Орон сууцны ипотекийн найман хувийн зээлийг хэвийн үргэлжлүүлэх шийдвэр гарсан ч, эх үүсвэр байхгүйн улмаас өмнө олгогдсон зээлийн эргэн төлөлтөөр санхүүжүүлэх тухай мэдэгдэж байсан. Гэтэл зарим хэвлэл мэдээллийн хэрэгслээр ипотекийн зээлд 917 тэрбум төгрөгийн нэмэлт санхүүжилт хийх гэж буй тухай мэдээлэл тархсан нь ташаа мэдээлэл гэдгийг Монголбанкнаас мэдэгдлээ.

Уг санхүүжилтийн эх үүсвэрийн талаар тодруулахад,

   Ипотекийн зээлд 917 тэрбум төгрөгийн нэмэлт санхүүжилт олгоно гэдэг нь ташаа мэдээлэл, Монголбанкнаас банкуудад өмнө нь олгосон ипотекийн зээлийн санхүүжилтийн эх үүсвэрээс 10, 11 сард олгогдсон зээлийн эх үүсвэрээс 250 тэрбум, 12 дугаар сарын 572 тэрбум, нийтдээ 822 тэрбум төгрөгийг төлөх хугацааг 6 сар болон нэг жилээр сунгасан тухай Монголбанкны хэвлэлийн төлөөлөгч Д.Оргил мэдэгдсэн байна.

   Ингэснээр арилжааны банкууд 822 тэрбум төгрөгийг энэ онд багтаан Монголбанканд төлөх байсныг хойшлуулж, ирэх онд төлөхөөр болж байгаа аж. Харин нэмэлт санхүүжилтийн асуудал яригдаагүй аж.

   Ипотекийн зээл нь Ирээдүйн тэтгэврийн нөөц санд төвлөрсөн эргэн төлөлтөөр санхүүжигдэх журмын дагуу олгогдож байгаа. Иймд тухайн сард төлөгдсөн эргэн төлөлтийн хэмжээний мөнгө ипотекийн зээлд зориулагдаж байгаа юм. Зөвхөн 11 дүгээр сард ипотекийн зээлд зориулан Монголбанкнаас 35.8 тэрбум төгрөгийг олгожээ. 

    Арилжааны банкуудын ихэнх нь шинээр ипотекийн зээлийн хүсэлт хүлээж авалгүй, өмнөх саруудад шийдвэр нь гарсан иргэдийн зээлийг цаг хугацааных нь дарааллаар олгож байгаа аж.

Арилжааны банкуудын ипотекийн зээл олголтын байдлыг тодруулахад,

Голомт банк:

• Ипотекийн зээлийн санхүүжилт орж ирээгүй. Санхүүжилт орж ирснээр эхний ээлжинд зээлийн материал нь батлагдсан иргэдэд олгоно. Шинээр материал хүлээж авахгүй байгаа.
• Өөрийн эх үүсвэрээр 1.5%-1.6%-ийн хүүтэй 15 хүртэлх жилийн хугацаатай зээл гаргаж байгаа.
• Хамтран ажилладаг “Энхжин” хотхон, “Тайм тауэр”, “Зүүн хүрээ” хотхон, “Шинэ өргөө” хорооллын байрнаас худалдан авалт хийвэл найман хувийн зээл олгоно.

Худалдаа хөгжлийн банк:

• Ипотекийн зээлийн санхүүжилт орж ирж байгаа. Эхний ээлжинд зээлийн хүсэлт нь батлагдсан ч хүлээгдэж буй зээлдэгчдэд олгоно. Зээлийн материал шинээр хүлээн авч эхэлсэн.
• Өөрийн эх үүсвэрээр 1.5%-1.65%-ийн хүүтэй 20 хүртэлх жилийн хугацаатай зээл олгоно.

Хаан банк:

• Ипотекийн зээлийн санхүүжилт орж ирээгүй. Зээлийн материал шинээр хүлээн авахгүй байгаа.
• Өөрийн эх үүсвэрээр 1.7%-1.8%-ийн хүүтэй 15-20 хүртэлх жилийн хугацаатай зээл гаргаж байгаа.
• Хамтран ажилладаг “Олимп”, “Хангай”, “Монгол”, “Lux-5 Residence”, “Хан Хэнтийн Язгууртан”, “Агниста”, “Гэгээ 39”, “Мааньзав”, “Peacetown”, “Happy Town” хотхоноос байр авбал зээл гаргана.

Хас банк:

• Ипотекийн зээлийг Монголбанкнаас нөхөн авах нөхцөлөөр өөрийн эх үүсвэрээр олгож байгаа. Зээлийн материал шинээр хүлээн авч байгаа.
• Өөрийн эх үүсвэрээр 1.59%-1.76%-ийн хүүтэй 20 хүртэлх жилийн хугацаатай зээл олгож байгаа.

1.59%-1.76%-ийн хүүтэй зээл аваад 6 сарын дараа 8%-ийн зээлд шилжүүлэх хүсэлт тавьж болно.

Улаанбаатар хотын банк:

• Ипотекийн зээлийн санхүүжилт орж ирээгүй. Зээлийн материал шинээр хүлээн авч байгаа.
• Өөрийн эх үүсвэрээр 1.9%-ийн хүүтэй 15 хүртэлх жилийн хугацаатай зээл олгоно.
• Хамтран ажилладаг “Хосбилэг” хотхон, “Саруул” хороолол, “Консул тауэр”, “Чухаг-2” хотхонуудын байрнаас худалдан авалт хийвэл найман хувийн зээл гаргана.

Капитал банк:

• Ипотекийн зээлийн санхүүжилт орж ирээгүй. Зээлийн материал хүлээж авахгүй байгаа.
• Өөрийн эх үүсвэрээр 1.5-1.7%-ийн хүүтэй 15 хүртэлх жилийн хугацаатай зээл гаргаж байгаа.
• Хамтран ажилладаг “Бишрэлт Пропертис”-ийн борлуулж буй байрнаас худалдан авалт хийвэл найман хувийн зээл гаргана.

Капитрон банк:

• Ипотекийн зээлийн санхүүжилт орж ирээгүй. Зээлийн материал хүлээн авахгүй байгаа.
• Өөрийн эх үүсвэрээр 1.7-2.1%-ийн хүүтэй 15 хүртэлх жилийн хугацаатай зээл гаргаж байгаа.
• Хамтран ажилладаг “Ханбогд” хотхоны борлуулж буй байрнаас худалдан авалт хийвэл найман хувийн зээл гаргана.

Дэлгэрэнгүйг “ОРОН СУУЦНЫ БИРЖ”-ээс лавлана уу.