Гурван сарын өмнө 1.5 их наяд төгрөг байсан Монголын хөрөнгийн зах зээлийн үнэлгээ энэ сард хоёр их наяд төгрөг давлаа.

         Зах зээлийн арилжаа идэвхжиж, үнэлгээ ийнхүү өсөхөд I болон II ангиллын "Таван толгой", "АПУ", "Сүү", "Говь" болон "МИК" гэсэн Топ-5 компанийн өсөлт голлон нөлөөлсөн байна.

Монгол Улсын зах зээлийн үнэлгээний 65 хувийг 227 тэрбум төгрөгийн үнэлгээтэй МИК бүрдүүлж байна.

"Таван толгой" компанийн хувьд хувьцааны ханш долдугаар сард 4500 төгрөг байсан бол есдүгээр сарын байдлаар 9100 төгрөг даваад байгаа юм. Мөн компанийн зах зээлийн үнэлгээ даваа гарагийн арилжаагаар 479 тэрбум төгрөгт хүрч сүүлийн гурван сард 240 тэрбумаар өссөнийг "Засгийн газрын мэдээ" сонин онцолжээ. БНХАУ-ын зах зээлд нүүрсний үнэ нэмэгдсэнтэй холбоотойгоор тус компанийн хувьцааны ханш огцом өсөөд байгаа юм. Компани энэ оны эхний хагаст 57 тэрбум төгрөгийн ашигтай ажиллаж, хувьцаа эзэмшигчдэдээ 541.39 сая төгрөг хуваарилсан байна. Харин "АПУ" компанийн хувьцааны ханш зургадугаар сард 271 төгрөгөөр арилжигдаж байсан бол өнөөдөр 610 төгрөг болж өсөөд байна. Үүнийг дагаад компанийн зах зээлийн үнэлгээ 472 тэрбум төгрөгт хүрчээ. "Эвергрийн инвестмент" компанитай нэгдэх явц нь үүнд гол нөлөө үзүүлсэн байна. Нэгдэн нийлэх энэхүү хэлцэл ирэх 11 дүгээр сард эцэслэгдэх товтой байгаа бөгөөд үүний дүнд компани хаалттай хүрээнд нэмэлт хувьцаа гаргаж, хувьцаагаа 1050 төгрөгөөр борлуулахаар төлөвлөөд байгаа юм.

Үүнээс харвал хоёр компанийн 975 тэрбум төгрөгийн зах зээлийн үнэлгээ нь Монголын хөрөнгийн зах зээлийн бараг тэн хагасыг бүрдүүлж байна. Харин нийт зах зээлийн үнэлгээний 65 хувийг 227 тэрбум төгрөгийн үнэлгээтэй Монголын ипотекийн корпораци (МИК), 144 тэрбум төгрөгийн үнэлгээтэй "Говь", 57 тэрбум төгрөгийн үнэлгээтэй "Сүү" компаниуд тус тус бүрдүүлж байна.