Тэнгэр баганадсан сүрлэг барилгууд ар араасаа өрсөн баригдсаар буй энэ үед олон нийтийн анхаарлыг эрхгүй татаж буй нэгэн цамхаг Дубай хотын төв гудамжнаа сүндэрлэх гэж байна.

  Santiago Calatrava компанийн зохион бүтээсэн загвараар хэрэгжүүлж буй Дубайн “Creek” цамхгийн барилга угсралтын ажил явагдаж буйг харуулсан танилцуулга бичлэг, гэрэл зургууд олон нийтийн хүртээл болжээ. Тэдгээр танилцуулгуудад 6 км.кв талбай бүхий цогцолбор байгууламжийн барилгын ажлын явцыг харуулж, 828 метр өндөртэй алдарт Бурж Халифаас ч өндөр цамхаг гэдгийг нотлон харуулсан байна.



  Дубай хотод баригдаж буй шинэ цогцолборын төслийг Emaar Properties болон Dubai Holdings нар хамтран гүйцэтгэж байгаа бөгөөд төв хэсэгт нь дээрх 928 метрийн өндөртэй цамхаг баригдах аж. Тус цамхгийн зөвхөн суурьт нь л гэхэд 5.3 км.куб бетон бүхий 71 метр гүн суурийг төлөвлөжээ.

  Сараана цэцэг болон сүм хийдийн минаретуудыг бэлгэдсэн уг цамхаг нь 360 хэмд эргэн тойрныг ажиглах тавцан болон Вавилон загварын шалтай өргөгддөг цэцэрлэг, 110 мянган метр орчим кабель утастайгаараа онцлог аж. Өнгөрсөн онд эхлүүлсэн тус төслийн ашиглалтад орох хугацааг одоо болтол зарлаагүй байгаа юм. Эх сурвалжуудын мэдээлж буйгаар 2020 онд болох Дубайн экспогийн өмнө дуусч магадгүй гэнэ.