Маш бага зардлаар гоёмсог, орчин цагийн загварын сууц барьж болдгийг Канзасын их сургуулийн Архитектурын ангийн оюутнууд батлан харууллаа. Тэд “Studio 804” компанитай хамтран барилгын хог хаягдлыг дахин ашиглаж үйлдвэрлэсэн материалаар Лоуренс хотын ойролцоо, ажилчдын тойрогт энэхүү байшинг барьжээ.

  Энэ нь тэдгээр оюутнуудын өмнө нь хэрэгжүүлж байсан төслийн нэгэн адил эрчим хүчний хэмнэлттэй, нарны цахилгаан үүсгүүрээс хэрэглээгээ хангах хүчин чадалтай байшин аж. Нийт 120 м.кв бүхий уг байшин зочны өрөөнөөс гадна унтлагын гурван өрөө, угаалгын хоёр өрөөтэй юм байна.

 Архитектор залуус эргэн тойрон, хөрш зэргэлдээх газрын онцлогт байшингийнхаа загварыг уусган зохицуулахын тулд маш анхааралтай ханджээ. Гэрийн гаднах задгай хэсгийг теннисний талбайгаас тусгаарлахын тулд өвөрмөц хаалтыг хийж өгчээ.

  Зохион бүтээгчид нь LEED платиниум стандартын дагуу байшингийн загварыг нийцүүлж, гэрэл болон сүүдрийг гадна, дотор засалд маш өвөрмөцөөр ашиглаж чадсан байна. Барилгыг барихад металл хавтангууд, тусгаарлагч шил зэргийг голлон ашиглажээ.