Одоогоос зургаан жилийн өмнө “Bjarke Ingels” групп Копенгаген хотыг цахилгаан, халуун ус, дахин боловсруулсан материалын тогтвортой урсгалаар хангахуйц цахилгаан станцыг байгуулах тухайгаа зарлаж байсан билээ.

  Тэгвэл энэ онд Copenhill цахилгаан станцыг барьж дуусгах гэж байгаа тухай таатай мэдээллийг дуулгаж байна. Хог хаягдлаас эрчим хүч үйлдвэрлэх энэ станц нь хэдийнээ үйл ажиллагаа явуулж эхэлсэн бөгөөд дээвэр дээр нь 30 орчим мод тарих юм. Энэ нь 600 метр өндөртэй буюу авирахад зориулагдсан дэлхийн хамгийн өндөр хиймэл хана болж байгаа аж.

  Ирэх онд албан ёсоор нээлтээ хийх “Amager Bakken” хог хаягдлаас эрчим хүч гаргах үйлдвэр нь жилд 400 мянган тонн хаягдлыг боловсруулж, 160 мянган айлыг халуун усаар, 62,500 өрхийг цахилгаанаар хангах юм. Бүрэн ашиглалтад орсноор одоогийн “Amager” эх үүсвэрийн төвийн үүргийг гүйцэтгэж орлох ба нүүрстөрөгчийн хийг жилд 100 мянган тонноор бууруулж, 25 хувиар илүү их эрчим хүч үйлдвэрлэх боломжтой болно.

  Үйлдвэр нь хог хаягдлыг шатааж боловсруулахыг эс тооцвол түүний утаа шүүх дэвшилтэт технологи нь гайхалтай ололт болж чадсан юм. Өөрөөр хэлбэл, үйлдвэрийн орчмын агаар нь Копенгаген хотын төвийнхөөс хавьгүй илүү цэвэр байдаг аж. Станц нь хог хаягдал дахь металлын 90 хувийг нь ялган цэвэрлэж, авто зам барихад ашиглаж болох 100 мянган тонн үнсийг гарган авах боломжтой.