Эрчим хүчний эх үүсвэрүүд болох “ДЦС-2”, “ДЦС-3”, “ДЦС-4” ТӨХК-ийн өвөлжилтийн бэлтгэл ажил бүрэн хангагдаж, өвлийн их ачааллын горимд шилжжээ. Энэ сарын зургааны өдрийн байдлаар дулааны цахилгаан станцуудын үндсэн тоноглол болох 25 зуух, 21 турбин  ажиллаж байсан бөгөөд 17 зуух, 5 турбин бэлтгэлд байгааг Эрчим хүчний сайд Ц.Даваасүрэнд танилцуулжээ.

  2017-2018 оны халаалтын улиралд Улаанбаатар хотын дулаан хангамжийн сүлжээнд “ДЦС-2”, “ДЦС-3”, “ДЦС-4” ТӨХК болон Амгалан дулааны станц ажиллаж байна. Тухайлбал, “ДЦС-2”,“ДЦС-3” ТӨХК-ийн өвөлжилтийн бэлтгэл ажил 100 хувийн гүйцэтгэлтэй байгаа аж. Мөн “ДЦС-4” ТӨХК-ийнтөлөвлөсөн 44 ажлаас 39 нь 100% хийгдэж, “МОНР-10” төслийн хүрээнд 7-р зуух, ТГ-3-ын ажлууд хийгдэж байна. Графикийн дагуу 2017 оны 11 дүгээр сарын 30 гэхэд бэлтгэлд орно гэдгийг Ерөнхий инженер Б.Дашдаваа танилцууллаа. Станцуудын гол түүхий эд болох нүүрсний хангамж хэвийн бөгөөд өвөлжилтийн бэлтгэл ажил 96-98 хувьтай байна.

  Эрчим хүчний сайд Ц.Даваасүрэн өчигдөр “Улаанбаатар дулааны сүлжээ” ТӨХК ,“Эрчим хүчний эдийн засгийн хүрээлэн” ТӨҮГ-т болон “Эрчим хүчний зохицуулах хороонд” ажиллалаа.