Норвегийн Берген дэх Урлагийн үндэсний академийн барилгыг хөнгөн цагааны элемент бүхий фасадаар өнгөлжээ. Гэхдээ энэ нь зүгээр нэг хөнгөн цагаан байсангүй, “Puzzle” эвлүүлдэг тоглоом шиг өвөрмөц загвартайгаас гадна ус чийг нэвтрүүлэхгүй онцлогтой аж.

  Тус урлагийн академи нь Норвегийн баруун эргийн хур бороо элбэг ордог бүс нутагт байрладгаас түүнд хадгалагддаг урлагийн 350 бүтээл болон оюутнуудын бүтээлээ туурвидаг танхимуудыг ус чийг, борооны уснаас найдвартай хамгаалахын тулд ийнхүү барилгын фасаданд ихээхэн анхааралтай ханджээ.

  Барилга нь хоёр гол хэсэгтэй бөгөөд нэг нь оюутан залуус, ажилтнуудад, харин нөгөө нь олон нийтэд зориулагдсан нээлттэй хэсэг байх аж. Дотор талын бүхий өрөө, танхимуудад байгалийн гэрэлтүүлэг хангалттай тусдаг байхаар тооцоолж архитектурын шийдэлд нь фасадыг сайтар тохируулан шийдэж өгчээ.  

  Тус бүр өөр хэмжээтэй 900 ширхэг хөнгөн цагаан хавтангаар барилгын гадна талыг бүрсэн нь барилгыг далайн чийглэг уур амьсгал, борооны ус, гадны хүчин зүйлээс хамгаалах найдвартай хэрэгсэл болно гэж үзэж байна. Түүнчлэн том дөрвөлжин хэлбэрийн цонхнууд нь металл гадаргуугийнхаа хэмнэлтэй яг зохицож байхаар загварыг нь гаргажээ.