Нийслэлийн орлогын талаас илүү хувийг Хувь хүний орлогын албан татвараас төвлөрүүлнэ
Монгол Улсын хүн амын тэн хагас нь амьдарч буй нийслэл ирэх онд төсөвтөө хэдэн төгрөг төвлөрүүлж, зарцуулах вэ гэдгийг өнөөдөр хэлэлцлээ. Нийслэлийн эдийн засаг, нийгмийг 2018 онд хөгжүүлэх үндсэн чиглэлийг хэлэлцэх үеэр хотын удирдлагууд ирэх онд хотын хөгжлийг хороодод чиглүүлэхээ илэрхийлсэн юм.
Хуулийн дагуу нийслэлийн 2018 оны төсвийн төслийг 11 дүгээр сарын 25-нд НИТХ-д өргөн барих ёстой. Ирэх оны нийслэлийн төсвийн төсөлд иргэдийн саналыг авах нь чухал. Тиймээс Нийслэлийн Засаг даргын орлогч нар, хотын удирдлагууд Улаанбаатар хотын иргэдийн саналыг авсан нь энэ юм. Хэлэлцүүлэгт нийслэлийн 9 дүүргийн иргэдийн төлөөлөл оролцов.
Нийслэл ирэх онд 729.9 тэрбум төгрөгийн орлого төвлөрүүлэхээр төлөвлөсөн бөгөөд үүний 58 хувийг Хувь хүний орлогын албан татвараас бүрдүүлэхээр болжээ.
2018 онд нийслэлийн төсөвт 729.9 тэрбум төгрөгийн орлого төвлөрүүлэхээр төлөвлөсөн нь 2017 оны батлагдсан төсвөөс 73.7 тэрбум төгрөгөөр буюу 13 хувиар нэмэгдсэн дүнтэй байна. Үүнээс суурь зардал нь 323 тэрбум төгрөг, улсын төсөвт төвлөрүүлэх орлого нь 208.5 тэрбум төгрөг байхаар тооцжээ. Ирэх онд гэр хорооллын дахин төлөвлөлтийн ажил үргэлжлэх бөгөөд 24 байршлын 75 хэсэгчилсэн талбайд инженерийн дэд бүтэц татах санхүүжилтийг суулгасан байна.
Түүнчлэн 2018 онд Орон нутгийн хөгжлийн нэгдсэн сангаас нийслэлд 16.3 тэрбум төгрөг хуваарилсан бөгөөд энэхүү хөрөнгийг нийслэлийн иргэдэд зайлшгүй хэрэгцээтэй бүтээн байгуулалтад зарцуулахаар төлөвлөжээ. Улмаар ирэх онд нийслэлийн төсвийн орлогын 58 хувийг Хувь хүний орлогын албан татвараас бүрдүүлэхээр төсөлд тусгасан байна.
Бүтээн байгуулалтын ажлын хүрээнд ирэх онд Замын цагдаагийн өмнөх уулзварын ажил, Сонсголон, Яармагийн гүүр болон Налайх, Чойрын замын ажлуудыг эхэлнэ гэдгийг хотын удирдлагууд онцлов. Мөн 1002 айлын орон сууцны ажил эхлүүлэхээр төсвийн төсөлд тусгасан бөгөөд 2020 он хүртэл түрээсийн орон сууцыг дор хаяж 10 мянгад хүргэнэ гэсэн зорилтыг дэвшүүлжээ. Түүнчлэн Улаанбаатар хотын түгжрэлийг бууруулах зорилготой орц, гарцыг чөлөөлөх ажил 2018 онд үргэлжлэх юм байна. Улмаар БНХАУ-аас орж ирэх 2 тэрбум төгрөгийн буцалтгүй тусламжийн хөрөнгөөс нийслэлийн алслагдсан хороод болох Баянхошуу, Толгойт, Хандгайт, Шаргаморьт, Дарь-Эх, Гачуурт зэрэг газарт усан сан байгуулах болон инженерийн дэд бүцийн шугам татахад зарцуулахаар төлөвлөжээ.
Мөн үеэр Нийслэлийн Дэд бүтэц, гэр хорооллын хөгжлийн асуудал хариуцсан орлогч П.Баярхүү 2017 оны төсвийн 60 орчим хувийг дэд бүтэц, барилгын ажилд зарцуулсныг онцолсон юм.
Төсвөөс хэрэгжүүлж буй бодлогын хүрээнд дунд хугацаанд татварын орчныг тогтвортой байлгаж, татвар хураалт, хяналт, эрсдлийн үнэлгээг бодитой, татвар төлөгчдөд чирэгдэлгүй байхад нийслэлээс анхаарах аж.
2018 оны төсвийн төслийн талаар саналаа хэлсэн иргэд дахин төлөвлөлтийн ажлыг эрчимжүүлэх, орон сууцны дулаан алдагдлыг бууруулах, гэрэлтүүлэг, камерын хяналтыг сайжруулах, дэд бүтэц, автозам, сургууль, цэцэрлэгийн хүртээмжийг нэмэгдүүлэх шаардлагатайг тодотгов.