Хүн төрөлхтөн анх оршин суух сууцаа барьж байгуулж эхэлсэн үеэс мод, модон материал бидний амьдралд чухал үүрэг гүйцэтгэсээр ирсэн билээ. Модон материал нь бат бөх чанартай, дуу чимээ, дулаан тусгаарлах чанар харьцангуй өндөр гээд давуу тал ихтэй.

  Энэ нь дулаан тусгаарлах чанараараа бетоноос найм дахин, ган болон төмөрлөг материалаас 400 дахин их юм. Мөн уян хатан чанартай тул газар хөдлөлт болон бусад гадны нөлөөнөөс үүсэх эвдрэл, нуралт зэрэг аюул эрсдэл багатай, ашиглалтын хугацаа урт байдаг. Модон байшин нь өвлийн улиралд дулаан чанараа хадгалж, зуны халуун үед сэрүүн уур амьсгалыг бүрдүүлдгээрээ хүний ая тухтай амьдрах нөхцөлд нэн таатай юм.



Хавтгай савх мод

  Модон доторлогоо нь хөдөө орон нутагт төдийгүй хот суурин газрын байр сууцанд ч зохимжтой. Мод нь унтлагын өрөөнд дулаан, тавлаг орчныг бүрдүүлдэг, модон шал нь хөл нүцгэн явахад ч таатай. Модны тусламжтайгаар өрөөний загвар, заслын шийдлийг бүхэлд нь өөрчлөх боломжтой. Жишээлбэл, хана болон тааз хийж, өрөөний орон зайг өвөрмөц болгож, дотоод засалдаа тохирсон ор хийж болно.   



Блок хаус

  Блок хаус нь байшингийн дотор болон гадна заслыг хийхэд тохиромжтой материал бөгөөд таны сууцыг дүнзэн байшин мэт гайхалтай харагдуулна. Энэхүү амьсгалдаг модон материал нь хүний эрүүл мэндэд эерэг нөлөөтэйгөөс гадна тав тухтай, тансаг орчинг бий болгодог.

  Модон өнгөлгөө нь аливаа байшин, сууцанд шинэлэг шийдлийг бий болгож, өөрчлөн засахад хялбар, мөн зардал бага гаргадгаараа ач холбогдолтой юм. Та өөрийн хүсэл сонирхолд нийцүүлэн модон өнгөлгөөг байгалийн чулуу, сийлбэр зэрэг чимэг нэмэх зүйлстэй хослуулан давтагдашгүй гайхалтай шийдлийг бий болгох боломжтой.



Анхаарах зүйлс

  Модон материалыг зориулалтаас нь хамааруулан модны хатаалт, хагаралт, уян хатан чанар, чийгшил зэргийг нь сайтар анхаарч сонгох нь чухал. Ашиглах талбай, тасалгааны зориулалтаас шалтгаалаад хавтгай савх модыг зэрэглэлээр нь ялган сонгож болно.

  Мөн хана болон таазанд ашиглах зориулалтаас хамааран хавтгай савх модны нимгэн, зузааныг зөв сонгох шаардлагатай. Таазанд ашиглагдах хавтгай савх мод нь нимгэн, илүү хөнгөн чанартай байх ёстой бол, хана болон шаланд зузаан байх тусмаа илүү тохиромжтой.



  Мод нь байнга амьсгалж байдаг амьд материал учраас тасалгааны чийгшил ихсэх үед чийгийг өөртөө шингээж, багасах үед өөрөөсөө чийг ялгаруулан тэнцвэржүүлж байдаг байгалийн ухаалаг бүтээл юм.

  Мод, модлог материал нь бетон, цемент, шохой, эмульс, замаска зэрэг материалтай харьцуулахад хүний биед сөрөг нөлөө үзүүлдэггүй, эрүүл мэндэд эерэг нөлөөтэй. Технологийн дагуу байшин, барилгад модыг оновчтой ашиглах нь ашиглалтын хугацааг уртасгаж, хэт чийгших, ялзрах, мөөгөнцөр үүсгэдэггүй зэрэг нь хамгийн том давуу тал юм.

  Үүнийг зөвхөн зуслангийн байшин, амины орон сууцаар зогсохгүй орон сууцны оршин суугчид байрныхаа дотоод засалд хавтгай савх модоор доторлогоо хийж байгаа нь хүмүүс өнгө загвар, тав тухаас гадна эрүүл мэнддээ онцгой анхаарч байгаагийн нэгэн илрэл юм.


Зөвлөгөө мэдээллийг бэлтгэсэн “РЕЙК ХАУС”