Хятадын эрчим хүчний хоёр пүүс хамтарч, 1986 онд хүчтэй дэлбэрч эргэн тойрноо хордуулж байсан Чернобилийн цөмийн реакторын бүст нарны эрчим хүчний хамгийн том үйлдвэр байгуулахаар боллоо.

   “Нэгэнтээ маш их хохирол амссан энэ бүс нутагт сэргээгдэх эрчим хүчний маш том үйлдвэрлэлийг байгуулснаар нийгэм болоод эдийн засгийн маш их үр өгөөжтэй бүтээн байгуулалт болно” гэж “GCL System Integration Technology” пүүсийн захирал Шу Хуа ярьсан юм. Ослын дараа маш аймшигтай байдалд орсон тус газарт Парисын гэрээний дагуу дэлхий нийтэд хэрэгтэй маш том ажлыг ийнхүү эхлүүлэх гэж байгаа юм.

   Украйн дахь Чернобилийн цөмийн реакторын орчимд ой болон намгархаг бүсийн 2,589 км/кв талбайд энэхүү төслийг гүйцэтгэнэ. Реактор нь нэг жилийн дараа гэхэд 1.6 тэрбум долларын ган байгууламжаар хучигдахнээ.

   Эх сурвалжуудын мэдээлж буйгаар, төслийг хэрэгжүүлэгч компаниудын зүгээс уг нарны эрчим хүчний үйлдвэр нь хэрхэн яаж, хэчнээн зардлаар баригдах талаар тодорхой мэдээлэл өгөхгүй байгаа аж. Харин тэнд ажиллах хүмүүсийн эрүүл аюулгүй байдлыг бүрэн хангаж ажиллана гэдгээ мэдэгдсэн байна. “Украйны зүгээс тус газарт хөдөө аж ахуй болон бусад чиглэлээр үйл ажиллагаа явуулахыг зөвшөөрсөн. Тиймээс бүх ажил бүрэн хяналтан дор явагдах болно” хэмээн төсөл гүйцэтгэгч ярилаа.



   Хятадын пүүс энэхүү олон улсын хэмжээний нэр хүндтэй, сэргээгдэх эрчим хүчний төслийг хариуцан ажиллаж байна. Чернобилийн төслийн өмнө ч Хятад улс сэргээгдэх эрчим хүчний үүсгүүрийн байгуулахаар бохирдсон газрыг амжилттайгаар дахин сэргээж байсан туршлагатай билээ.

   Тариалангийн газар нутгийг сэргээхээс авахуулаад хот суурины тэлэлтийг хязгаарлах гээд олон төрлийн ажлыг гүйцэтгэж чадсан Хятад улс нүүрсний өлгий болсон Шьянси мужийн бохирлогдож гэмтсэн газар нутагт нар болон салхины цахилгаан станцыг байгуулан тусгай бодлого гарган ажилласан юм. Оны сүүлч гэхэд 43 гигаваттын хүчин чадалтай цахилгаан үйлдвэрлэснээр Хятад улс нарны эрчим хүчний үйлдвэрлэлээр дэлхийд тэргүүлэгч болж чадах юм. 2015 онд үйлдвэрлэгдсэн нарны эрчим хүчний 72 хувь Хятад улсад хамаарагддаг аж.