УИХ-ын гишүүн, БХБ-ын Сайд Х.Баделхан өнөөдөр Бүгд Найрамдах Беларусь Улсаас Монгол Улсад суугаа Онц бөгөөд Бүрэн эрхт Элчин сайд Эрхэмсэг ноён С.В.Чепурной тэргүүтэй Элчин сайдын яамны төлөөлөгчдийг хүлээн авч уулзав.

 Талууд Монгол, Беларусийн Засгийн газар хоорондын комиссын хуралдааны Монголын хэсгийг 2014-2016 онуудад Барилга, хот байгуулалтын дэд сайд, сайд ахалж ирсэн бөгөөд салбарын сайд мөн тус улсад албан ёсны айлчлал хийсэн зэрэг хоёр талын харилцааны механизмын хэрэгжилтийн талаар ярилцсан юм.

Энэ үеэр ярилцаж, хэлэлцэж ирсэн Европын норм стандартыг болон 1960-90-ээд оны угсармал барилгыг сэргээн засварлах, эрчим хүчний хэмнэлттэй барилгын технологи нэвтрүүлэх, боловсон хүчнийг давтан мэргэшүүлэх зэрэг чиглэлд тус улсын Архитектур, барилгын яамны харьяа С.С.Атаева-ын нэрэмжит “Орон сууц-НИПТИС” эрдэм шинжилгээний хүрээлэнтэй, шил, керамикийн хамтарсан үйлдвэрийг Монголд байгуулах, орон сууцны хорооллын бүтээн байгуулалтын төслийг хэрэгжүүлэх зэрэг тодорхой саналуудыг хамтын ажиллагааны хүрээнд ажил хэрэг болгох нь зүйтэй гэдэгт Талууд санал нэгдлээ.

Мөн Монгол Улсын Барилгын хөгжлийн төв, Бүгд Найрамдах Беларусь Улсын Архитектур, барилгын яамны харьяа С.С.Атаевагийн нэрэмжит “Орон сууц-НИПТИС” эрдэм шинжилгээний хүрээлэнгийн хооронд харилцаа тогтоож, хамтын ажиллагааны Протокол байгуулж ажиллахад нь дэмжлэг үзүүлэхээр боллоо.

Элчин сайд С.В.Чепурной Сайд Х.Баделханд хамтын ажиллагааны Протоколын төслийг албан бичгийн хамт гардуулсныг хүлээн авч, ойрын хугацаанд байгуулж, цаашид хамтын ажиллагааг олон чиглэлд эрчимжүүлэн ажиллахад бэлэн байна гэдгээ илэрхийлэв.