэглэлийн орон сууцны барилгууд анхаарал татахуйц этгээд сонин шийдлээрээ хоорондоо ширүүхэн өрсөлдөж эхэлсний нэгэн жишээ юм.

  Мэдээж адал явдал хайгч, шинэлэг орчинд амьдрахыг хүссэн чинээлэг эрхмүүдэд энэ нь нэлээд таатай сэтгэгдэл төрүүлэх болов уу. Одоогоор Market Square цамхагаас өмнө ийм төрлийн барилга Лондон хот, мөн Энэтхэг улсад л баригдаж амжсан билээ.

  153 метр өндөртэй уг барилгын орой дээрх ирмэгээс гурван метрээр сунгаж, шилэн ёроол, шилэн гадаргууг хийжээ. Тэрхүү акрилик шилэн гадаргуу нь 20 сантиметр зузаантай ба тулгуур хэсэг нь махир тул үзэгдэх орчныг бүхэлд нь тольдох боломжийг олгодог аж. Тансаг хээнцэр тав тухыг бүрдүүлсэн уг барилгад түрээсийн 463 орон сууц байдгаас оффис болон амьдрах зориулалтаар түрээсэлж болдог юм байна.

  Уг төслийг архитектурын “Jackson & Ryan Architects” пүүс 2016 оны 11 дүгээр сард бүрэн дуусгаж, ашиглалтад оруулжээ. Түүнээс хойш Тэнгэрийн усан санд амарч тухалсан оршин суугчдын зураг, бичлэгүүд нэг хэсэгтээ л олон нийтийн сүлжээгээр дүүрсэн билээ.