Саяхан барилгын ажил нь дуусч, ашиглалтад ороод буй Тьянжиний Бинхай нийтийн номын сан нь бид бүхний урьд өмнө харж байгаагүй гайхамшигтай бүтээн байгуулалт болж чаджээ.

  “MVRDV” компанийн гүйцэтгэсэн Тьянжиний Бинхай номын сан нь бидний урьд өмнө харж байгаагүй гайхалтай бүтээн байгуулалт болж чаджээ. 33,800 ам дөрвөлжин талбайтай номын сангийн гол танхимд шалнаасаа тааз хүртэл өндөр номын тавиуруудыг талбайн голд байрлах гэрэлтэгч бөмбөлгийг тойруулан байршуулжээ. Дугуйтай тавиурууд, олон давхарга бүхий таазнууд нь уг агуй маягийн номын санг шинжлэх ухааны өвөрмөц хэв маягтай харагдуулж, тэрхүү орчинг нь бүрдүүлж чадсан байна.



  Гурван жилийн турш барьсан уг номын сангийн барилга нь шилэн дээвэртэй нийтийн гудамжтай холбогдох Бинхай дүүрэгт байрлах соёл, шинжлэх ухааны таван гол барилгын нэг нь аж. Номын сангийн гол төвд буюу мэдээллийн ширээний ард аварга том бөмбөлөг хэлбэрт танхимыг төлөвлөжээ. Номын сан нь тус танхимын хоёр талд байрлах ба тойрч хүрээлсэн шат, давхаргуудад сууж ном унших тав тухтай орчинг бүрдүүлсэн байна.



  Номын тавиур бүхий давхаргууд тааз хүртэл үргэлжлэх ба гэрэлтүүлгийг оновчтой байршуулснаар тэдгээрийн загварыг тодотгож, гадна талаас фасадыг муруй хэлбэртэй харагдуулах аж.



  “Бинхай номын сангийн интерьер засал нь агуй хэлбэртэй, номын тавиуруудыг тасралтгүй үргэлжлүүлэн байрлуулсан өвөрмөц шийдэлтэй юм. Бид барилгын эзлэхүүнд хүрэхүйц их зүйл байршуулаагүй, дотор талд өвөрмөц орчинг бий болгохоор тэрхүү бөмбөлөг хэлбэрт танхимыг байгуулсан. Түүнчлэн барилгын дотор хэсэгт олон нийтэд нээлттэй орон зайг бий болгож, зочдод зориулан шинэ хэв маягийн танхимыг төлөвлөж өгсөн. Хамгийн гол нь номын тавиуруудын дэргэд тухлан сууж, дээш доош чөлөөтэй явж, хүссэн номоо авч унших боломжийг олгох гэж хичээсэн. Тавиурууд хооронд уншигчид номоо тухтай унших, алхах, өөр хоорондоо уулзаж, ярилцах боломжтой өнцөг, муруй булангуудыг гаргаж, эргэн тойрон бүх орчныг харж, бас бусдад харагдах нээлттэй орон зайг бий болгож чадсан” хэмээн “MVRDV” компанийн үүсгэн байгуулагчдын нэг Вини Маас өгүүлжээ.



  Барилгын доод хоёр давхар нь уншлагын танхим, номын тавиурууд, лаунж зэргээс бүрдэх бол дээд давхруудад уулзалтын өрөөнүүд, оффисийн хэсэг, компьютер тоног төхөөрөмж бүхий танхимууд, дээврийн хоёр давхарт тавцан төлөвлөсөн байна.