Хүний тайван амгалан сэтгэл санаа, амьдралын таатай хэв маяг, ажлын амжилтад орчны үзүүлэх нөлөөлөл ихээхэн чухал. Ялангуяа орон гэр, албан тасалгааны дотоод засал, чимэглэл нь хүний сэтгэл санаанд онцгой нөлөөтэй байдаг. Мөн байнгын оршин амьдардаг, ихэнх цагаа өнгөрүүлдэг орчныг үе үе өөрчилж байх нь хүний оюун бодолд тодорхой өөрчлөлт, сэргэлтийг ч авчирдаг. Гэтэл гэр, ажлынхаа өрөөний тохижилтыг байнга өөрчлөх нь амар зүйл биш шүү дээ. Харин гарын дор ойр байдаг зүйлсээр, хямд төсөр аргаар хана туургыг өөрчлөн чимэглэх аргууд олон байдаг. Хүн өөрөө бүтээлч сэтгэлгээгээ уралдуулж, илүү хөдөлмөрч зан гаргаж чадвал орчин тойрноо боломжийн зардлаар өөрчилж, хэв маягаа солих олон олон боломж бий.



  Юун түрүүнд, тавилгаа зөв байрлуулж, нэмэлт гэрэл тусгаж, гэгээ оруулснаар ямар ч айл илүүтэй цэлгэр болоод гоёмсог харагддаг хуультай. Ердөө ганц жижиг чимэглэл ч бүхэл бүтэн гэрийг гайхалтай болгох шидтэй байдаг юм шүү. Ингээд гэрийг тань гоёмсог болгох хялбар аргуудын нэгнээс танилцуулъя. Туршаад үзээрэй.



  Таны гэрийн компьютер, чийдэн, телевиз, хөргөгч, ус буцалгагч тэр ч бүүхэл интернэт лан, өсгөгч хүлээн авагч, уртасгагч гээд л гэр ахуйн цахилгаан хэрэгслүүдийн утас, кабел нь энд тэнд орооцолдож, мушгирч, хөлд тээглээд хэцүү байна уу? Бид ийм утаснуудыг аль болох нуухыг хичээдэг шүү дээ. Тэгвэл таны асуудлыг шийдээд өгье.



Ер нь кабелын утсыг урлаг болгож яагаад болохгүй гэж? Энэ асуултаар дамжуулан танд асуудал болоод байгаа кабелын утаснуудыг нуухын оронд ханандаа тохируулан үзэмжтэй, гоёмсог байдлаар зохиомжилж, өрөөндөө шинэлэг өнгө аяс нэмж болох юм. Ингэснээр танд төвөг удаад байгаа кабелын утаснуудынхаа учрыг хялбархан шийдээд зогсохгүй, интерьер засалдаа гоёмсог өнгө үзэмж нэмчихэж байгаа юм. Кабелын утасныхаа уртын хэмжээнд тохируулан зургаа сонгож, ханандаа харандаагаар хөнгөхөн зурж байгаад дараа нь утсаа байрлууж үзээд тохиромжтой байвал тогтоох хэрэгтэй.      

          

Юугаар тогтоох вэ гэж үү? Танд ердөө “скоб” буюу утас бэхлэх зориулалтын хуванцар хавчаар байхад л хангалттай. “Скоб”-ыг өөртөө хамгийн ойр байгаа барилгын материалын дэлгүүрээс кабел утасныхаа диаметрт тохируулан худалдаж аваарай. Үнэ нь ч боломжийн хямд шүү. Мөн цахилгаан хэрэгслийнхээ утсыг сул унжуулж орхисноос, наалттай хуулга хайчлан чимэглээд ханандаа тогтоох нь ч дажгүй санаа болно.

   Шинэ жил хаяанд ирсэн энэ үед та гэрээ засч тохижуулан, бяцхан өөрчлөлт хийхээр зэхэж байна уу? Тэгвэл кабелын утсаараа шинэ жилийн уур амьсгал оруулахуйц жижигхэн гацуур мод ч хийж болно шүү дээ. Олон өнгийн гуаш будгаар өнгө оруулан, цаас, хуулга ашиглан нэмэлт чимэглэлүүдийг ч хийж болох юм.