- Манай улсад нийтийн аж ахуйн үйлчилгээний салбар байгуулагдсан түүхээс сөхвөл...

- Манай оронд хот, суурин газрууд, олон нийт,  орон сууцны барилгууд баригдсан цагаас эхлэн нийтийн аж ахуйн үйлчилгээний салбар үүсэн байгуулагдсан. Тус салбар нь хүн амын ажиллаж амьдрах таатай нөхцөлийг бүрдүүлэх, оршин суугчдыг баталгаат ундны усаар хангах, хэрэглээнээс гарсан бохир усыг цэвэрлэх, дулаанаар хангах, халуун ус, хог хаягдал, нийтийн халуун ус гэх мэт үйлчилгээг 24 цагийн турш тасралтгүй үзүүлдгээрээ онцлогтой. Одоогоор нийтийн аж ахуйн үйлчилгээ эрхэлдэг тусгай зөвшөөрөл бүхий 160 гаруй аж ахуйн нэгж энэ салбарт үйл ажиллагаагаа эрхэлж  байна.

Улсын болон орон нутгийн төсөв, гадаадын хандивлагч орнуудын зээл, тусламж, төр хувийн хэвшлийн хамтын ажиллагааны хүрээнд хот, суурины инженерийн шугам сүлжээ, барилга байгууламжийг өргөтгөн шинэчилж, шинээр барьсаны үр дүнд нийт хүн амын 80,6 хувь нь баталгаат ундны усны усаар, 41,6 хувь нь  сайжруулсан ариун цэврийн байгууламжаар хангагдаад байна.

1931 онд Засгийн газраас “Улаанбаатар хотын дотор орон сууцны тухайд аж ахуйг үүсгэн байгуулах явдалд хэрэглэх аргуудын тухай” гэсэн тогтоол батлагдан гарснаар Монгол Улсад орон сууц, нийтийн аж ахуйн үйлчилгээний салбар үүссэн түүхтэй.
 
Орон сууцны фондыг нэмэгдүүлэх, хүн амын ахуйн хангамжийг сайжруулах талаар авсан арга хэмжээний үр дүнд Улаанбаатар хотод улс, хоршооллын орон сууцны байшин 1940 онд 268, амины орон сууц 4,2 мянга болж хоёр дахин өссөн. 1950-иад оны сүүлчээс нийслэл Улаанбаатар хот болон аймгийн төвүүдэд орон сууц барих ажил эрчимтэй явагдсан. Үүний дүнд Улаанбаатар хотыг хөгжүүлэх анхны “Ерөнхий төлөвлөгөө” батлагдаж, ЗХУ-ын техник эдийн засгийн тусламжаар 40,0 мянган, БНХАУ–н тусламжаар 50,0 мянган ам метр талбайтай орон сууцны барилгыг барьж ашиглалтад оруулснаар иж бүрэн инженерийн хангамж бүхий орчин үеийн тохилог орон сууц барих ажлын эхлэл нь болжээ. 
 
Улаанбаатар хотод 1959 онд төвлөрсөн ус хангамжийн системийн эхний ээлжийг ашиглалтад оруулснаар ус хангамжийн системийн шинэ эрин үе эхэлсэн. Мөн оны 11 дүгээр сард Ус суваг ашиглалтын газрыг байгуулж, 1960 оноос бохир ус ариутгах татуургын систем ашиглалтад орж, СнЗ–ийн 1960 оны 41 дүгээр тогтоолоор “Ус түгээгүүр, ариутгах татуургыг ашиглах дүрэм”-ийг баталж гаргасан. Цаашлаад ЗХУ-ын техник эдийн засгийн тусламжтайгаар 1964 оноос анхны бохир усыг механик аргаар цэвэрлэдэг цэвэрлэх байгууламжийг барьж ашиглалтад оруулснаар Монгол Улс орчин үеийн шинэ дэвшилтэт технологийг нэвтрүүлж чадсан билээ.
 
- Энэ салбарт хийж хэрэгжүүлж буй дэвшилттэй, ололттой ажлуудаас танилцуулахгүй юу?

- Нийтийн аж ахуйн үйлчилгээний салбарыг хөгжүүлэх, хот, суурины инженерийн шугам сүлжээ, цэвэрлэх байгууламжийг шинэчлэх, шинээр барих, хүн амыг стандартын шаардлагад нийцсэн ундны усаар хангах, шинэ дэвшилтэт техник технологи нэвтрүүлэх чиглэлээр улсын болон орон нутгийн төсөв, гадаад дотоодын зээл тусламж, хөрөнгө оруулалтаар олон төсөл, арга хэмжээг үе шаттай хэрэгжүүлж байгаа. Тухайлбал, Азийн хөгжлийн банкны хөнгөлөлттэй зээлээр “Өмнөговь, Дорноговь аймгийн хот байгуулалт, хилийн ойролцоо суурин газрын хөгжлийн төсөл”- ийг хэрэгжүүлж дуусган, төслийн хоёр дахь шат нэмэлт санхүүжилтээр Архангай, Өвөрхангай, Өмнөговь, Дорноговь аймгийн цэвэрлэх байгууламжийг шинэчлэх ажлыг эхлүүлээд байна.

Францын Засгийн газрын хөнгөлөлттэй зээлээр “Эрдэнэт хотын цэвэрлэх байгууламжийн өргөтгөл төсөл”-ийг хэрэгжүүлж, хоногт 24 000 м3 бохир усыг цэвэрлэх хүчин чадалтай цэвэрлэх байгууламжийг шинээр барьж, ашиглалтад оруулахад бэлэн болголоо. Мөн Азийн хөгжлийн банкны зээлээр хэрэгжүүлж буй “Дархан хотын цэвэрлэх байгууламжийг шинэчлэх төсөл”-ийн хүрээнд цэвэрлэх байгууламжийг шинээр барих ажил явагдаж байгаа.

Мөн БНХАУ-ын Засгийн газрын хөнгөлөлттэй зээлээр “Замын-Үүдийн дэд бүтцийг сайжруулах төсөл”-ийг хэрэгжүүлж, дөрвөн багц ажлыг гүйцэтгэсэн. Нэгдүгээрт ус хангамж, ариутгах татуургын багц ажил, хоёрдугаарт дулаан хангамжийн багц ажлын хүрээнд 90 Мвт-ын хүчин чадалтай дулааны станц барьсан, гуравдугаарт авто зам, дөрөвдүгээрт цахилгаан хангамж, холбоо дохиоллын багц ажлууд хийгдсэн.

Барилга, хот байгуулалтын яам, Байгаль орчин, аялал жуулчлалын яам болон Боловсрол, соёл, шинжлэх ухаан, спортын яам хамтран “Төв Азийн Усны нөөцийн нэгдсэн менежмент. Загвар бүс нутаг Монгол - МоМо төсөл”-ийг ХБНГУ-ын Боловсрол, судалгааны яамны санхүүжилтээр хэрэгжүүлж, гурав дахь үе шатандаа явж байна.

Түүнчлэн НҮБ-ын Хөгжлийн хөтөлбөрийн санхүүжилтээр “Барилгын салбар дахь хүлэмжийн хийг бууруулах арга хэмжээ” төслийг энэ оноос хэрэгжүүлж эхэлсэн.

Орон сууцны зээлийн тогтолцоог шинэчлэх, эрэлт, нийлүүлэлтийн тогтвортой байдлыг хангаж ажилласны үр дүнд 2016 оны жилийн эцсийн байдлаар 16 мянга гаруй айлын орон сууц ашиглалтад орсноор нийт өрхийн 30 гаруй хувь нь инженерийн дэд бүтцэд холбогдсон тохилог орон сууцанд амьдарч, орон сууцны сан 14,3 сая м² болж нэмэгдсэн.
           
Дээрх төсөл, арга хэмжээнүүдийг хэрэгжүүлсний үр дүнд салбарт сүүлийн үеийн шинэ дэвшилтэт техник, технологи нэвтэрч, инженерийн шугам сүлжээний хүчин чадал нэмэгдэн, нийтийн аж ахуйн үйлчилгээний чанар хүртээмж сайжирч байгааг тэмдэглэн хэлэхэд таатай байна.

- Салбарт төрөөс баримталж байгаа бодлого, чиглэлүүд ямар байна вэ?

- Монгол Улсын Засгийн газрын 2016-2020 оны үйл ажиллагааны хөтөлбөр, “Тогтвортой хөгжлийн үзэл баримтлал-2030”, “Ногоон хөгжлийн бодлого”, “Төрөөс орон сууцны талаар баримтлах бодлого”  зэрэг бодлогын баримт бичгүүдэд нийтийн аж ахуйн үйлчилгээний салбарыг хөгжүүлэх, хүн амыг стандартын шаардлагад нийцсэн ундны усаар хангах, орон сууцны хангамж, хүртээмжийг нэмэгдүүлэх гээд хэд хэдэн зорилтыг дэвшүүлэн, түүний дагуу ажиллаж байна.

Үүнд салбарын чиглэлээр нэлээд олон ажлыг хийхээр тусгаснаас хууль эрх зүйн орчинг боловсронгуй болгох ажлын хүрээнд Орон сууцны тухай болон Хот суурины ус хангамж, ариутгах татуургын ашиглалтын тухай хуулиудад нэмэлт өөрчлөлт оруулах гэж байна.

Мөн “Нийтийн аж ахуйн үйлчилгээний салбарт төрөөс баримтлах бодлогын баримт бичиг”-ийг боловсруулж эхэлсэн. Орон сууцны үндэсний хөтөлбөр боловсруулж батлуулах зорилтынхоо хүрээнд “Ногоон хувийн орон сууц” загвар төслийг боловсруулж, хэрэгжүүлэх юм.
 
Улс, орон нутгийн төсөв болон гадаадын хандивлагчдын хөнгөлөлттэй зээл, тусламжаар орон сууцны инженерийн шугам сүлжээг барих хөрөнгийг шийдвэрлэж, улмаар орон сууц барих зардлыг бууруулж, иргэдийн худалдан авах боломжийг нэмэгдүүлж байна.
 
Хүрээлэн буй орчны бохирдлыг бууруулах зорилгоор есөн аймгийн төвийн бохир усны цэвэрлэх байгууламжийг иж бүрэн шинэчлэх төслийг Бүгд Найрамдах Польш Улсын Засгийн газар болон Азийн хөгжлийн банкны зээлээр хэрэгжүүлнэ.   
 
Мөн манай улс цэвэрлэх байгууламжаас цэвэршүүлсэн усыг үйлдвэрлэлийн хэрэглээнд ашиглах төслийг эхлүүлээд байна. Цаашид барилга, эрчим хүч, уул уурхай зэрэг хүнд, хөнгөн үйлдвэрийн технологийн хэрэгцээнд газрын гүний цэвэр усыг ашиглахыг болиулж, цэвэрлэсэн усыг дахин ашиглах, байгаль орчинд ээлтэй, шинэ дэвшилтэт технологийг нэвтрүүлэх шаардлагатай байгаа.
 
- Тухайлбал, Ногоон хувийн орон сууц гэсэн загвар төслөөс дэлгэрэнгүй тайлбарлаж болох уу?

- Хүн төрөлхтний хөгжлийн чиг хандлага өөрөө байгаль дэлхийтэйгээ зохицоод үйлдвэрлэлийн аль ч салбар эко, ногоон чиг хандлагаар хөгжихийг зорьж байна. Хүн өөрөө байгалийн амьтан учраас хүрээлэн буй орчиндоо сөрөг нөлөө үзүүлэхгүйгээр амьдрахыг чухалчилдаг болсон. Хүний буруутай үйлдлээс болж эх байгальдаа сөрөг нөлөө үзүүлж, ган гачиг тохиож, цөлжилт газар авч, байгалийн тэнцвэрт байдал алдагдаад байгаа учраас салбар болгонд Ногоон бодлогыг баримталж, ногоон чиг хандлагаар хөгжих зорилт тавиад байна.

Манай салбарын хувьд “Ногоон хөгжлийн бодлого”-д ногоон хувийн орон сууц, ногоон хотын талаар тусгасан. Жишээлбэл, эрчим хүч, дулаан, ус хангамж гээд бүхий л дэд бүтцийн салбар нь ухаалаг, оновчтой менежмент бүхий хүний амьдралын тав тух, ногоон боломжийг хангасан хотыг хэлж байгаа юм. Ногоон хувийн орон сууц нь мөн адил хүний эрүүл мэндэд сөрөг нөлөөгүй, байгальд ээлтэй барилгын материалаасаа эхэлнэ. Бүр анхны зураг төслөөсөө энэ бүх эко, хэмнэлттэй төлөвлөлтүүдийг хийж өгөх ёстой. Мөн эрчим хүч, усны нөөцийг үр ашигтай зарцуулж, ахуйн бохир усыг цэвэрлэх байгууламжид нь цэвэрлэж дахин ашиглах, хур тунадасны усыг хуримтлуулан ашиглах, хог хаягдлыг боловсруулж хэрэглэх гээд энэ бүх технологийг цогцоор нь ашиглаж буй барилгыг хэлээд байгаа юм. Одоогоор энэ ажил манайд дөнгөж эхлэл төдий, судалгаа төлөвлөлтийн шатандаа явж байна.

Мөн барилгын салбарт Эрчим хүчний хэмнэлтийн санхүүжилтийн механизмыг бий болгож, ногоон барилгын технологийг нэвтрүүлсэн хувийн хэвшлийнхэнд урамшуулал олгох зэрэг эдийн засгийн хөшүүргийг цаашид нэвтрүүлэх хэрэгтэй.

- Хөрөнгө оруулалт, санхүүжилтийн асуудлыг хэрхэн шийдэх вэ?

- Энэ маш чухал асуудал. Улсын болон орон нутгийн төсвийн хөрөнгө оруулалтад шат дараалалтайгаар хэрэгжүүлж, гадны хөнгөлөлттэй зээл, санхүүжилт зэргээр шийдэх байх. Судалгааны шатандаа байгаа учраас одоо хэлэхэд эрт байна.

- Юун түрүүнд хүмүүст ногоон барилгын талаар ойлголтыг өгч, мэдлэг мэдээлэл олгох нь чухал санагдсан. Энэ тал дээр?

- Иргэддээ ойлгуулж, таниулж чадахгүй бол ногоон барилга гэдэг зүйлийг үр дүнтэйгээр хэрэгжүүлэх боломжгүй учраас эхлээд сургалт сурталчилгааг сайн явуулах учиртай. Тиймээс мэдлэг олгох сургалт, танин мэдүүлэх арга хэмжээнүүдийг зайлшгүй хамтатган явуулахаар төлөвлөсөн. Мөн Ногоон барилгын үнэлгээний системийн журмыг боловсруулж байна. Хүлэмжийн хий, хог хаягдлаа багасгаж, эрчим хүчээ хэмнэж буй айл өрх, байгууллагын барилга, сууцанд хэмжилт хийж, баталгаажуулах, урамшуулах журмуудыг боловсруулж эхэлсэн.

- Тэгвэл нийтийн аж ахуйн салбарт нэн тулгамдаад буй ямар асуудлууд байна?

- Юуны түрүүнд хөрсний бохирдол, гэр хорооллын нүхэн жорлонгийн асуудал байна. Мөн төв суурин газруудад байгаа цэвэрлэх байгууламжийн ашиглалт, үйлчилгээг сайжруулах шаардлагатай байгаа.

Манай орон газрын гүний цэвэр усны нөөц багатай орны тоонд ордог ч хүнс, хөдөө аж ахуй, барилга, уул уурхай гээд бүхий л салбар усны хэрэгцээний 80 хувьд нь газрын гүний ус ашиглаж байгаа нь дараагийн нэг хөндөх сэдэв. Олон зуун жилийн хугацаанд нөхөгддөг байгалийн нөөц баялгийг хайрлаж, хамгаалахын тулд цаашид гадаргын усыг ашиглах бодлого баримтлах шаардлагатай. Энэ ажлын хүрээнд Улаанбаатар хотын захиргаанаас санхүүжилтийг гаргаж, “Туул усан цогцолбор” төслийн  ТЭЗҮ-г боловсруулсан. Цогцолборыг байгуулснаар бид гадаргын усаа ашиглах боломжтой болно.  

Мөн цэвэр, бохир усны үйлчилгээний үнэ тарифын асуудал байна. Бусад салбартай харьцуулахад цэвэр усны үнэ хэтэрхий хямд байна. Иймээс усны үнэ тарифыг тогтоох асуудлыг боловсронгуй болгох шаардлагатай. Хот, суурины ус хангамж, ариутгах татуургын ашиглалт үйлчилгээг  Зохицуулах зөвлөлөөс 2015 оноос усны суурь үнийг тогтоож,  өнгөрсөн онд Налайх, Багануур дүүрэгт усны үнэ тарифыг нэмсэн. 

Гэсэн ч хөдөөд усны үнэ өндөр, нийслэлд харьцангуй хямд байна. Тухайлбал: Архангай, Өвөрхангай зэрэг аймгуудад 1м3 цэвэр усны үнэ 1500 төгрөг байхад Улаанбаатар хотод 500 төгрөг, өөрөөр хэлбэл 1 л ус 50 мөнгө байна гэсэн үг.  Дахин хэлэхэд, өнөөдөр Монгол оронд уснаас өөр мөнгөөр хэмжигддэг бараа бүтээгдэхүүн, үйлчилгээ гэж байхгүй. Манай гаригийн цэнхэр алт болсон цэвэр усны нөөцөө хайрлан хамгаалах иргэдийн хандлага, сэтгэлгээг ч өөрчлөх цаг нь болжээ. 

Эдгээр тулгамдаж байгаа асуудлуудын хажуугаар салбарын байгууллагуудын бүтэц зохион байгуулалт, хүний нөөцийн талаар орхигдуулж болохгүй. Улаанбаатар хотын хэмжээнд мэргэжилтэй боловсон хүчний хүрэлцээ боломжийн, хөдөө орон нутагт нэлээд дутагдалтай байна. Нэгэнт бэлтгэгдчихсэн хүний нөөцөө давтан сургах, мэргэшүүлэх шаардлагатай юм. Сүүлийн жилүүдэд олон төрлийн дэвшилтэт техник технологи, тухайлбал, цэвэрлэх байгууламжийн технологи, усны ухаалаг тоолуур, хэмжих, хянах ухаалаг төхөөрөмжүүд шинээр нэвтэрч байгаа шүү дээ. Түүнд зориулж мэргэжилтнүүдээ чадавхжуулж, сургах хэрэгтэй.

Түүнчлэн салбарт оруулах хөрөнгө оруулалт бол зайлшгүй анхаарал татах сэдэв юм. Томоохон засвар шинэчлэл, шугам сүлжээний ажлыг цогцоор нь хийхэд төсөв хөрөнгө хүрэлцдэггүй хүндрэл байнга тулгардаг. Мөн жил бүр нүх ухаж засвар хийдгийг болиулж, шугам сүлжээг хонгилын системд оруулах талаар хэлэлцэж байна. Ингэснээр ашиглалтын хугацаа уртсаж, ашиглалт, засвар үйлчилгээний явцад гарах зардлыг үлэмж хэмжээгээр хэмнэх гээд олон давуу талтай.

Сүүлийн жилүүдэд манай салбар олон улсын банк санхүүгийн байгууллагуудаас авсан урт хугацааны зээлүүд, тэдгээрийн хүүг төлөх асуудал тулгамдаад байна. Бусад салбартай харьцуулахад ашигтай ажиллаж чаддаггүй, усны үнийг олон жил хязгаарласан учраас зээлээ эргүүлэн төлөх боломж нөхцөл нь бүрдээгүйгээс хуримтлагдсан их хэмжээний зээлийг төлөх хэрэгтэй байгаа. Энэ асуудлыг шийдүүлэхээр Засгийн газрын хуралдаануудад оруулж, УИХ-д ч өргөн барихаар бэлтгэж байна. Салбартаа дарамт болохгүйгээр шийдэж чадвал энэ чиглэлийн байгууллагуудын маань нуруун дээрх ачаа хөнгөрөх байх. Үүнийг шийдэж ирсэн бусад салбарын туршлага ч бий.

- Салбарын ажилтан албан хаагчдыг сургахаас гадна тэдний нийгмийн асуудалд хэрхэн анхаарч байна вэ?

Салбарын ажиллагсдынхаа нийгмийн асуудлыг шийдэж, цалин урамшууллыг нь нэмэгдүүлэх, тогтвор суурьшилтай ажиллуулах чиглэлээр ахнаарч ажиллах учиртай. Хамгийн гол нь тухайн байгууллагын санхүүгийн чадавхыг сайжруулах ёстой юм. Ингэхийн тулд юун түрүүнд нийтийн аж ахуйн байгууллагуудыг чадавхжуулах, усны үнэ тарифыг өөрийнх нь өртөг зардалд нийцүүлж бодитоор тогтоох, санхүүгийн хувьд бие даасан чадамжтай хараат бус болгох нь чухал.

- Дэвшилтэт техник технологи нэвтрүүлэхэд хэрхэн анхаардаг вэ?

- Анхааралгүй яахав. Энэ маш чухал асуудал. Аливаа шинэ техник, технологи барилгын норм, дүрэм стандартаар дамжин үйлдвэрлэлд нэвтэрдэг учраас бид салбарын норм дүрмийг шинэчлэх, шинээр боловсруулах ажлыг жил бүр барилгын нормчлолын сангийн төлөвлөгөөнд тусган хэрэгжүүлдэг.

Тухайлбал, энэ жил цэвэрлэгдсэн усыг усалгаанд ашиглах заавар багц стандарт, Усны чанар сайжруулах төхөөрөмжийн стандарт, Орон сууц, олон нийтийн барилгын хог хаягдлын стандарт, Нийтийн аж ахуйн салбарын ажиллах хүчний норм, норматив боловсруулахаар ажиллаж байна.
 
Мөн цэвэрлэх байгууламжаас гарч буй лагийг бүрэн боловсруулах судалгааны ажлыг Азийн хөгжлийн банкны буцалтгүй тусламжаар хэрэгжүүлж буй төслийн хүрээнд хийж байна.
 
Сүүлийн үед орон сууцны айлуудын гэртээ тавьсан усны тоолуурыг байцаагч заалтыг заавал очиж шалгахгүйгээр нэг компьютер дээрээс хянах боломжтой болж байна. Усны төлбөрийг ч тухайн заалтаасаа харж болно. Дээр хэлсэнчлэн цэвэрлэх байгууламжийн шинэ технологиуд нэлээд нэвтэрч байгаа. Бага хүчин чадлын цэвэрлэх байгууламжууд, дагалдах бусад технологийн шийдлүүдийг нэвтрүүлэхээр ажиллаж байна.

- Цаашид хэрэгжүүлэхээр төлөвлөсөн ажлын тухайд...

- Салбарт баримталж буй дээр дурдсан бодлого зорилт, хөтөлбөр, төслүүдийн хүрээнд хүн амын ус хангамжийг нэмэгдүүлэх зорилгоор Туул усан цогцолбор төслийг хэрэгжүүлэх, Ус хангамж, ариутгах татуургын шугам сүлжээний насжилтыг уртасгах, шинэчлэх, засварлах ажилд шинэ дэвшилтэт технологийг нэвтрүүлэх,  Шинээр төлөвлөж байгаа орон сууцны хорооллын унд-ахуйн хэрэглээний цэвэр усыг тусад нь төлөвлөх, гарсан бохир усыг цэвэршүүлэн ариутгах татуургын систем, ногоон байгууламжийн усалгаанд ашиглах боломжит технологийг судлан, нэвтрүүлэх, Хөрсний усыг үйлдвэрийн технологийн хэрэгцээнд ашиглах чиглэлээр судалгаа хийх, Улаанбаатар хотын гэр хорооллын өрхийн ариун цэврийн байгууламжийг боловсронгуй болгох жишиг төсөл хэрэгжүүлэх, цэвэрлэх байгууламжид лагийг бүрэн боловсруулах, дахин ашиглах технологи нэвтрүүлэх асуудлыг үе шаттай шийдвэрлүүлэх зэрэг олон ажлыг хийхээр төлөвлөж байна.
 
- Ингээд Нийтийн аж ахуйн салбар манай улсад үүсгэн байгуулагдаж, хөгжсөний түүхт 86 жилийн ойн мэндийг салбарынхандаа хүргэж, мэндчилгээ дэвшүүлэхгүй юу?

- Монгол Улсад нийтийн аж ахуйн үйлчилгээний салбар үүсэж хөгжсөний 86 жилийн ойг тохиолдуулан тус салбарт хөдөлмөр бүтээлээ мөнхөлсөн үе үеийн ахмадууд, нийт ажилтан, ажиллагсад Та бүхэнд чин сэтгэлийн халуун мэндчилгээ дэвшүүлж, эрүүл энх, аз жаргал, сайн сайхан бүхнийг  хүсэн ерөөе.

Улс орны хөгжилд салбарын гүйцэтгэх үүрэг, хувь нэмэр өсч байгаад манай НААҮ-ний салбарынхан урамшиж, төрийн бодлого, зорилтоо амжилттай хэрэгжүүлэн, хүн амын ажиллаж, амьдрах таатай нөхцөлийг бүрдүүлэх нэр хүндтэй, хариуцлагатай ажил үйлсдээ улам их амжилт гаргана гэдэгт итгэлтэй байна.