Нэр: Х. Одбаяр
Мэргэжил: Интерьер дизайнер
Сургууль: ШУТИС - ҮТДС
Ажлын намтар: БНХАУ-ын Бээжин хот дахь “Чилли Констракшн”-ны Интерьер дизайнер,
“М-Си-Эс Проперти” ХХК-д Интерьер дизайнер,
“СаяСанаа” ХХК-ийн Үүсгэн байгуулагч, дизайнер
 
- Таны ажлын өдрийн өглөө юунаас эхэлдэг вэ?

- Ямар ч их ажилтай байсан хамаагүй тухайн өдрийг гэр бүлтэйгээ ширээ тойрон суугаад өглөөний цайгаа ууж эхлүүлдэг. Хүүхдүүдээ хичээл сургууль албанд нь хүргэж өгөөд ажил дээрээ 08 цаг 50 минутад ирдэг.



- Өнөөдрийн ажлын төлөвлөгөөгөө сөхвөл...

- Монголын аялал жуулчлалын салбарт чухал хувь нэмэр оруулахуйц нэгэн төсөл дээр багаараа ажиллаж байгаа. Үдээс өмнө энэ төсөл дээрээ багаараа ажиллаж, зөвлөлдөх ажил бий. Үдээс хойш хэд хэдэн уулзалт төлөвлөсөн болохоор бага зэрэг ачаалалтай байх болов уу.

- Одоо ажиллаж байгаа төслийнхөө талаар дэлгэрүүлэхгүй юу?

- Аялал жуулчлалын цогцолбор байгуулах томоохон хэмжээний төсөл юм. Аливаа захиалгат зургийн ажил буюу төсөл гэдэг нь захиалагч хувь хүний, тухайн байгууллагын хувьд өндөр үнэ цэнэтэй амьдралынх нь маш чухал хэсэг нь болж байдаг. Тийм ч учраас захиалагч талын өндөр итгэл найдвар үзүүлж, бидэнд хариуцуулан даатгасан ажлыг чин сэтгэлээсээ зүтгэл гарган гүйцэтгэж, нөөц бололцоогоо бүрэн дайчилж ажиллахыг эрмэлздэг. Тиймээс гүйцэтгэсэн төсөл болгон минь бидний хувьд халамж, сэтгэл шаардсан чухал ажил болдог.

- “СаяСанаа ХХК”-ийн талаар товч танилцуулбал...

- “СаяСанаа” ХХК нь барилгын зураг төсөл, засал гүйцэтгэл, төслийн удирдлагын чиглэлээр үйл ажиллагаа явуулдаг. Ажилдаа зүтгэлтэй, чин сэтгэлээсээ ханддаг, туршлагатай залуусаас бүрдэх хамт олон маань манай компанийн үнэт зүйл юм.



- Интерьер дизайныг хэзээнээс, яагаад сонирхож эхэлсэн бэ?

- Бага байхдаа хувцасны загвар зохион бүтээгч, эсвэл зураач болохыг хүсдэг байлаа. Өсч том болохын хэрээр энэ бодол минь өөрчлөгдөж, гадаад орнуудын өнгө үзэмж, загвар хийц сайтай, шинэлэг, өвөрмөц бүтээн байгуулалтуудыг телевизээр харж, өөрийн эрхгүй сонирхох болсон доо. Ингээд л зурагтаар үзэж харсан гоёмсог бүтээн байгуулалтуудыг өөрийн улс орондоо хийж бүтээхийг хүсч, дизайнер, архитектур мэргэжлийг сонгосон. Бүтээлч сэтгэлгээ надад байдгийг, дизайны урлаг миний амьдралын нэг хэсэг юм гэдгийг бага ахуйгаасаа л мэддэг, мэдэрдэг байлаа.

- Дизайнер хүнд байх ёстой хамгийн гол чадвар юу вэ?

- Мэдрэмж, юмс хоорондын уялдаа холбоо, шаргуу хөдөлмөр...

- Та онцлох буюу хамгийн сайн гүйцэтгэсэн төслөө танилцуулахгүй юу?

- Мэргэжлээрээ 600 орчим төсөл дээр ажилласан байдаг. 2016 оны эхээр “Lhamour” органик гоо сайхны брэндийн анхны салбарын интерьер “брэндбүүк” болон гүйцэтгэлийн ажлыг Шангрила Моллд хийж гүйцэтгэсэн. Энэ брэндийг цаашид дэлхийн зах зээлд гарч өрсөлдөж чадахуйц ирээдүйтэй Монгол брэнд гэж дүгнэдэг. Олон улсын зах зээлд Монголыг таниулах брэндийн хувьд интерьер шийдлүүд нь ихээхэн чухал үүрэг гүйцэтгэнэ гэж бодсон. Энэ шалтгаанаар өөрийгөө хурцалж ажилласан даа. Төслөө амжилттай дуусгаж, захиалагчийн хүссэн сэтгэл ханамжийг биелүүлж чадсандаа баяртай байдаг болохоор энэ төслөө онцолж ярих дуртай байдаг.

- Ажилдаа ашигладаг программ хангамжууд, багаж хэрэгслүүдийг танилцуулбал...

Компьютер хэрэглэл: Dell Persation компьютер, календарь, мэргэжлийн программууд AutoCAD, 3DS Max, Sketch Up
Бодит хэрэглэлүүд: Харандаа, цаас, дэвтэр,
Гар утас хэрэглээ: iPhone6



- Мэргэжлийн ур чадвараа дээшлүүлэхийн тулд шинэлэг мэдээллүүдийг хаанаас авдаг вэ?

- Дизайн, архитектурын чиглэлээр контентууд түлхүү оруулдаг вэбсайт болон сошиал хуудсуудаас мэргэжлийн холбогдолтой шинэ мэдээллүүдээ авдаг. Түүнчлэн он оны дизайны чиг хандлагыг харуулсан ном, каталогиудыг сонирхдог.

- Гэр бүл, чөлөөт цаг, дуртай зүйлдээ хэр их цаг гаргаж чаддаг вэ?

Эхнэр, хоёр хүүхдийн хамт амьдардаг. Ажил мэргэжлийг минь ойлгож, үнэлж хүндэлдэг сайн ханьтай байна гэдэг маш чухал. Энэ нь амжилтад шууд нөлөөлдөг гэж би боддог. Гэр бүлийнхээ хамтаар шинэ байгуулагдсан бүтээн байгуулалтууд, үйлчилгээний газруудаар үйлчлүүлэх, ингэж явахдаа материал, дизайн, өнгө аяс, хэв маяг гээд бүх зүйлийг нь өөрийн мэдрэмжээр харж, дүгнэлт хийх дуртай.

Ер нь болж өгвөл гэр бүлийнхэндээ илүү их цаг зориулахыг үргэлж хичээдэг. Бага хүүтэйгээ хамт тоглоомон машин цуглуулдаг. Бас хоёр хүүхэдтэйгээ хамт зураг зурах дуртай. Тэднийгээ багаас нь техник сэтгэлгээ сайтай, аливаа юмс үзэгдлийн алдаа, оноог сайтар ойлгож харж чаддаг хүн болгон өсгөхийг хичээдэг дээ.



- Амьдралдаа үлгэр дуурайл авахыг хичээдэг хүн гэвэл хэнийг нэрлэх вэ?

- “Датаком”-ын Д.Энхбат, нийтлэлч Баабар, “Де Факто” Д.Жаргалсайхан зэрэг хүмүүсийн яриаг сонсож, нийтлэлүүдийг нь шимтэн унших дуртай.

Мөн зарим киноны гол дүрүүдээс үлгэр жишээ авч өөрийгөө хурцлахыг хичээдэг. Аливаа зүйлийг бүр багаас нь эхлүүлж, өөрийн авьяас, хөдөлмөрч зан, чадвараараа өндөрлөгт хүрсэн эрхмүүдийн үгийг онцлон сонсох дуртай. Жэк Ма, Ким Ү Жүн гээд л.

- Шүүмжлэлтэй ханддаг зүйлсийнхээ талаар...

- Өөрөө хийсэн, бүтээсэн зүйл үгүй атлаа хийж байгаа нэгнээ үргэлж шүүмжилж байдаг хүмүүсийг ойлгодоггүй. Юу ч хийдэггүй хүн өндөг шиг өөгүй байдаг гэдэгтэй санал нийлдэг.

- Ажиллах, шинийг сэтгэх эрч хүчээ хэрхэн сэлбэдэг вэ?

- Мэргэжил нэгт хүмүүсийн өндөр түвший бүтээлүүдээс эрч хүч, урам зоригийг авч, тэдэн шиг хийж бүтээх юмсан гэсэн сэдлийг өөртөө авдаг. Youtube-ээр “саундтрек” аянуудыг ихэвчлэн сонсдог. Ямар төсөл дээр ажиллаж байгаагаасаа хамаараад тухайн үедээ тааруулж ая сонгодог. Ер нь аливаа ажлыг хийхдээ гэр бүл, үр хүүхдүүдийнхээ ирээдүйн сайн сайхны төлөө хийж байгаа гэдгээ үргэлж бодож явдаг минь намайг их хурцалдаг даа.



- Залуу интерьер дизайнерууд, оюутнууддаа зориулж өөрийн зөвлөмжийг хүргэвэл...

- Хийж байгаа зүйлдээ эзэн болж, аливаа зүйлд эмх цэгцтэй, чин сэтгэлээс хандаж, төлөвлөгөөгөө шат дараалалтайгаар гарган хэрэгжүүлж, шаргуу хөдөлмөрч бай. Үргэлж шинэ зүйлстэй танилц, үзэж хар. Ажилдаа уран бүтээлч сэтгэлээр хандаж, өөрийн гэрийг барьж байгаа мэт чин сэтгэлээсээ ажиллаж байгаарай. Эцэст нь шаргуу хөдөлмөрийн ард амжилт таныг хүлээж байх болно гэж хэлмээр байна.
 

Зав гарган ярилцсанд баярлалаа.
Ярилцсан Б.Бурмаа