“ГАН ГҮҮР” тэмцээн зохион байгуулагдана
ШУТИС-ийн Барилга, Архитектурын Сургуулийн Барилгын инженерийн салбарын санаачилгаар МҮИС-ийн Барилгын Инженерийн Сургуультай хамтран "Ган гүүр" тэмцээнийг зохион байгуулах гэж байна. Энэхүү тэмцээн нь их, дээд сургуулиудын барилга, авто зам, гүүрийн инженерийн чиглэлээр суралцаж буй оюутнуудын дунд зохион байгуулагдах юм.
Тэмцээний зорилго:
- Дээрх мэргэжлээр сурч буй оюутнуудын онолын мэдлэгийг практикт хэрэгжүүлэх чадварыг хөгжүүлэх. Үүнд:
- Инженерийн байгууламжийн загварыг гаргах, төсөллөх, эд ангиудыг өөрийн гараар бэлтгэн угсрах, турших замаар олон талт чадварыг олж авч, туршлага хуримтлуулах
- Инженерийн байгууламжид тавигдах шаардлага, материалын шинж чанар, бэлтгэх угсрах процесс, аюулгүй ажиллагаа, гоо зүй, өртгийн талаар ойлголттой болох
- Бүтээлчээр сэтгэх
- Мэргэжлийн өндөр ур чадвар, ёс зүйд тэмүүлэх ирээдүйн инженерүүдийг бэлтгэх
- Азийн ган гүүр тэмцээнд Монгол улсаас оролцох багийг шалгаруулах үндсэн зорилготой юм.
Их, дээд сургуулийн оюутнуудын хувьд онолын мэдлэгээ практикт туршин өөрсдийгөө сорих талбар нь тэдэнд зориулан зохион байгуулагддаг тэмцээн уралдаан, олимпиад, эрдэм шинжилгээний хурлууд байдаг билээ. Тийм ч учраас “ГАН ГҮҮР” тэмцээн оюутнуудын хувьд багаар ажиллаж, өөрсдийн мэдлэг, чадвараар уралдах том талбар болно гэдэгт эргэлзэхгүй байна.
Тэмцээнд түрүүлсэн баг Азийн “ГАН ГҮҮР” тэмцээн (Asia Steel Bridge Competition)-д Монгол улсыг төлөөлөн оролцох эрхтэй болно. Уг тэмцээний талаар товч танилцуулъя.
9 дэх удаагаа зохион байгуулагдсан “Asia Steel Bridge Competition” буюу “ASIA BRICOM” тэмцээн нь 2016 оны 3-р сард Япон улсын Токиогийн Технологийн Институт дээр зохион байгуулагдаж, 3 улсын 11 баг оролцсоноос Тайвань улсын National Central University-ийн “7-11” баг түрүүлсэн байна. “7-11” баг нь энэ тэмцээний хамгийн хөнгөн жинтэй буюу 17 кг жинтэй гүүрийг зохион бүтээж оролцсон ба уг гүүр 300 кг ачааны үйлчлэлд ердөө 5,3мм-ийн хотойлттой байснаараа Бүтээцийн өртөг, Илтгэл, Хотойлтын урьдчилсан тооцоо төрлүүдэд тэргүүлэхийн зэрэгцээ Ерөнхий гүйцэтгэлээр түрүүлжээ.
“ASIA BRICOM” тэмцээнийг анх 2006 онд зохион байгуулж эхэлсэн түүхтэй ба 10 дахь удаагийнх буюу энэ удаагийнх 2017 оны 8-р сарын 15-17-ны өдрүүдэд Тайвань улсын National Central University их сургууль зохион байгуулахаар товлоод байгаа билээ.
“ГАН ГҮҮР”-ийн ийм төрлийн тэмцээн анх 1980-аад онд АНУ-д оюутнуудын дунд зохион байгуулагдаж эхэлснээс хойш 1992 онд оюутнуудын бүтээлч сэтгэлгээг өрнүүлэх, онолыг практикт хэрэгжүүлэх, оюутнуудын алсын харааг тэлэх үндсэн зорилготойгоор Америкийн Барилгын Инженерүүдийн Нийгэмлэгээс үндэсний хэмжээний тэмцээн болгон өргөжүүлж, жил бүр мужийн тэмцээнд түрүүлсэн багууд улсын хэмжээний тэмцээнд оролцох эрх авдаг нэр хүндтэй тэмцээн болсон байна.
Энэ төрлийн тэмцээнийг дэлхийн олон улс орнууд зохион байгуулж оюутнуудад өөрсдийгөө хөгжүүлэх, багаар хамтран ажиллах, онолын мэдлэгээ дадлагаар батлах, мэргэжлийн ур чадвараа нэмэгдүүлэх, бусдын түршлагаас суралцах олон боломжийг олгодог. Монгол оюутнууд ч мөн ийм боломжоор хангагдах ёстой гэж үзэн энэхүү тэмцээнийг санаачлан зохион байгуулахаар бид ажиллаж байна.
Ган гүүрийн тэмцээний шалгаруулалт 2017 оны 2-р сарын 4, 5-ны өдрүүдэд ШУТИС-ийн БАС дээр болно. Тэмцээнийг “Asia Steel Bridge Competition”-ний дүрмээр зохион байгуулах бөгөөд оролцох багууд 4м-ийн алслалтай, 60см өргөнтэй энгийн дамнуруун гүүрийг гангаар хийж уралдана. Дараах үндсэн 6 үзүүлэлтээр оноо өгч дүгнэнэ. Үүнд:
- Угсралтын өртөг
- Бүтээцийн өртөг
- Нийт өртөг
- Гоо зүй
- Илтгэл
- Хотойлтын урьдчилсан тооцоо
Дээрх үзүүлэлт тус бүрээр эхний 2 байр эзэлсэн багийг шагнаж урамшуулна. Ерөнхий гүйцэтгэлээр тэргүүн байр эзэлсэн багийг шалгаруулж, Азийн тэмцээнд оролцуулах болно.
Тэмцээний тухай болон дүрмийг доорх хаягаар холбогдон авах боломжтой.
Холбогдох хаяг:
ШУТИС-ийн Барилга, Архитектурын Сургуулийн Барилгын Инженерийн Салбар
Э-шуудан: e_davaakhuu@yahoo.com , moyunchimeg@must.edu.mn
Утас: 88098249, 88100021
Facebook page (хуудас): Ган гүүрийн тэмцээн
Тэмцээний тухай болон дүрмийг доорх хаягаар холбогдон авах боломжтой.
Холбогдох хаяг:
ШУТИС-ийн Барилга, Архитектурын Сургуулийн Барилгын Инженерийн Салбар
Э-шуудан: e_davaakhuu@yahoo.com , moyunchimeg@must.edu.mn
Утас: 88098249, 88100021
Facebook page (хуудас): Ган гүүрийн тэмцээн