Вьетнамын халуун дулаан бүс нутагт орших Ханой хотын их сургуулийн барилга орчин цагийн ногоон барилгын нэгэн загвар жишээ болоод байна. “Vo Trong Nghia” архитектурын компанийн загварыг нь гаргасан уг барилгын өвөрмөц фасад болон тагт болгон дээр мод тарьж өгсөн нь оюутны хотхоныг чимж, олны анхаарлыг ихээхэн татаж байгаа юм.

  Энэхүү их сургууль нь Вьетнамын хамгийн том технологийн паркад тооцогддог бөгөөд тус барилга нь хүрээлэн буй орчинд сөрөг нөлөөгүй, хүний эрүүл мэндэд эерэг томоохон бүтээн байгуулалтын эхлэл, үлгэр жишээ болж буйгаараа онцлогтой аж.

  Хотхоныг үзэж сонирхох гэсэн оюутан залуус, багш ажилтнууд болон гадны зочдод үүд хаалга нь хэзээд нээлттэй байх гэнэ. Тэгш хэмгүй, бетоноор барьсан уг барилга нь хог хаягдлаар үйлдвэрлэсэн барилгын материал ашигласан бөгөөд угсрах технологиор маш богино хугацаанд баригдсан юм байна.

  Барилгын байршил, том цонх зэрэг нь өдрийн цагаар байгалийн гэрэлтүүлгийг хангалттай тусгаж, агаарын урсгалыг нэмэгдүүлэх бөгөөд тагтан дээрх мод нь нарын шууд тусгалыг сааруулах давуу талтай гэнэ. Түүнчлэн барилгын ногоон дээвэр нь олон талын ач холбогдолтой аж.