УИХ-ын гишүүн, БХБ-ын сайд Х.Баделхан өчигдөр БНХАУ-аас Монгол Улсад суугаа Онц бөгөөд Бүрэн эрхт Элчин сайд Шин Хайминыг хүлээн авч уулзлаа. Уулзалтын эхэнд Элчин сайд Шин Хайминь Х.Баделханыг Барилга, хот байгуулалтын сайдаар томилогдсонд баяр хүргэж хоёр орны барилга, хот байгуулалтын салбар дахь хамтын ажиллагааг идэвхтэй хөгжүүлнэ гэдэгт итгэлтэй байгаагаа илэрхийлэв. Тэрбээр хоёр орны Засгийн газрын холбогдох шийдвэрүүдийн дагуу хэрэгжиж эхлээд байгаа болон цаашид хэрэгжүүлэх төсөл хөтөлбөрүүдийг дурдаж ажил хэрэг болгохоор хамтын ажиллагаагаа идэвхжүүлэх хүсэлтэй байгаагаа уламжлав. Үүнд: “Замын-Үүдийн дэд бүтцийг сайжруулах төсөл” мөн болон гэр хорооллыг барилгажуулах, инженерийн дэд бүтцийн хөгжүүлэх “Улаанбаатар хотын VII, XIV, МҮОНРТ-ийн орчмын хорооллын орон сууц, дэд бүтцийн төсөл”-ийг хэрэгжүүлж дуусгахад таны дэмжлэг чухал ач холбогдолтой онцлов.



  Харин Сайд Х.Баделхан БНХАУ-ын Элчин сайдтай уулзаж байгаадаа талархал илэрхийлж БНХАУ байгуулагдсаны 68 жилийн баярын мэндийг уламжлан, саяхан болж өнгөрсөн ХКН-ын 19-р их хурлаар БНХАУ-ын хөгжлийн талаарх олон сайн мэдээг сонссондоо таатай байгаагагаа илэрхийллээ. Мөн АСЕМ-ын үеэр БНХАУ-ын Төрийн зөвлөлийн дарга Ли Көцян Монгол Улсын Засгийн газарт 1 тэрбум юанийн буцалтгүй тусламж олгохоор амласан. Үүнээс 350 сая юанийн буцалтгүй тусламжийг барилгын салбарт, “1000 айлын түр орон сууц” төсөл, мөн “Бүс ба зам” олон улсын арга хэмжээний үеэр Монгол Улсын Ерөнхий сайд Ж.Эрдэнэбат БНХАУ-ын дарга Ши Жиньпинтэй уулзах үеэр манай улсад ирэх гурван жилд 2 тэрбум юанийн буцалтгүй тусламжийг гэр хорооллын дахин төлөвлөлт, түүний инженерийн дэд бүтцийг сайжруулах, инженерийн дэд бүтэц хүрэлцээгүй гэр хороололд “Сервис центр” бичил дэд төвүүдийг байгуулахад зориулан олгох болсон зэрэг ажлыг эхний ээлжинд ажил хэрэг болгоход дэмжлэг үзүүлнэ гэдэгт итгэж байна. БНХАУ бол манай улсын стратегийн томоохон түнш, тэр дундаа барилгын салбарын томоохон хөрөнгө оруулагч орны хувьд улс орны нөхцөл байдлыг сайн ойлгож ирэх оны эхээр дээрх төсөл хөтөлбөрүүдийн хөрөнгө оруулалтын асуудлыг шийдэж яаралтай ажлаа эхлэхэд Элчин сайд Таныг туслалцаа үзүүлнэ гэдэгт итгэж байна гэлээ.

  Дээрх төслүүдээр хоёр тал санал нэгтэй байгаагаа илэрхийлэн ирэх оны эхээр хэрэгжилтийг эрчимжүүлэх, буцалтгүй тусламжийн зохих журмын дагуу тодорхой ажлуудыг хийхээр идэвхтэй ажиллахаа амласан юм. Элчин сайд Шин Хаймин УИХ-ын гишүүн, БХБ-ын сайд Х.Баделханд ажлын өндөр амжилт хүсч, хамтын ажиллагааг шинэ шатанд гаргахын төлөө гар, сэтгэл нийлж ажиллахдаа таатай байна гэв.