Өнөөдөр Төр-нийгмийн нэрт зүтгэлтэн, Барилга, барилгын материалын үйлдвэрлэлийн яамны сайдаар хорь гаруй жил ажилласан О.Тлейханы дурсгалыг хүндэтгэн, түүний үр хүүхдүүд дурсгалын самбарыг нь шинэчлэн засварласнаа нээж, ахмад барилгачдадаа хүндэтгэл үзүүллээ.

  Энэхүү дурсгалын самбарыг сэргээн засварлаж, түүний нэрэмжит “О.Тлейхан сан”-гийн үйл ажиллагааг явуулах нь тухайн үеийн хөдөлмөрч бүтээлч ард түмнийхээ хүмүүжил, ажилсаг хичээнгүй зан чанар, ёс суртахуунтай төлөвшлийг одоо үеийн залуустаа өвлүүлэн уламжилж авч үлдэх, ажилч хичээнгүй хойчийг бэлтгэн сургах зорилготой гэдгийг түүний хүү О.Бакыт ярьсан юм.



  1923 онд төрсөн О.Тлейхан нь 1940-өөд оны үеэс нийгмийн бүхий л салбарт ажиллаж байжээ. Тэрбээр “Хөдөлмөр” сонины эрхлэгч, Барилгын яамны намын хороон дарга, Үйлдвэрчний төв зөвлөлийн нарийн бичгийн дарга, Аймгийн гүйцэтгэх захиргааны орлогч дарга зэрэг албыг гүйцэтгэж байгаад 1961 оноос 1982 он хүртэл 20 гаруй жилийн хугацаанд Барилга, барилгын материалын үйлдвэрлэлийн яамны сайдаар ажиллаж байлаа. Манай улсад барилгын салбар эрчимтэй хөгжиж, Улаанбаатар хот өнгө төрхөө олж, хөгжил цэцэглэлтийн суурь тавигдсан 1960, 1970-аад он бол бүтээн байгуулалтын жилүүд байсан. Энэ үед аж үйлдвэрийн томоохон бүтээн байгуулалтууд, Дархан болон Эрдэнэт хот баригдаж эхэлсэн түүхэн цаг үе байсан. Тэгвэл түүхэн цаг үеийн бүтээн байгуулалтын их салбарыг удирдаж явсан хүн нь яах аргагүй бидний заавал дурсах ёстой эрхэм хүндтэй хүн – О.Тлейхан юм.



  Түүний талаар хамтран зүтгэгчид нь дурсахдаа, “О.Тлейхан гуай зангарагтай, зарчимч, шаардлага өндөртэй хүн байсан. Бидний үед ББМҮЯ-нд барилга барих төлөвлөгөөг биелүүлэх, төлөвлөсөн барилгаа хугацаанд нь ашиглалтад оруулах гэсэн үүрэг даалгаврыг авч ажилладаг байлаа. Яам төлөвлөгөө, санхүү, материал, үйлдвэрлэлийн газар, барилгын үйлдвэрлэл, техникийн гэсэн гол хэлтсүүдтэй, 80 гаруй ажилтантай байсан.



Монгол Улсын Гавьяат барилгачин О.Тлейханы хүү Т.Бакыт, “Өнөөдөр бидний эцэг О.Тлейханы дурсгалыг хүндэтгэн, түүний дурсгалын самбарыг шинэчилснээ нээж байна. Зөвхөн түүний дурсгалыг мөнхжүүлэх бус, Монгол Улсыг хөгжүүлэхэд гар бие оролцон ажиллаж явсан олон олон мянган барилгачдын алдар гавьяаг мөнхжүүлэх, тэдний хийж бүтээсэн ажлыг хойч үедээ таниулах зорилготой юм. Эх орон, ард түмэн, ажилчин ард иргэдийнхээ тухайн үеийн хүмүүжил төлөвлшлийг залуу хойч үед нь өвлүүлэн сургах, тэднийг эх оронч сэтгэлтэй болгох зорилготойгоор ‘О.Тлейхан сан’-г мөн ажиллуулж байна. Бүтээн байгуулалтуудыг хийж бүтээлцсэн, хамтран ажиллаж, мөр зэрэгцэн зүтгэж явсан олон хүний хөдөлмөр бүтээлийг таниулахад энэхүү сангийн үйл ажиллагаа чиглэж байгаа.

  Энэхүү дурсгалын самбарт хүндэтгэл үзүүлэн гэр бүлийнхнээс минь гадна барилгын салбарт аавтай минь хамтран зүтгэж, мөр зэрэгцэн ажиллаж явсан түүний нөхөд, БХБЯ-ны Төрийн захиргаа, удирдлагын газрын дарга У.Отгонбаяр, Инженерийн дэд бүтцийн бодлогын хэрэгжилтийг зохицуулах газрын дарга Б.Соёмбоо нар энд оролцож байгаад талархлаа илэрхийлье.”



МУ-ын Гавьяат барилгачин Л.Цэрэндондог, “Барилга, барилгын материалын үйлдвэрлэлийн яамны сайдаар хорь гаруй жил ажиллах хугацаандаа О.Тлейхан нь Монголын барилгыг хөгжүүлэх, ялангуяа барилгын инженер, мэргэжилтэй ажилчдыг бэлтгэхэд, барилгын үйлдвэрлэлийн баазыг бэхжүүлэхэд ихээхэн үүрэг гүйцэтгэсэн чухал хүн, Гавьяат барилгачин, манай төр-нийгмийн зүтгэлтэн юм. Аливаа ажилд өндөр шаардлага тавьдаг, хариуцлагыг хатуу тооцож, дэг журамтай байдалд биднийг хүмүүжүүлж, ажилд чин сэтгэлээсээ хандаж сургасан хүн юм. Түүний зааж сургаж байсан арга барил, хүмүүжил өнөөдөр ихээхэн үгүйлэгдэж байна”.