Эрдэст нүүрсхүчлийн олон улсын байгууллагаас (MCI) нүүрстөрөгчийн хийг барилгын материал үйлдвэрлэлд ашиглах санаачилгыг гаргасан байна. Улмаар Австралийн компани нь дээрх санаагаа хэрэгжүүлэхийн тулд Ньюкэстл дэх Эрчим хүч, нөөцийн хүрээлэнд туршилтын станцаа нээжээ.

  “MCI” компаниас CO2-ыг барилгын материал болгон боловсруулах технологийг танилцуулсан юм. Тэд уул уурхайн “Orica” компанийн “Kooragang Island” ажиллагаанаас нүүрстөрөгчийн хий авахаар тохиролцсон аж. “The Guardian” сэтгүүлийн мэдээлснээр, хатуу карбонат үүсгэхийн тулд чулуун серпентениттэй нүүрстөрөгчийн нэгдлийг нэг цаг гаруйн хугацаанд боловсруулах юм байна. Тус компанийнхан өөрсдийн вэбсайт дээр тавьсан мэдээллээс харахад дээрх материалыг цемент, тоосго, заслын хавтан хийхэд ч ашиглаж болох гэнэ.

  Дээрх шинэ туршилтын станц нь гаргасан санаачилгынхаа хүрээнд анхны үйлдвэр нь болж байгаа юм. Үйлдвэрийг хариуцан ажиллуулж буй “MCI” нь шинэ үйлдвэрлэлийнхээ судалгааг хийж, барилгын материал үйлдвэрлэх туршилтаа хийх юм. Тэд барилгын салбарт зориулан 2020 он гэхэд 20 мянгаас 50 мянган тонн барилгын материал үйлдвэрлэхээр төлөвлөжээ.



  Гүйцэтгэх захирал Маркус Доуэ энэ талаар, “Бидэнд уур амьсгалын өөрчлөлттэй тэмцэх шийдэл хэрэгтэй. Эдийн засгийн хүрээнд нүүрстөрөгчийн хийн үнэлгээг тогтоож, түүнийг шийдэх технологи шаардлагатай байна. Сэргээгдэх эрчим хүчний технологийн нэгэн адил бидний санаачилсан энэхүү технологи цемент, ган, химийн үйлдвэрлэлийг нүүрснээс салгахад туслах зорилготой” гэжээ.

  Мелбурний их сургуулийн геологич Питер Күүк, “MCI компанийн танилцуулсан технологи нь химийн шинж чанартай ажиллагаа шаардах хэдий ч цаг уурын өөрчлөлтийн томоохон асуудлыг нэг шийдлээр шийдчихэж байгаа нь том дэвшил юм. Ийм төрлийн технологийг ашигласнаар орон нутагтаа мөнгө олох боломж маш өндөр. Тухайлбал, чулуулжсан түлшний ашиглалтаас жилд 36 тэрбум тонн нүүрсхүчлийн хий хэрэглэж байгаа нь маш том асуудал дагуулж байгаа шүү дээ” хэмээн өгүүлсэн байна.