“Орон сууцны бирж” ХХК-ийн Ерөнхий менежер Б.Наранмандах

Одоо хашиж буй ажил, албан тушаал: “Орон сууцны бирж” ХХК-ийн Ерөнхий менежер
Байршил: Монгол Улс, Улаанбаатар хот, Хан-Уул дүүргийн 2 дугаар хороо, “Мишээл Барилгын Их Дэлгүүр”-ийн 2 давхарт
Хэрэглэдэг гар утас: iPhone 6
Хэрэглэдэг компьютер ба таблет: ASUS I7  
Хэлэх дуртай үг: Санаа зөв бол заяа зөв
Сошиал хаяг:  Nar Naraa (фэйсбүүк)
Орон Сууцны Бирж (фэйсбүүк, твиттер)
http://birj.barilga.mn/

 “Ажлын нэг өдөр” булангийнхаа энэ удаагийн дугаараар “Орон сууцны бирж” ХХК-ийн Ерөнхий менежер Б.Наранмандахын ажил дээр саатлаа. Түүнийг хамтран ажиллагсад нь Нараа хэмээн дотночлон дуудна.

Нараа ажлын талбар дээр гараад удаагүй ч чамлахааргүй олон ажлыг амжуулжээ. Түүнийг би барилга, үл хөдлөхийн салбарт ихийг хийж чадах, ирээдүйтэй, залуу мэргэжилтэн хэмээн онцолмоор байна. Учир нь Монголдоо анхдагчид тооцогдож буй Орон Сууцны Биржийн үйл ажиллагааг удирдан ажиллаж байгаа билээ.

Түүний ажлын байр маш цэвэр цэмцгэр, эмх замбараатай, бүх зүйл нь дэс дараалалтай.  Ажлын төлөвлөгөөнөөс нь авахуулаад гэр бүлийн зураг нь хүртэл ширээн дээр нь байна гээч. “Хийж байгаа ажлаасаа маш их эрч хүч, эерэг энергийг авдаг. Хүний амьдралдаа хэдхэн удаа, заримд нь ганц удаа л тохиох амьдрах орон сууцаа худалдан авах шийдвэрт нь оролцож, туслалцаа үзүүлж ажиллана гэдэг өөрөө буянтай ажил.” хэмээн чин сэтгэлээсээ ярих түүнтэй ажлын нэг өдрийг өнгөрүүлэх таатай байлаа. Ингээд түүнтэй хөөрөлдсөнөө хөрвүүллээ.



-“Ажлын нэг өдөр” булангийнхаа уламжлал болсон асуултаар яриагаа эхлүүлье. Таны өнөөдрийн төлөвлөсөн ажил?

Үдээс хойш хоёр компанитай уулзалттай, харилцагч газрууддаа баярын мэндчилгээ хүргэнэ. Мөн оны төгсгөл учраас 2016 оны тайлан болон 2017 оны төлөвлөгөөгөө гаргах гэж байна.

-Таны ажлын үүрэг?

Өдөр тутмын үйл ажиллагааг удирдан зохион байгуулах, төлөвлөгөө, тайлан гаргах, бичиг баримтын ажил, шаардлагатай тохиолдолд реалтортайгаа хамт тухайн захиалгат орон сууцанд очиж, үнэлгээ хийх гэх мэт ажлыг хийдэг дээ.

-Ашигладаг програм?

“AutoCad” болон өдөр тутмын ажилдаа “Hangout”, “Habspot”, “Gmail”, “Google Drive” зэрэг Google-ийн дагалдах программуудыг байнга ашигладаг.

-Шинэхэн төгссөн инженер маань МЗХ-ноос “Залуу барилгачин” цол тэмдгээр хүртэл шагнуулаад амжсан. Баяр хүргэе.

Тийм. 2012 онд Багш, арга зүйчээр төгсөөд “Барилга.МН”-д ажиллаж эхэлснээр орж, 9 давхар орон сууцны барилгыг ашиглалтад хүлээлгэн өгсөн. Энд ажиллах хугацаандаа барилгын инженер мэргэжлээр суралцаж, барилгын ажлаа давхар явуулж, дадлагажиж байсан минь их хэрэг болсон. Ажлын талбар дээр байсан учраас сурахад хялбар байсан. Мэдээж ачаалал ихтэй ажилласныг эс тооцвол шүү дээ. Үүний дараа 2015 онд “Barilga.MN” оффисын барилгыг ашиглалтад өгсөн.



-Хүүхэд насныхаа тухай яриач.

Би эцэг эхээс дөрвүүлээ, айлын отгон хүүхэд. Өвөрхангай аймгийн Хархорин суманд төрж өссөн. Багадаа хэтэрхий дүрсгүй хүүхэд байлаа. Самбо, чөлөөт бөхөөр хичээллэж, барилддаг байв. Үүнд аав маань ч их дуртай. Миний аав 34-р баазад Моторчноор ажиллаж байгаад хувьчлагдсаны дараа автомашинаараа тээвэрт явдаг байсан. Аавыгаа байнга дагаж явдаг байсан учраас техник, технологид сонирхолтой болсон. Гуч машиныг нь хүртэл төвөггүй барьдаг хүүхэд байлаа. /инээв/
Ерөнхий боловсролын дунд сургуулиа нутагтаа дүүргэж, 2012 онд Аварга дээд сургуулийг Багш, арга зүйч мэргэжлээр, 2016 онд МҮИС-ийн Иргэний ба үйлдвэрлэлийн барилгын инженерийн ангийг төгссөн.

-Спортоос барилгын салбар руу яагаад орох болов оо?

Би багш, арга зүйч мэргэжлээрээ ажиллаж байгаагүй. Төгсөөд барилгатай холбоотой ажил хийж байсан учраас ах маань намайг дэмжиж, надад үргэлжлүүлэн барилгын инженерээр суралцахыг санал болгосон. Би ч энэ тогоонд хэдийн орчихсон байсан учир эргэлт буцалтгүйгээр барилгын салбарт хүчин зүтгэж байна даа.

-Хамгийн их сургамж авсан,туршлагад нь нэмэр болсон ажил юу байв?

Сургамж авсан гэхээс илүү миний мэргэжил өөрөө алдаа гаргах эрхгүй, хариуцлага өндөр ажил. Жишээ нь, тухайн арматур, бетоны хэмжээг дур мэдэн хасаж болохгүй, тооцооны инженерийн гаргасан зураг төслийн дагуу ажлаа гүйцэтгэх ёстой гээд хариуцлага алдаж болохгүй олон зүйл бий.

Хөдөлгөөнтэй, идэвхтэй амьдрахыг хичээдэг учраас “Aqua Fitness” болон бусад төрлийн фитнесс клубуудэд явдаг. Ер нь боломжтой бүхий л цаг заваа хүүдээ, гэр бүлдээ зориулахыг хичээдэг.

-Одоо ажиллаж байгаа “Орон сууцны бирж”-ийнхээ тухай яриач.

Урьд өмнө нь орон сууцны өдөрлөг, үзэсгэлэн гэх мэт болдог байснаас Орон сууцны бирж буюу байнгын үйл ажиллагаатай мэдээллийн төв байгуулагдсан тохиолдол үгүй. Анхдагч гэдгээрээ онцлог, ач холбогдлоороо их чухал.
Хийж байгаа ажлаасаа маш их эрч хүч, эерэг энергийг авдаг. Хүний амьдралдаа хэдхэн удаа, заримд нь ганц удаа л тохиох амьдрах орон сууцаа худалдан авах шийдвэрт нь оролцож, мэдээлэл, зөвлөгөө өгч ажиллана гэдэг өөрөө их буянтай ажил.
Манай бирж 2016 оны дөрөвдүгээр сарын 1-нд албан ёсоор нээлтээ хийсэн. Улаанбаатарт борлуулагдаж байгаа орон сууцны мэдээлэл, зөвлөгөөг иргэдэд хүргэхээс гадна хоёрдогч зах зээлийн орон сууцны зуучийн үйл ажиллагааг явуулдаг. Орон сууцтай холбоотой бүхий л асуудлаа бидэнд даатгах бүрэн боломжтой гэсэн үг юм.



-Танай дээр хэчнээн төслийн мэдээлэл байршдаг вэ?
Одоогоор 88 төслийн мэдээлэл байршиж байна.

-2016 оны орон сууцны зах зээлийн талаарх өөрийн дүгнэлтээс хуваалцаач.

2016 оны тухайд өмнөх жилүүдтэй харьцуулахад түрээсийн орон сууцны үнэ өсч, борлуулалтын үнэ харьцангуй буурлаа. Ойрын хугацаанд орон сууц борлуулалтын нөхцөл нь улам уян хатан болно уу гэхээс, үнэ дахин буурахгүй болов уу.
Манайд хандаж байгаа иргэдийн 80 хувь нь ипотекийн зээлээр авах сонирхолтой байдаг. Энэ зээлийг сонирхож байгаа иргэдийн тэн хагас нь банкны шалгуур хангаж чаддаггүй. Үүнд биржээс анхаарал хандуулж, орон сууц борлуулагч байгууллагатай хувь лизинг тохирох, 36 сарын хугацаатай, хүүгүй зээл авах зэрэг арга хэмжээг авч ажиллаж байна. Мөн ипотекийн зээлийн журамд урьдчилгаа 30 хувийг төлнө гэж заасан байгаа. Харин манайхаас урьдчилгаа 15 хувиа төлөөд үлдсэн 15 хувийг нь ямар нэгэн хүүгүйгээр графикийн дагуу төлөх нөхцөлийг санал болгож байгаа юм.
Үүнээс гадна сар бүр лизингээ төлөх чадвартай ч банкны шаардлагыг хангахгүй иргэдэд зориулсан төлбөрийн нөхцөлүүд ч бий.

         
            Ийнхүү кофе уусан шигээ ярилцаж, ажилтай нь танилцсаар байтал аль хэдийн үд дунд болжээ. Нараа бид хоёрын яриа цаг хиртээ хэлбийсэн байна. Энэ үед түүнтэй уулзаж, Биржид мэдээллээ байршуулах хүсэлтэй компаниудтай уулзах товлосон цаг нь болсон аж. Ингээд Нараа ажилдаа орж, би сониучирхан харж суусан юм.

Орон сууцны бирж нь үйл ажиллагаагаа нээгээд удаагүй ч хоёр удаагийн орон сууцны хямдрал урамшуулалт өдөрлөгийг зохион байгуулж, биржийг үзэж сонирхсон хүмүүсийн тоо давтагдсан тоогоор өдөрт 150-д хүрч, борлуулсан орон сууц нь сард 100 гаруй болоод байна. Энэхүү амжилттай бизнесийг ахалж, хөтөлж яваа Б.Наранмандах таны цаашдын ажил, амьдралд өндөр амжилтыг хүсэн ерөөе.