“Microsoft” корпорацийн үүсгэн байгуулагч, дэлхийн шилдэг бизнесмэнүүдийн нэг, тэрбумтан Билл Гейтс хүлэмжийн хийн ялгарлыг бууруулж, сэргээгдэх эрчим хүчний технологийг хөгжүүлэх зорилгоор нэг тэрбум долларын хөрөнгө оруулалт хийхээр боллоо.  

   “The Breakthrough Energy Ventures” санд Kleiner Perkins Caufield & Byers пүүсийн захирал Жон Доэр, “Alibaba”-ийн Жэк Ма, “Khosla”-ийн Винод Хосла, “Laura and John Arnold” сангийн тэргүүн Жон Арнолд, “Amazon”-ний Жеф Безос “SAP”-ийн Хассо Платтнер зэрэг технологийн тэргүүлэгч компаниудын үүсгэн байгуулагчид нэгдэж, Удирдах зөвлөлийн даргаар нь Билл Гейтс ажиллах ажээ.

   Тэрээр, “Бидний зорилго нь компаниуд дэлхий нийтэд найдвартай, хямд, хорт хийн ялгаруулалтгүй, цэвэр эрчим хүчийг хөгжлийн дараагийн үед хүргэхэд дэмжлэг үзүүлэх явдал юм” гэж мэдэгдэлдээ хэлсэн байна.

   Энэхүү сан Билл Гейтсийн 2015 оны 12-р сард үйл ажиллагааг нь эхлүүлсэн “The Breakthrough Energy Coalition” байгууллагын нэгээхэсэн хэсэг бөгөөд эрчим хүчний шинэ үеийн технологийг хөгжүүлэхэд хөрөнгө оруулагчдыг татан оролцуулах аж. “BEC” нь Парис хотноо болсон НҮБ-ын Уур амьсгалын өөрчлөлтийн зөвлөгөөн нээгдсэн өдөр олон тэрбум долларын өртөг бүхий цэвэр эрчим хүчний судалгаа, хөгжүүлэлтийн ажлыг эхлүүлсэн билээ.

   Сайн дурын уг санаачилгад нэгдсэн улс орнууд 2020 он гэхэд цэвэр эрчим хүчний технологийн судалгаа, хөгжүүлэлтийн төсвийг хоёр дахин нэмэгдүүлж, хөрөнгө оруулагчид нь энэ салбарыг дэмжин ажиллах юм байна. “BEV” нь энэ технологийг хөгжүүлэх компаниудад дэмжлэг үзүүлж, хэрэгжүүлж буй улс орнуудын хүрээг тэлж, өргөн цар хүрээнд хөгжүүлэхээр зорьж байгаа юм.