Тэнгэр баганадсан өндөр барилгуудаараа алдартай Дубай хотноо керамик хавтан фасадтай дэлхийн хамгийн өндөр цамхаг сүндэрлэхээр болжээ. Уран баримлын гайхамшгийг шингээсэн, үзэсгэлэнтэй “Wasl” цамхаг нь нарны зайн хавтангуудаараа эрчим хүчний хэрэглээгээ хэмнэхийн зэрэгцээ өдрийн цагт байгалийн гэрэлтүүлгийг сайтар тусгах шийдэлтэй юм. Таван одтой “Mandarin Oriental” зочид буудал байрлах уг цамхаг нь зочдод зориулсан 250 өрөө, албан тасалгаанууд, орон сууц болон олон нийтэд зориулагдсан үйлчилгээний хэсгүүдээс бүрдэх аж.


           
  Шейх Заяид авто зам дагуу, алдарт “Бурж Халиф” барилгын ойролцоо байрлах 300 метр өндөр бүхий “Wasl” цамхгийн онцлог шинж нь Дубайн металл болон шилэн хийцийн барилгуудаас эрс ялгарна хэмээн архитекторууд дүгнэжээ. Мурий, тэгш хэмт бус энэхүү цамхгийн фасаданд ашигласан керамик хавтангийн цаана гэрэлтүүлгийн иж бүрэн системийг суурилуулсан байна. Тэдгээр фасад нь өдрийн цагт байгалийн гэрлийн шууд тусгалыг шүүж барилгын дотор талд нэвтрүүлэх бөгөөд шөнийн цагаар барилгыг яг л амьсгалж буй мэт харагдуулах аж. Фасадны тэдгээр гэрлүүд нь автомашины зогсоолд суурилуулсан нарны зайн хавтангуудаас үүсгэсэн эрчим хүчээр ажиллах юм.


           
  Шилэн хавтангууд нь барилгыг мушгирсан мэт харагдуулах бөгөөд барилгын босоо чиглэлийн нээлттэй давхрууд, тагтууд, жижиг ногоон байгууламжууд, дээд давхрын усан сан зэрэг нь үзэмж, чимэг нэмэх ажээ. Барилга дотор 17 цахилгаан шат суурилуулах юм.
           
  “Энэхүү төсөл Дубайн хот төлөвлөлтөд өөрийн гэсэн шинэлэг өнгө төрхийг авчрах биз ээ. Хүний эрүүл мэндэд эерэг нөлөөтэй, тав тухтай, сайн сайхан орчныг бүрдүүлснээрээ энэ барилга ихээхэн онцлогтой” хэмээн барилгын гүйцэтгэгч “UNStudio” компанийн үүсгэн байгуулагч Бен ван Беркель өгүүлжээ.
           
“Wasl” цамхаг нь 2020 онд ашиглалтад орох аж.