Нарны эрчим хүчний ердийн хавтангуудаас хамаагүй хямд өртөгтэй, дэвшилтэт хавтанг “Тесла”-ийн залуус үйлдвэрлэж эхэлсэн байна. Тус компанийн захирал Элон Мускийн хэлснээр эрчим хүч гаргагч уг дээврийн хавтан нь энгийн хавтанг бодвол илүү удаан ашиглагддаг бөгөөд жинхэнэ “Төмөр хүн” шиг л эд байх болно гэжээ.

   Bloomberg энэ талаар мэдээлэхдээ, “Тесла”-ийн шифрээр хучигдсан, наамал хавтан нь асфальтан хавтангаас 20 дахин илүү үнэтэй мэт дээд зэрэглэлийн, өндөр чанартай бүтээгдэхүүн юм гэжээ. Харин уг хавтангийн гол хүчин зүйл нь тээвэрлэлтийн зардлыг эрс бууруулж чадсан явдал юм. Уламжлалт ердийн хавтан нь хүнд жинтэй, хэврэг учраас зөөж тээвэрлэхэд ихээхэн хүндрэлтэй байдаг. Тэгвэл “Тесла”-ийн хавтан нь энгийн хавтанцрын тавны нэгтэй дүйцэхүйц хөнгөн учир зөөхөд хялбар аж.

   Түүнчлэн эдгээр дээврийн хавтангуудыг үйлдвэрлэж, суурилуулахад маш хямд өртөгтэй бөгөөд эрчим хүчний зардлыг багасгаснаар хэрэглэгчдэд хэмнэлт хийх таатай боломжийг олгож байгаа юм. Элон Муск, “Цахилгаан бол зүгээр л нэмэлт урамшуулал байх болно” хэмээн хэлсэн юм.



   “Тесла”-ийн нарны эрчим хүч үүсгүүр бүхий хавтан нь зүгээр ч нэг мөнгө хэмнээд зогсохгүй олон хүнд энэ төхөөрөмжийн давуу талыг таниулж, сурталчилж, хэрэглэх боломжийг олгож буйгаараа давуу аж. Олон хүнийг уриалж, давуу талуудыг нь харуулсан бүтээгдэхүүн байх болов уу гэж зохион бүтээгчид нь найдаж байна.

   Уг хавтан нь Тоскан маягийн, шифертэй, барзгар, гөлгөр гэсэн дөрвөн янзын шилээр үйлдвэрлэгддэг.



   Сайжруулсан шилэн давхаргатай, өнгө хослуулах боломжтой энэхүү шинэ технологийн хавтан энгийн ажиглагчийн нүдэнд үл харагдах нарны эрчим хүчний тэжээлийн элементтэй аж. Дээврийн хавтангаас гаргаж авсан цахилгааныг агшин зуур ашиглах, эсвэл зай хураагуурт хуримтлуулах боломжтой юм байна.

  “Тесла” уг нарны хавтангуудаа 2017 оны зун албан ёсоор худалдаанд гаргахаар төлөвлөжээ.