Эдийн засгийн нөхцөл байдал хэзээ сэргэж, барилгын салбарт эерэг нөлөөгөө үзүүлэх бол гэсэн олон таамаг, хүлээлт энэ салбарт үүсээд буй. Хямралын үед ямар арга, сувгаар хэрэглэгчдээ татаж, борлуулалтаа нэмэгдүүлэх вэ гээд асуултууд ар араасаа хөвөрсөөр байгаа энэ үед эдийн засаг, маркетингийн мэргэжлийн хүмүүсээс авсан тодруулгыг танд хариулт болгон хүргэж байна.

 

- Ойрын хугацаан дахь Монголын эдийн засгийн төлөв байдлын талаарх таны бодол ямар байна вэ?

- 2017-2018 оны Монгол улсын эдийн засгийн нөхцөл байдал ерөнхийдөө өмнөх жилүүдээс харьцангуй дээрдэх хандлагатай гэж үзэж байна. Дэлхийн зах зээл дээр эрдсийн бүтээгдэхүүний үнэ өссөн, ОУВС-ийн тусгай хөтөлбөрт хамрагдсан зэрэг нь Монгол улсын эдийн засагт эерэг нөлөөлнө. Энэхүү эерэг нөхцөл байдлыг Засгийн газар, УИХ-ын зүгээс хэрхэн ашиглаж чадахаас ихээхэн зүйл хамаарна.

Ер нь эдийн засгийн хямрал гүнзийрэхгүй байх үндэслэл бий. Эдийн засаг сэргэх, өсөлт нэмэгдэх, суурь нөхцөл сайжрахын хувьд энэ 2 жилийн хугацаанд хэт өндөр хүлээлттэй байх боломж алга. Мөн ОУВС-ийн хөтөлбөрийн хүрээнд тавигдсан шаардлагын дагуу нэмэгдэх татвар, хасагдах нийгмийн шинж чанартай зардлууд нь эдийн засаг, бизнесийн орчинд тодорхой сөрөг нөлөөллийг бий болгох магадлалтай гэж харж байна. Хямралыг зогсоосон эдийн засгийн цаашдын өсөлтийн суурь нөхцөлийг бэлтгэсэн он жилүүд болох боломжтой гэж харж байна.

- Өнөөгийн нөхцөл байдалд барилгын салбарыг хүндрэлээс гаргах ямар шийдлүүд байж болох вэ?

- Барилгын салбарын үйл ажиллагаа 2016 онд их хэмжээний бууралттай гарсан. Оны эхний 2 улиралд гарсан бүтээн байгуулалт, цаг зуурын түр нөлөөлөлтэй холбоотой өөрчлөлт нь бүр их унах нөхцөл байдлыг саармагжуулсан болов уу. Энэ тохиолдолд барилгын салбарыг хүнд нөхцөл байдлаас гаргах урт хугацааны болон богино хугацааны шийдлүүд байх боломжтой.

- ОУВС болон бусад гадны эх үүсвэрээс ирж буй хөрөнгө оруулалт, хөнгөлөлттэй зээлүүд барилгын салбарт ямар үр өгөөжийг авчрах вэ?

- Засгийн газрын зүгээс болон Валютын сангийн хөтөлбөрийн хүрээнд барилгын салбарын үйл ажиллагааг хүчтэй дэмжих арга хэмжээ тусгагдаагүй. Барилгын салбарын хувьд ипотекийн зээлийг үргэлжлүүлэх, барилгын материалын үйлдвэрлэлийг дэмжих асуудал Засгийн газраас УИХ-аар батлуулсан “Эдийн засгийг сэргээх хөтөлбөр”-ийн хүрээнд тусгагдсан нь бодлогын хүрээнд тусгагдсан гол арга хэмжээнүүд гэж үзэж байна.

ОУВС-ийн хөтөлбөрийн хувьд богино хугацаандаа барилгын салбарт нөлөөлөх эерэг нөлөөлөл бага юм. Харин урт хугацаанд эдийн засгийн суурь нөхцөл сайжирч, тэнцвэр хангагдсанаар эерэг нөлөөлөл бий болно. Тухайн хөтөлбөр болон Засгийн газрын зүгээс хэрэгжүүлэх төслүүдийн хүрээнд иргэний зориулалтаас бусад чиглэлд барилгын үйл ажиллагаа тодорхой хэмжээнд нэмэгдүүлэх боломжтой. Гэхдээ төсвийн хөрөнгө оруулалт буурч байгаа энэ үед өмнөх жилүүдийн түвшинд хүрэх магадлал бага байна.

- Зах зээлд гацсан орон сууцны борлуулалтыг сайжруулах тал дээр ямар бодлого баримталбал тохиромжтой вэ?

- Дээр дурдсанчлан энэ чиглэлд төр засгийн бодлогын хүрээнд дорвитой эерэг нөлөөлөл бага байна. Иймээс барилга, үл хөдлөх хөрөнгийн чиглэлээр ажиллаж буй байгууллагууд хамтран ажиллах, борлуулалтын шинэ боломжит хувилбарыг эрэлхийлэх тал дээр анхаарах нь зүйтэй болов уу. Ойрын жилүүдэд (2017-2018 он) эдийн засаг дорвитой сэргэж иргэдийн худалдан авах чадвар сайжрах, орон сууцны бодит эрэлт хүчтэй нэмэгдэх боломж бага тул хүлээх нь улам өндөр эрсдэлийг дагуулж болзошгүй юм.
 

- Цаг үе, зах зээл асар хурдацтай өөрчлөгдөн хөгжиж буй энэ үед бизнес эрхлэгчид, компаниуд маркетингийн бодлогодоо хэрхэн өөрчлөлт хийвэл зохих вэ?

- Салбар болгоны нөхцөл байдал, компани бүрийн нөөц, бодлого өөр тул бүх компаниудад тохирсон универсаль загвар гэж байхгүй нь тодорхой. Гэхдээ орчин үеийн хандлагаас харвал компаниуд маркетингийн бодлогоо зар сурталчилгаа зэрэг асуудлаар хязгаарласан тактикийн маркетинг гэхээсээ илүүтэй бизнес моделийн асуудал руу хандсан стратегийн маркетинг руу чиглүүлдэг болчихлоо. Өнөө маргаашийн хэрэгжүүлэх кампанит ажил гэхээсээ илүүтэй олон талын ашиг сонирхлыг хангасан тогтвортой маркетингийн үзэл баримтлал руу шилжиж байна гэж харлаа.

- Таны ажиглалтаар бизнес эрхлэгчид маркетингийн бодлогодоо ямар алдаанууд гаргаж байна вэ?

- Бид маркетингийг үйлдвэрлэчихсэн бараагаа хурдан борлуулах, сурталчлах үүрэгтэй л гэж ойлгож байгаа нь гол алдаа болов уу. Маркетинг бизнесийн шийдвэр гаргалтын цөм нь байж, хэрхэн үнэ цэнийг бүтээх вэ гэдэг асуудал руугаа чиглэх ёстой.

- Ялангуяа онцлогтой салбарын хувьд барилгын компаниуд маркетингдаа ямар бодлого баримтлах вэ?

- Байр гэдэг бүтээгдэхүүний төрлийнхөө хувьд онцгой буюу хүн амьдралдаа маш цөөн удаа худалдан авах шийдвэр гаргадаг бүтээгдэхүүн. Тиймээс маркетингийг нь өнгөт каталог, уран үгтэй сурталчилгаар хязгаарлаж болохгүй. Барилгын компаниуд хүний насан туршдаа амьдрах тав тух, хэрэглээний үнэ цэнийг бүтээж л чадвал тэр л хамгийн сайн маркетинг болох болов уу.

- Борлогдохгүй гацсан олон тооны орон сууцыг борлуулахдаа ямар арга барилаар хандвал дээр вэ? Сурталчилгааны ямар суваг илүү үр дүнтэй байх бол?

- Борлогдохгүй гацсан барилгууд 2 шалтгаантай байж магадгүй юм. Эхнийх нь санал болгож буй барилга маань хэрэглэгчдийн хэрэгцээнд нийцээгүй байх. Удаах нь энэ салбарын экосистем буюу санхүүгийн механизм нь гацсантай холбоотой. Ерөнхийдөө эхнийх нь компанитай, удаах нь салбартай холбоотой гэж харж байгаа. Сурталчилгааны сувгийн хувьд бол хамгийн их нөлөөлдөг суваг нь ам дамжсан яриа буюу өмнөх худалдан авагчдын туршлага нь эерэг байгаад боломжит худалдан авагчдаа хүрч чадвал тэр л хамгийн сайн суваг болов уу.

Дэлгэрэнгүй мэдээллийг "БАРИЛГА.МН" сэтгүүлээс