Эхлэлийг "БАРИЛГА.МН" сэтгүүлээс...

- Ерөнхий инженер хүний гүйцэтгэх ажлын чиг үүргийг сонирхвол...

- Юун түрүүнд компанийн хэрэгжүүлж буй төслүүдийг 1-рт ХАБЭА-н аюул осолгүй, 2-рт чанарын гологдолгүй, 3-рт төлөвлөгөөний дагуу хугацаанд нь дуусгахыг үндсэн чиг үүрэг, эрхэм зорилго болгон ажилладаг. Энэ хүрээнд барилга байгууламжийг зураг төслийн шатнаас эхлэн баригдаж дуусах, хүлээлгэж өгөх  хүртэлх бүх үе шатанд тасралтгүй  хяналт тавьж, инженер техникийн ажилтнуудын өдөр тутмын ажилд чиглэл, зааварчилгаа өгөх, барилгын бүх талын техник асуудлыг цаг тухай бүр шийдвэрлэх, ХАБЭА-н эрсдэлийг урьдчилан тооцоолж, сэргийлэх арга хэмжээ авах, барилгын хяналтын төсөв, нарийвчилсан календарчилсан төлөвлөгөө боловсруулан хэрэгжилтэд хяналт тавих, үр дүнтэй, чанартай гүйцэтгүүлэх, удирдлагыг шуурхай мэдээллээр хангах зэрэгт гол чиглэл өгч ажилладаг. 

- Таны мэргэжлийн сайхан ба бэрхшээлтэй тал?

- Барилга, бүтээн байгуулалт нь тухайн улсын нүүр царай болж, хөгжлийн түвшинг нь илэрхийлж байдаг. Тиймээс бидний ажил Монгол Улсынхаа өнгөрсөн, өнөө, ирээдүй цагийн холбоос болж, хэн бүхний нүдэн дээр түүхийн бүтээл болон сүндэрлэж байдаг. Хүн гэдэг үнэт “капитал”-ын эрүүл, аюулгүй орчинд аз жаргалтай, насан туршдаа таатай амьдрах нөхцөлийг бүрдүүлдэг болохоор маш хариуцлагатай ажил мэргэжил юм. Энэ бүхэн миний мэргэжлийн бахархал.

Нүдэн дээр ил сүндэрлэн босч буй шинэхэн барилгаа хүлээлгэж өгөөд, түүний ард олон хүн баярлаж, залуу хосууд гал голомтоо бадрааж, амьдралынхаа хамгийн сайн сайхан мөчийг эхлүүлж байна гэж бодох сайхан шүү. Магадгүй миний мэргэжлийн таатай мэдрэмжүүдийн оргил нь энэ байж болох юм. 

Мэдээж бэрхшээлийг тоочоод байвал дуусашгүй. Хамгийн гол нь жаахан л хариуцлага алдвал ажилчид бэртэх, гэмтэх цаашлаад амь насанд нь ч аюул учрах эрсдэл байдгийг цаг тутам бодож, анхаарч байх ёстой. Энэ нь ерөнхий инженер хүний хувьд сэтгэл зүйн дарамт, ачаалал болж байдаг. Мөн инженер хүний хариуцлагагүй үйлдлээс болж чанар муутай барилгууд баригдаж, нурах аюулд ч хүргэж болно. Иймд бид алдах эрхгүй, мөн өндөр хариуцлагыг хүлээж ажилладаг хүмүүс байдаг.



- Таны ажлын нэг өдөртэй танилцъя гэвэл...

- Би ер нь ажлаа тодорхой дэс дараалал, цаг хугацаатай, төлөвлөлтийн дагуу явуулахыг эрмэлздэг. Барилгын талбай дээрх ажил маань өглөөний 8 цагаас эхэлдэг. Бүх ажилтнууд цагтаа цугларч, өглөөний дасгалаа хийснээр бидний ажлын нэгэн өдөр эхэлдэг. Дараа нь  өөрийн компанийн инженер технкийн ажилтнууд болон туслан гүйцэтгэгч байгууллагуудын инженерүүдтэй өглөөний шуурхай хуралдааныг зарлаж, урд өдрийнхөө гүйцэтгэсэн ажил, өнөөдрийнхөө гүйцэтгэх ажил, анхаарах асуудлын талаар ярилцаж шийдвэр гаргадаг.

Шуурхай дээр үүрэг даалгавар авсан инженерүүд өөрсдийн хариуцаж буй ажилчдад мэдээллээ дамжуулж, гүйцэтгэх ажлын төлөвлөгөө, ХАБЭА-н зааварчилгаа өгснөөр талбайн ажил эхэлдэг. Миний хувьд шуурхай хурлын дараа инженер, техникийн ажилтнуудтай талбайгаар 11 цаг хүртэл явж, ажлын явцтай танилцаж, тулгамдсан  асуудлыг  газар дээр нь шийдвэрлэхийг зорьдог. Дараа нь үдийн цай хүртэл и-мэйл шуудангаа шалгах, хариу өгөх, материал захиалгыг хянах, туслан гүйцэтгэгч компаниудын ажлыг хурдавчлах зэрэгт анхаарлаа хандуулдаг. Үдээс хойшдоо доголдож байгаа ажлууд болон тулгамдсан асуудлуудыг шийдвэрлэхэд төвлөрч ажилладаг даа.

Ер нь Даваа гараг бүрийн өглөөний 9 цагт төсөл ахалж буй инженер, техникийн ажилтнууд өөрсдийн төслийн 7 хоногийн тайлан, төлөвлөгөөг компанийн Гүйцэтгэх захиралд танилцуулан, үүрэг даалгавар авч, биелэлтийг хангаж ажилладаг. Мягмар гараг бүр нийт туслан гүйцэтгэгчдийн инженерүүдийг талбай дээр нэгтгэж, ажлын уялдаа холбоо, материалын чанар, ажлын гүйцэтгэл, хүн хүч, хөдөлмар аюулгүй байдлын зөрчил, тулгамдсан асуудлуудын талаар хуралдаж, зөвлөлддөг. Энэ нь манай байгууллагын аюул осолгүй, чанарын гологдолгүй, гүйцэтгэл өндөртэй ажиллаж байгааг харуулдаг нэг чухал алхам, үзүүлэлт гэж боддог.

- Ер нь энэ их ажлыг хийж гүйцэтгэхэд сайн төлөвлөлт чухал байх даа?

- Тийм шүү. Төслийн ажлыг эхлүүлэхийн өмнө барилга угсралтын ажил гүйцэтгэх календарчилсан төлөвлөгөөг урьдчилан гаргадаг. Энэ нь төлөвлөгөөний дагуу ажлаа урьдчилан харж, зөв шийдвэр гаргахын зэрэгцээ аливаа эрсдэлээс сэргийлдэг гэж боддог.   Мөн өдөр тутам хийх ёстой ажлыг орой гэртээ очоод гар утасныхаа тэмдэглэл дээр бичиж тэмдэглээд, маргааш нь нэг нэгээр нь гүйцэтгээд шалгаад явдаг. Өдөр тутмын ажлаа ингэж төлөвлөх нь “Юуг ч мартахгүй, орхигдуулахгүй гүйцэтгэх” гэсэн миний гол зарчим гэж үзэж болно.

- Ажлаа хийхдээ, ажлын талбар дээр таны баримталдаг гол зарчим юу вэ?

- “Эхэлснээ дуусгаж чаддаг байх хэрэгтэй” гэсэн зарчмыг ягштал баримталдаг даа.

- Өөрийнхөө онцлог зан чанар, чадварыг цөөн үгээр хэлбэл...

- Ямар ч ажилд чин сэтгэлээр хандахыг эрхэмлэдэг. Ээж, аав маань ч ингэж сургасаар ирсэн. Шаардлагатай үед шөнө дөл болтол, үүр цайтал, хагас, бүтэнсайн өдөргүй ажилладаг. Ажлын ачаалал, хариуцлага өндөр ч гэлээ дараа нь үр дүнг нь хараад бахархаж баярладаг шүү. Магадгүй хамт олон, удирдлагуудын минь надад өгдөг урам, итгэл нь намайг тэвчээртэйгээр, хариуцлагатайгаар ажлаа гүйцэтгэхэд хүч тэнхээ өгдөг болов уу. Ажил бүхэн үр дүнтэй байдаггүй ч, зүтгэлээ гаргаж хийсэн бүхэн хүний сэтгэлд заавал хүрдэг.  Тиймдээ ч би ажилдаа бүхий л сэтгэл, зүрхээ шингээж бас итгэж ажилладаг. Үүгээрээ бусдад үлгэр дуурайл болохыг эрмэлздэг. Энэ бүхэн миний үнэт зүйл гэж хэлж болох юм. Мөн мэргэжил нэгт нөхдийнхөө давуу тал, туршлага, алдаа онооноос суралцаж, өөрийгөө үргэлж хөгжүүлж, зорилготой амьдрахыг хичээж байна.

- Хийж буй ажлаасаа авдаг хамгийн гоё мэдрэмж?

- Мэдээж, хэн бүхний өмнө сүндэрлэх их бүтээн байгуулалтын дараах мэдрэмж... Барьсан барилга маань Монгол түмэнд маань аз жаргал, инээмсэглэл бэлэглэж, энд ажиллаж, амьдарч нэгэн зууны түүхийг бичилцэнэ гэж бодох тэр агшин.

- Хэлэх дуртай үг? 

- “Бид хийхгүй бол хэн хийх вэ? Одоо хийхгүй бол хэзээ хийх вэ?”, “Бурхан чамайг бүтээсэн юм бусдад хэрэгтэй гэж... Бусдыг нь чамд үлдээсэн юм бүтээж чадна аа гэж…” гэх эдгээр үгсийг хэлж эрч, хүч авч байдаг даа.



- Барилгын салбараа сайжруулах, хөгжүүлэх тал дээр ямар бодолтой явдаг вэ?

- Юун түрүүнд БНбД-үүд, барилгын төсвийн программыг шинэчлэх шаардлагатай гэж боддог. БНбД-үүд хэт хуучирсан, ОХУ-ын үеэ өнгөрөөсөн норм дүрмийг шууд хуулбарласан байдаг. Гэтэл өнөөдөр хэддүгээр зуун, ямар эрин үе эхэлсэн билээ. Бид одоо олон улсын стандартад нийцсэн норм, дүрмтэй болох шаардлага яалт ч үгүй тулгараад байна. Монголд олон улсын төсөл хэрэгжүүлэхэд гадныхан манай норм дүрмийг шаардлага хангахгүй гэж үздэг.

Ашиглаж буй төсвийн программ маань мөн адил хуучин норм дүрмээс үндэслэл авч программчлагдсан байдаг. Энэ нь орчин үеийн материал, техник технологи, цалингийн зардалтайгаа зөрчилддөг. Жишээ нь, төсвийн программ дээр ажилтнуудын цалингийн зардлыг тооцохдоо тэднийг 6 зэрэгт хувааж ур чадвараар нь ангилж цалинжуулсан байдлаар боддог. Гэтэл амьдрал дээр барилгын ажлыг гүйцэтгүүлэхдээ бригад буюу хэсэг бүлэг хүмүүстэй гүйцэтгэх ажлын талбайг нэгж метр квадратын үнээр тохиролцох хэлбэрээр гүйцэтгүүлдэг. Үүнээс шалтгаалж төсвийн программ дээр тооцсон цалингийн зардал бодит гүйцэтгэл дээр өндөр гардаг.

Миний бодлоор ажил гүйцэтгэх нэгж метр квадратын хөлс болон зарагдаж байгаа барилгын материалын үнийг төр засгаас бодлого зохицуулалтаар тогтворжуулж, энэ жилд тус ажлыг ийм хөлсөөр гүйцэтгүүлнэ, зарагдаж байгаа барилгын өргөн нэр төрлийн материалуудыг ийм үнээр зарна гэж батлаад түүний хэрэгжилт дээр дэмжлэг үзүүлж ажиллах хэрэгтэй. Арматур болон цементийн үнэ нь нийлүүлэгчээс шалтгаалж нэлээд хэлбэлзэлтэй байдаг. Энэ нь барилга баригдах өртгийг өндөрсгөж, анх тооцоолж байснаас өөр үр дүн гарахад хүргэдэг.

- Ажил дээр гарсны дараа эргэн харахад боловсрол мэргэжил олгож буй тогтолцоо ямар санагдав?

- Манай боловсролын тогтолцоо хоцрогдсон хуучны сурах бичиг, арга барилаараа сургалтыг явуулаад байгаа санагддаг. Их, дээд сургууль төгсөөд ажлын талбар дээр гарахад зааж, сургасан зүйлс нь хоцрогдсон, төсөөлж байснаас огт өөр байх жишээтэй зүйлс цөөнгүй тохиолддог. Техник технологийн хөгжил өдрөөр биш цагаар хэмжигдэж буй энэ цаг үед дэлхий дахинд ямар барилга байгууламжууд баригдаж, дэвшилтэт ямар технологи, материал ашиглагдаж байгааг цаг алдалгүй судалж, сургалт, мэдээллийг багш, сурган хүмүүжүүлэгчид маань оюутнууддаа тогтмол өгдөг байх хэрэгтэй.

- Харин таны мэргэжлийг эзэмшиж буй дараа үеийн залуустаа хандаж хэлэх зөвлөгөө байна уу?

- Би өөрөө залуу хүн учраас нэг их зөвлөгөө өгнө гэж юу байхав /инээв/. Гэхдээ миний баримталдаг гол зарчим бол аливаа ажлыг хийхдээ жижиг гэлтгүй сэтгэлээ зориулж хийх явдал. Чин сэтгэлээ зориулж хийсэн бүхэн хүнийн сэтгэлд заавал хүрдэг гэж түрүүхэн хэлсэн шүү дээ. Үүнийг хүн бүхэн мэддэг ч гагцхүү хэрэгжүүлэх нь таны, миний хэрэг.

- Ярилцлагын төгсгөлд...

- Бидний барьсан барилга, бүтээн байгуулалтууд та бүхэнд, айл өрх бүхэнд  аз жаргал бэлэглэж байх болтугай.
 
Эрч хүчтэй, гэгээлэг сайхан ярилцлагын эзэн танд их бүтээн байгуулалтын өндөр амжилтыг хүсье.