BIG буюу “Biarke Ingels Group” нь архитектурын салбарт томоохон дэвшил авчрахуйц нэгэн төслийг хэрэгжүүлж эхлээд байна. Нидерланд улсын нийслэл Амстердам хотноо байгуулж буй уг төслийг хэрэгжүүлэгч “BIG” болон “Barcode Architects”-ийн архитекторууд уг “Sluishuis” нэртэй барилгын загвар дээр ажиллаж байгаа аж. Энэ нь ногоон байгууламж бүхий террас, усанд хөвөгч цэцэрлэгт хүрээлэн бүхий гайхалтай тохилог, тав тухтай холимог ашиглалттай барилга бөгөөд 380 айлын орон сууцтай юм. Барилгын гол давуу тал нь өөрөө өөрийгөө эрчим хүч, дулаанаар хангах цэвэр эрчим хүчний хэрэглээ юм. Ялангуяа дээрх 380 айлын цахилгаан, дулааны хэрэглээг 100 хувь сэргээгдэх эрчим хүчнээс хангах ажээ.



    Барилгын хүрээлэн буй талбайг сонгодог хэв маягаар тохижуулж, оршин суугчиддаа усан дээр хөвөх гадна талбайдаа тайван амгалан амрах, зугаалах орчныг бүрдүүлж, хүүхдийн тоглоомын талбайг ч шийдсэн байна.



  Оршин суугчид нь гоёмсог ногоон террасаар хүрээлэгдсэн сууцанд амьдрахаас гадна далбаат онгоц жолоодох сургалтад сууж, ойр орчмын бүлэг арлуудаар ч аялах боломжтой гэнэ. Түүнчлэн энд амьдарч буй иргэд, гаднаас ирсэн зочид цогцолбор дундуур завиар эсвэл явган ч явах боломжтой аж. Тэд IJ нуурын хөвөөгөөр зугаалангаа байгалийн сайхныг бахдан амарч тухалж болох аж.



    “Sluishuis” цогцолбор барилга нь IJ нуурын эрэг дээрх Амстердам хотын Ижбург Штайгерайланд дүүрэгт харъяалагддаг байна. Төслийг хэрэгжүүлэгчид уг барилгын гүйцэтгэлийг шалгарсан 4 компаниас сонгох бөгөөд одоогоор уг жагсаалтыг “Vorm”, “Besix” компаниуд тэргүүлж байгаа юм.