Ирландын уран бүтээлч Жое Каслиний уран бүтээлүүд нь тус улсын хотуудын архитектур дээгүүр нэгэн цогц ноорог ном шиг харагддаг байна. Учир нь тэрээр текстийг үл харгалзан ханын зургаар дамжуулан тойрон хүрээлж буй дэлхий ертөнцийн харанхуй хэсгийг өөрчлөхийг эрмэлздэг нэгэн юм. 

Зураг бүр сүүлийн үеийн нийгмийн асуудлуудтай шууд холбогдож, анхаарах шаардлагатай үйл явдлын талаар ойр орчмын оршин суугчдад тайлбар өгдөг байна.

2015 онд Жое Каслин Дублины урд Георгений гудамжинд ижил хүйстнүүдийн гэрлэлтийн талаарх санал асуулгын дүнд үүссэн дүгнэлт, дүр төрхийг ханын зурагт үлдээсэн нь олон улсын анхаарлыг татсан юм. Католик шашинтай тэдний хувьд энэ нь нэн шинэлэг үзэгдэл байв.



Каслиний "Манай үндэстний хөвгүүд" төсөл нь арлын болон хилийн арлууд дээрх залуучуудын дүр төрхөөр хотуудаа тохижуулсан. Энэхүү төслөөрөө залуусын үзэл бодол, хувцаслалтыг үзүүлэхийг зорьжээ.

-Архитектурын бүтээл дээр зураг бүтээх санаа хэрхэн бий болов?

Уран зураач нь нийгэмд үнэ цэнэтэй байр суурь эзэлдэг гэдэгт би итгэдэг бөгөөд бид бол нэг ёсны "сэтгэл хангалуун бясалгагчид" юм. Гудамжны урлаг нь өөрийн мөн чанарыг таниулахын зэрэгцээ олон нийтийн хооронд яриа өрнүүлэх боломжийг олгодог. Энэ нь надад том хэмжээний олон нийтийг хамарсан ажлыг хийхэд том түлхэц өгсөн юм.

-Бүтээл туурвих үе шат, үйл явцын тухайд?

Олон шат дамжлагатай байдаг. Нэн түрүүнд, урт хугацааны судалгаанаас эхэлнэ дээ. Сүүлийн үеийн нийгэмд асуудал болж буй сэтгэлгээ, үйл явдлыг судална. Сэдвээсээ хамааран 3 сараас 2 жилийн хооронд нэг зургийн санаа үндсэндээ бий болдог. Үүнийгээ зургийн тоо болон зурагдах хүмүүсийн тооноос хамааран 2-7 долоо хоногоос багагүй хугацаанд цаасан дээр буулгана.

Дараа нь зургаа тухайн архитектурын хэв маягт тохируулан том хэмжээний форматаар сканердана. Эцэст нь наалдамхай бодис ашиглан барилга дээр наадаг.



-Таны зургаа дамжуулан хэлэх гэсэн санаа, захиас өөрөө тэр болгон илэрхий байдаггүй. 

Миний ажил хамрах хүрээгээрээ зар сурталчилгааны компанит ажилтай төстэй. Гэхдээ би ямар ч текст оруулдаггүй. Биеийн хэлээр дамжуулж, хөндөж буй сэдэвтэй хамаарах эд зүйлсэд тулгаварлан хэлэх гэсэн санаагаа ойлгомжтой болгохыг хичээдэг.

-Та хийсэн бүтээлүүдээрээ үзэсгэлэн гарах тухайд бодож байв уу?
Одоогоор бодсон зүйл байхгүй байна. Галерей, музейн орчинд миний оролцоо маш бага.

-Энэхүү ажлаа хийхэд хамгийн бэрхшээлтэй асуудал юу вэ? 
Байнгийн тулгардаг асуудал нь санхүүжилт байдаг. Дунд сургуулийн багшийн хувьд энэхүү ажлыг санхүүжүүлнэ гэдэг хэцүү.

-Багш хэмээх алдар таны гудамжны урлагт хэрхэн нөлөөлсөн бэ?

Манай анги гурван зуу гаруй хүүхэдтэй. Миний хийсэн бүх ажлын санаа, нийгмийн асуудлуудыг ангиасаа олж мэдэрсэн. Нийгмийг өөрчлөхийн тулд гудамжны урлагийг багш болгон ашигладаг гэх үү дээ.

-Та сүүлийн арван жил эдийн засгийн хямрал, гэр бүл салалт, үр хөндөлтийн эрхийн компанит ажил, католик сүм хийдийн тоо буурсан тухайд гээд олон чиглэлд анхаарч, уран бүтээлээ хийлээ. Үүний үр дүнд өөрчлөлт гарсан гэж үзэж байна уу?

Нийгмийн бүхий л он жилүүдэд нийгмийн уран зураачид тууштай байр суурьтай байсан бөгөөд бидний бүтээл түүхийн баримт бичиг болдог учиртай.
Гэрлэлтийн тогтвортой байдал, үр хөндөлтийн эрхийн төлөөх ажил маань тэдний сэтгэл хөдлөлийн төлөв байдлаар илэрхийлэгдэж, тэдний хүсэл эрмэлзлийг олон нийтэд харуулсаар байна. Уран бүтээлчид үүнийг хийх чадвар, чадавхтай бөгөөд хүн төрөлхтний ирээдүйд эерэг нөлөө үзүүлсэн, цаашид ч сайнаар нөлөөлсөөр байх болно.