Ирэх онд төлөх “Чингис”, “Дим сам” бондын төлбөртэй тэнцэх хэмжээний бондыг дахин гаргана
Монгол Улсын Засгийн газар шинээр бонд гаргаж, 650 сая хүртэлх ам.долларын санхүүжилт татахаар төлөвлөж байгаа талаар “Wall Street Journal” мэдээллээ.
Шинэ бондын хугацаа 5.5 жил, харин өгөөжийн түвшин ойролцоогоор зургаан хувь байх талаар ойрын эх сурвалжийн мэдээллийг “Wall Street Journal" дамжуулсан байна. Энэ нь “Хуралдай” бондоос өртгийн хувьд 2.75 хувиар доогуур гэсэн үг юм. Засгийн газраас олон улсад шинээр гаргаж байгаа ам.долларын бондын ханш аравдугаар сарын 25 гэхэд тодорхой болж магадгүй байна. Шинэ бондын танилцуулгыг Нью-Йорк, Бостон Лондон болон Сингапурт хийсэн юм. Өнөөдөр Хонгконгт хөрөнгө оруулагчдад шинэ бондоо танилцуулахаар байна. Монгол Улс бондоо буцаан худалдаж авах, шинэ бонд гаргах төлөвлөгөөгөө амжилттай хэрэгжүүлбэл эдийн засгийн байдал өнгөрсөн оныхоос сайжрахаар байна. Хэдий тийм боловч төсвийн тэнцлээ сайжруулах чиглэлд хийх ажил их байгааг “Nasdaq” онцоллоо. 2018 оны нэгдүгээр сард “Чингис” бондын 500 сая ам.доллар, үүний дараа “Дим Сам” бондын 160 сая ам.долларын төлөлтийг хийх хуваарьтай байгаа юм. Эдгээр төлөлтийг хийхийн тулд Засгийн газар шинэ бонд гаргахаас гадна 2018 онд хугацаа нь дуусаж байгаа бондоо эргүүлэн худалдан авах санал гаргаад байна.
Өөрөөр хэлбэл “Чингис” бондын хувьд 1000 ам.долларын нэрлэсэн үнэтэй бондыг 1003.75 ам.доллар, 10 мянган юанийн нэрлэсэн үнэтэй бондыг 10,037.5 юаниар авах санал гаргасан аж. Энэ саналын хугацаа Нью-Йоркийн цагаар аравдугаар сарын 24-ний өдөр буюу өнөөдөр дуусч байна. Ам.долларын бондын хувьд 3.75 ам.долларын зөрүүг бонд гаргасан Засгийн газарт эзэмшиж буй бондоо худалдаж байгаа хөрөнгө оруулагч авах юм. “Nasdaq.com”-д нийтэлснээр Засгийн газрын төсвийн зарцуулалт нэмэгдэж, түүхий эдийн үнэ унаснаар Монгол Улс дефолт зарлах эрсдэл нүүрлэсэн бөгөөд улмаар 2016 оны гуравдугаар сард таван жилийн хугацаатай 500 сая ам.долларын бондыг гаргахдаа 10.875 хувийн хүү төлөхөөр болсон юм. Энэ нь Засгийн газрын хувьд 2011 оноос хойших хамгийн өндөр хүүтэй бондод тооцогдож байна.
“Moody's”-ийн тооцоолсноор, Монгол Улсын эдийн засгийн өсөлт эрчимжиж, гадаад валютын нөөцийн хэмжээ энэ онд 1.7 тэрбум ам.долларт хүрч магадгүй байна. Харин Олон Улсын Валютын Сангийн мэдээлснээр, төсвийн алдагдал энэ онд дотоодын нийт бүтээгдэхүүний 10.6 хувьтай тэнцэхээр байгаа аж. Сангийн сайд Ч.Хүрэлбаатарын мэдээлснээр, 2017 оны хүлээгдэж байгаа гүйцэтгэлээр гурван их наяд төгрөгийн санхүүжилт хийгдээгүй байгаа юм. Энэ нь санхүүжилтийн гүйцэтгэл 70 хувьтай байгаа гэсэн үг ажээ. Үүн дээр ирэх онд төлөх бондын төлбөрүүд нэмбэл нийт таван их наяд төгрөгийн төлбөрийг ойрын дөрвөн сарын хугацаанд хийх шаардлага тулаад байна. Санхүү хөрөнгийн удирдлагыг оновчтой болгох замаар эдгээр төлбөрийг хийж дуусгана гэдгээ Сангийн сайд мэдээлсэн юм.