Монгол Улсын Их сургууль 75 жилийн ойн хүрээндээ олон улсын стандартад нийцсэн шинэ номын санг ашиглалтад оруулж, нээлтийн үйл ажиллагаа өнөөдөр боллоо. Номын сангийн нээлтийн ёслолын ажиллагаанд Монгол Улсын Ерөнхийлөгч Х.Баттулга, Боловсрол соёл, шинжлэх ухаан, спортын сайд Г.Чулуунбаатар, МУИС-ийн захирлын үүрэг гүйцэтгэгч Я.Төмөрбаатар нар оролцов.

Тус барилгын ажлын зураг төслийг “N.A.P” ХХК, гүйцэтгэгчээр “Барилга корпораци” ХХК ажилласан юм.

МУИС-ийн номын сангийн барилга нь 7 давхар ч, 11 давхар барилгатай тэнцэхүйц өндөр бөгөөд барилгын шавыг 2015 оны 8 сард тавьж, 2017.04 сард Улсын комисст хүлээлгэн өгчээ. Нийтдээ 1,7 жилийн хугацаанд “Барилга корпораци” ХХК-ийн 120 гаруй инженер, техникийн ажилтнууд болно туслан гүйцэтгэгч зургаан компани хамтран бүтээн байгуулсан байна.


             Ерөнхийлөгч Х.Баттулга, “Би Монгол Улсын Ерөнхийлөгч болохдоо нэг сайхан номын сан байгуулж нээх юмсан гэж бодож байсан. Тэгвэл өнөөдөр МУИС 75 жилийн ойгоороо ийм сайхан номын сан нээж байгаад их баяртай байна. МУИС-ийн үе үеийн эрдэмтэн мэргэд, багш нарт сургуулийн 75 жилийн ой, номын сангийн нээлтийг тохиолдуулан баяр хүргэе. Бид дандаа гаднынхны хийсэн зураг төслөөр ажил хийж, ийм болох юмсан гэж боддог байсан үе саяхан. Тэгвэл МУИС-ийн шинэ номын сангийн интерьер дизайнаас эхлээд барилга байгууламж, тавилга, бүх зүйлийг Монголын компаниуд хийсэн тухай танилцуулж байгаа нь бахархалтай байна. Баяр хүргэе.” гэсэн юм.

       Энэхүү дижитал номын санд зургийн үзэсгэлэн, номын нээлт, эрдэм шинжилгээний уншлага хийх, зохион байгуулах бусад салбаруудтай хамтран эрдэм шинжилгээний төсөл хэрэгжүүлэх зэрэг олон талт үйл ажиллагаа явуулах бүрэн боломжтой аж. Номын сангийн I-IV давхрын баруун жигүүрт уншлагын танхим, зүүн жигүүрт хичээлийн танхим, V, VI давхрыг лабораторийн зориулалтаар барьжээ. 


        “Барилга корпораци” ХХК-ийн гүцэтгэх захирал Ш.Эрдэнэбат, "Энэхүү номын сангийн барилгад МУИС-ийн өөрийн санхүүжилтээр 16 тэрбум төгрөгийг зарцуулсан. Барилга нь бүрэн цутгамал каркасан, шилэн фассад бүхий 16 мянган метр.квд талбайтай бөгөөд үүнээс ашигтай талбай нь 13 мянган метр.квд байна. Зураг төслийнхөө дагуу баригдсан. Энэ нь Монгол Улсын цахим номын сан болж буй юм. Хоёр лекцийн танхим, зургаан уншлагын танхим, архивын өрөө, ном сэргээн засварлах лаборатор зэрэг 29 лаборатортай, МУИС-ийн түүхийн музей, кофе шоф зэргийг нэг дор төвлөрүүлсэн. Мөн барилга өөрийн саарал усыг бүрэн дүүрэн ашиглах эргэн ашиглах юм." гэлээ.

        Зарим оюутны хувьд номын санд хонож хичээлээ хийх, шалгалтад бэлтгэх шаардлага гардаг. Тиймээс номын сангийнхаа нэг танхимыг 24 цагийн үйлчилгээтэй болгох аж. Түүнчлэн МУИС-ийн оюутан төдийгүй нийслэлийн иргэд үйлчлүүлэх боломжтой гэнэ.