Ногоон барилгын сэдвийг хөндсөн дэлхийн хамгийн том уулзалт зөвлөгөөн энэ оны 11 дүгээр сарын наймнаас арван хүртэл АНУ-ын Бостон хотноо зохион байгуулагдана.

  Энэ удаагийн “Greenbuild International Conference and Expo” буюу Ногоон барилгын олон улсын зөвлөгөөн, үзэсгэлэн яармаг нь барилгын экспертүүд, мэргэжилтнүүд, удирдах ажилтнуудыг хамруулж, олон талын асуудлыг хөндөн хэлэлцэхээр төлөвлөжээ. Тухайлбал, мэргэжилтнүүдийн шинэ санаа санаачилга, туршлага, судалгааны бүтээлүүд, ногоон барилгын шинэ технологи, бүтээгдэхүүнүүдийг харилцан танилцуулж, бусадтайгаа хуваалцахаар зорьж байгаа аж.



  Зөвлөгөөн боловсрол, семинар, аялал, шагнал, үзэсгэлэнгийн танхим гэсэн чиглэлээр зохион байгуулагдана. Энэхүү арга хэмжээнд хүрэлцэн ирснээр дэлхийн ногоон барилгын хөгжлийг дэргэдээс нь үзэж, туршлагатай үйлдвэрлэгчид, ногоон барилгын мэргэжилтнүүдээс үнэтэй зөвлөмж авч, хамгийн сүүлийн үеийн шинэ дэвшилтэт технологитой танилцаж, тэдэнтэй хамтран ажиллах боломж бүрэн нээлттэй байх юм.

  Түүнчлэн семинар сургалтуудад нь хамрагдсанаар сургалтын кредит цуглуулах, LEED ногоон барилгын гэрчилгээг гардан авах боломжтой. Зөвлөгөөний гол сэдэвт Орон нутаг ба түүнд тохирсон байшин, Усны дээд хэмжээний уулзалт, Олон улсын дээд хэмжээний уулзалт зэрэг арга хэмжээ багтжээ.



  Мөн ногоон барилгын танилцуулах аялал маш өндөр хэмжээнд явагдаж, онцгой зүйлсийг танилцуулах болно хэмээн зохион байгуулагчид нь амлаж байна. Оролцогчид нь ногоон барилгын үндсэн шаардлагуудыг бүрэн хангасан, эрчим хүчний тэг хэрэглээ бүхий дөрвөн төрлийн пассив барилгатай танилцаж, Бостоны ногоон барилгатай бүсүүдэд аялах аж. Үзэсгэлэн зөвлөгөөний бүртгэл 9-р сарын 7-ны өдрөөс эхэлжээ.



  Харин тус арга хэмжээнд оролцох хүсэлтэй манай улсын иргэд аравдугаар сарын зургааны өдрийг хүртэл Монголын Барилгын Үндэсний ассоциацид бүртгүүлэн, нэгдсэн аяллын багтайгаар явах боломжтой аж.