Амстердам хотын хуучин шоронгийн барилгыг технологийн дэвшлийн ачаар шинэчлэн байгуулж, олон нийтэд зориулсан томоохон цогцолбор болгохоор шийдвэрлэжээ. Нидерланд улсын засгийн газар 135,000 м.кв талбай бүхий томоохон бүтээн байгуулалтын 7.5 га газарт нь хэрэгжүүлэх төслийн мастер төлөвлөгөөг гаргасан байна.

  FABRICations architects болон LOLA Landscape компаниудын хамтран гүйцэтгэх уг төслийн мастер төлөвлөгөөний дагуу Баржес Квартир дахь шоронгийн цогцолборын зургаан цамхгийг өөрчлөн шинэчлэхдээ хог хаягдлыг дахин ашигласан барилгын материалыг хэрэглэж, сэргээгдэх эрчим хүчийг бүрэн ашиглах аж.



  1970-аад оны үед Амстердамын Амстел төмөр замын зогсоолын ойролцоо баригдсан Бижелмербажес шоронгийн цогцолборыг 2016 оны 6-р сард албан ёсоор хааж, дахин төлөвлөлт хийхээр болжээ. Төсөлд хамруулсан дээрх зургаан цамхаг болон гол байгууламжууд нь Амстердамын шинэ хот төлөвлөлтийн бүст харьяалагдаж байгаа юм.



  Одоо байгаа хананаас үлдсэн хэсгийг шинэ орон сууцны барилгын материал болгон хэрэглэж, хайс хашлагууд болоод зарим хавтан хаалгануудыг мөн явган гүүр болгон дахин ашиглаж буй аж. Уг төслийн гол онцлог нь ямар ч автомашингүй, ногоон байгууламжаар дүүрэн тав тухтай орчныг бүрдүүлэх явдал бөгөөд явган хүмүүст зориулсан төрөл бүрийн урсдаг болон цахилгаан шат, бусад зөөврийн хэрэгслүүдийг суурилуулах юм.



  Мастер төлөвлөгөөний дагуу энд 1,350 айлын сууц байрлахаас зарим хэсгийг түрээсийн болон тансаг зэрэглэл болгон ангилжээ. Мөн 30 орчим хувь нь амины орон сууц байх аж. Харин дээрх зургаан цамхгийн нэгийг хэвээр нь үлдээж, босоо цэцэрлэгт хүрээлэн бүхий байгууламж болгохоор шийджээ. Цогцолборын төв хэсэгт байрлах энэ хэсэгт уран зураг, дизайны төв байрлах юм. Мөн эргэн тойронд нь зоогийн газар, эрүүл мэндийн төв, сургууль, цэцэрлэгт хүрээлэн, газар доорх үйлчилгээний төв зэргийг байгуулах аж.



  Хамгийн чухал нь эдгээр бүх барилга байгууламжийн цахилгаан, дулааны хэрэглээг нар, салхи, био зэрэг сэргээгдэх эрчим хүчээр хангаж, эрчим хүчийг дээд зэргээр хэмнэх төлөвлөлтийг гаргасан байна. Мөн уг бүтээн байгуулалтад хэрэглэж буй бүхий л барилгын материалыг 100 хувь хог хаягдлаар хийсэн барилгын материал байх аж.

Төслийг 2018 онд албан ёсоор хэрэгжүүлж эхэлнэ.